India leh Malaysia te an inkhel tih lam aiin Sunil Chhetri leh Jeje te Glasgow Rangers, protestant club ruh lutukin trial turin an sawm tih lam hi ka lo bengkhawn zawk ni ngei tur a ni Jeje hi an inkhelh lai tilo chuan zuk biak tumin a cell phone ah chuan ka zuk ti tlauh tlauh a (an inkhel tih ka lo hre silo). A ni lah Salt Lake Stadium, Kolkata ah India tan goal a lo thun reng chu niin. Mi inngaitlawm leh biak nuam ngang hi a ni bawk a, phur tak mai hian min rawn bia chu a aia phurin ka lo chhang a. Malaysia an hneh thu leh Doordashan ah an inkhel a chhuah thu min hrilh chuan ka enlo erawh chu pawi ka ti vawng vawng hle!

Mizo inkhelthiam te leh India a thiam ka tih te hi Bhaichung leh Sunil hnungzuiin tu nge kal chhuak leh ang tia ka ngaihtuah laiin Gouramangi vanduaina te kha ka hrechhuak a. Tan a nat rualin min ti dawihzep leh ta deuh a. Rangers a Mizo hmel kan han hmu tur chu ka nghahhlelh rualin ka huphurh lawk tan ta riau a. Heti hian ka ngaihtuah leh ta a. Mizo inkhelthiam te hi I-League a club ah te hian inbengbel tak tak ila, tan la leh zualin South Asia lamah hian han khel thei ila, Singapore leh Thailand ah te hian han khel zawk phawt se tiin ka ngaihtuahna ka lo seng ve a. Tunlaiah ‘racism’ te kan sawi nasa nen FIFA pawhin tan a la nasa bawk nen, chi inthliarna hi khawi hmunah pawh kan la na si a, Jeje leh Sunil te tan chuan Scotland lo deuh hi ni thei se te ka lo ti ve ringawt a.

Jeje hian agent a neihthat zar a zo tih leh Sunil nen agent khat an intawm thu te minlo hrilh a. A agent hi thil a ti thei hle a ni tih leh Jeje te thiandun hi a ringtawkin tha a ti tawk a ni tih chu a chiang mai. Jeje hian Malaysia khelh chu a rin aiin a hahthlakloh thu te a lo sawi a. Team naupang tak an nih tawh thu leh Didika a thatzia thu min hrilh bawka. India ah hian Didika aia beiseiawm hi an tam ka ringlo. Jeje hi rinaiin boruak a la lap thiam hle a. Rangers a zuk trial pawh hi a chak a ni tih a hriat rualin helama a hna, Pune FC leh India tana a mawhphurhna te hi a ngai pawimawh a ni tih a hriat a, hei hi a hlu in a ropui ka ti.

Tunhnaia India leh Churchill Brothers te innghahna Didika pawh a lo awm remchang a, biak ve kha a lo rem bawk nen Jeje aimahin kan inbe rei ta zawk a. Didika hi India defender te chanchin ka zawt daih a. Left back ah Debrata Roy aiin tawnhriat nei tha leh kum lamah pawh upa zawk Samir Naik chuan field chhungah a puih nasat zawk thu min hrilh a. India veteran defender kum 30 chuang ni tawh Mahesh Gawli tluk thei an la awm loh thu min hrilh tel bawk. Tuna India team te hi an naupan tawhzia leh an san vakloh thu min hrilh a. Khasi val Rocus Lamare, tuna Salgaocar player pawimawh hi ground ball ah a thatzia te pawh a sawi tel. Lamare hi tuna Lajong coach Pradhyum Reddy pawhin Goa nuam a tihzia leh Lajong ah a luh mai a la rinloh thu min hrilh tawh nghe nghe. Didika hian phur taka minlo hrilh chu Arsenal in Chelsea an hneh tum khan, Air India an khelzo hmanhmawh takin a in lam a pan thu leh a lawm lutuk in a dawhkan a chum chhiat loh chauh thu te ha hipin a sawi. Didika hi Jeje ang lo takin Arsenal a tan hle.

Tuna India a ‘star’ leh ‘star in the making’ kan neih Jeje leh Didika te hi pressure nasa takah an khel thin a. An club te innghahna an nih rualin ram pumin beiseina a nghahna an ni tawh a. Hetiang anih avang hian Mizo mipui te pawhin tawngtaipui nasa leh zual ila. A sawiseltu nih aiin hma an sawn theihna tura tan lak pui tu nih hi ram leh hnam zawng pawha ke kan penchhuah ve theihna tur niin ka hria. An ni hnung hi Mizo in kan la zui zel dawn. Hniak lian tak hnutchhiah thei tura thiamna nei kan Mizo pui te hi eng nge i tihsak ve theih ang le?