Tunlai Indian football fans te bengkhawn ber leh ngaihven ber chu Jeje-a leh Chhetri-a Glasgow zin hi a ni. Sawi kher pawh ngai lovin an zin chhan leh an programme zawng zawng pawh kan hre vekin a rinawm. Zirtawp zan khan Glasgow an thleng a. Khaw vawt tak karah training an zawm thu leh an training thlalak vel chu internet-ah kan hmu teuh tawh bawkin ka ring. Tuna ka thil rawn post tum tur hi chu kan ngaihven ber leh bengkhawn ber mahse ngaihthlak hrehawm tur tak ni lawi si a ni a.

Zanin khan ZoFooty chuan facebook ah Jeje-a hi kan be fuh hlauh mai a. Kan biak rei loh avangin duh angin zawhna kan zawt tam hman lova, mahse kan biakna ang ang hi kan rawn chhuah chhawng tawp mai ang. News kimchang kan hriat hunah duh leh post thar angin kan siam leh zawk mai dawn nia.

Jeje-a kan biakna i lo tarlang dawn ang.

ZoFooty: I dam tha maw?
Jeje: Dam alawm.

ZoFooty: Zanin tiraw Hamburg nen in inkhelh tur kha?
Jeje: Aw nie, mahse hei kan kal ve lova.

ZoFooty: A va pawi ve aw. In kal ve loh chhan min hrilh thei ang em?
Jeje: Hrilh thei e aw. Visa a fel hman lova, a pawi khawp mai.

ZoFooty: Pawi kan tihpui hle mai che. Anih leh game dangah chance in nei thei dawn em?
Jeje:  Aw, dawn e. Hei naktuk hian youth team nen kan inkhel ang.

ZoFooty: Training te chu a tough em? Sap ho chu an chungnung viau em?
Jeje : Skills-ah chuan kan inthlau lo mahse an lian tha a, an game a rang bawk a. Kan inthlau em em bikin ka hre lo.

ZoFooty: Anih leh Scottish League inkhel ve thei dawn em?
Jeje: Dawn hrih lo e.

ZoFooty: Inkawmna hun min pe a, kan lawm e
Jeje: Keipawh le.

Sawi belh ang :
Jeje leh Chhetri hi Rangers leh Hamburg-in friendly match an khelh hunah an khel ve tur thu leh he hunah hian Portuguese club – Benfica leh Sporting Lisbon te chuan an scout an tirh tur thu kan tarlang tawh a. Mahse hei tum angin thil a kal leh thei ta lo a ni. ZoFooty chuan pawi kan tihpui tak zet zet a. Mahse hei vang hian hnual mai tur a ni lova, friendly match khel turin an zin lo mai chauh a ni. An inkhel leh zelna turah duhsakna kan hlan a ni.

Hetih lai hian thil lawmawm deuh mai sawi duh ka nei a. Jeje-a hian Blackburn leh Malaysia an tum khan a rin ang em em a an thiam bik loh thu leh a lo ngaihsan ang em em an nih bik loh thu a sawi a. Tunah Sap ho (Sap tih hian Mizo rilruah chuan a chiang berin ka hria) chu skills-ah an thlauh em em loh thu a sawi leh a. Hei hian mi tumruh leh mi inringtawk a nihzia a tilang  hlein ka hria. Ka huphurh lutuk tih leh ka thei lo tih hi a sawi ngai meuh lo a ni. Hei tak hi a thlensan chhan chu niin ka hria. ZoFooty chuan duhsakna kan hlan e. Tawngtainaah kan hre theuh dawn nia.