JEJE-A GOAL ROPUI HMANGIN INDIA IN POINT AN HLAWHCHHUAK – Lawmkima Hmar

India 2-2 Myanmar
Ind : Sunil Chhetri 13′ (p), Jeje Lalpekhlua 69′
Mya: Yan Naing Oo 1′, Kyaw Ko Ko 19′

Hero of the Match : Jeje Lalpekhlua (Ind)

AFC Asian Cup UAE 2019 qualifier, Pandit JLN Stadium, Goa a khelhah Myanmar laka vawi hnih lai a chan chhe zawka tang India chuan an si phurh sut zovin point an hlawhchhuak a, Qualifying-a an match hnuhnung ber dawtah India tan Sunil Chhetri leh Jeje Lalpekhlua ten goal an thun a, India hian vawi 5 khelh atanga point 13 hmuin chiang takin Group A leader an ni.

India hian second 19-na lekah goal an chhuah a, erlet ve nghalin Hlaing Bo Bo chuan India captain Sunil Chhetri a keuhthluk avangin penalty a chawi a, hei hi Chhetri chuan Myanmar goalkeeper Kyaw Zin veilama petin ram tana a goal 56-na a thun.

Minute 6 hnu lekah Myanmar tan Kyaw Ko Ko chuan 20 Yard a hla atangin hmahruaina goal a thun ve leh. India in an dinhmun a duhawm lo tih hriain an insiamrem a; Udanta Singh leh Halicharan Narzary te chu a sir lama sawn niin inkhel chawk danglamtu an ni.

India hian minute 30-naah Eugeneson Lyngdoh-a corner pet atangin goal an thun teuh hle a, Sandesh Jhingan chuan a tauh sang hlek. Chhetri chuan vawi hnih a hun tha a khawhral zui bawk.

A huna goal thun thin, ‘AIFF Player of the Year’ nilai Jeje Lalpekhlua hun a rawn herchhuak ta, Hnahthial tlangval hian minute 69-naah mual lai atanga Eugeneson Lyngdoh-a longball pek chu box chhungah ban taka lain a lirin Myanmar keeper Kyaw Zin veilamah a thun; goal chhinchhiah tlak bik a va ni chiang em!

Hun tawp lamah India in goal thunna remchang an ngah a, mahse a teuhin a ral. Minute 86-naah India hian Myanmar bo chhungah indirect free-kick hmuin skipper Sunil Chhetri chuan goal-ah thun mahse tuma deh lova goal-a a luh avanagin pawm a ni lo.

India hian AFC Asian Cup UAE 2019 qualifier a na match hnuhnung berah nakum March 28, 2018 khian Kyrgyz Republic an hmachhawn ang.

India XI : Gurpreet Singh (GK), Jerry Lalrinzuala, Sandesh Jhingan, Anas Edathodika, Pritam Kotal, Eugeneson Lyngdoh (Anirudh Thapa 82′), Germanpreet Singh, Halicharan Narzary (Bikash Jairu 76′), Udanta Singh, Sunil Chhetri (C), Jeje Lalpekhlua