“Ka lo kir ka ring tawh lo”

Football khawvela manager ropui ber pawl Louis van Gaal chuan football luhchilh leh tumna a neih tawh loh thu a sawi. Kum 65 a upa Dutch coach hi nikum May thlaa Manchester United in an chawlhtir atang khan hna nei lo in a awm mek a, sawmna duhawm tak tak dawng nual mahse coaching luhchilh leh a tum tawh loh thu a sawi.

“Chawlh hrih ka duh a, chawl zawk tur chauh a rilru ka siam hnuah ka chawlh hlen ka awn ka zawk a, ka lo kir ka ring tawh lo,” tiin Dutch chanchinbu De Telegraaf a hrilh. LVG hian a chawlh chhanah a chhungte bula hun tam zawk hman a duh vang niin a sawi a, sum hlawm lian tak taka sawmtu an awm thu erawh a sawi lang thung.

Kum 26 zet coach hna thawk tawh LVG hi kum 1986 khan Dutch club AZ Alkmaar assistant manager niin a club enkawl lam a luhchilh a, hemi hnu kum 1988 ah Dutch coach lar Leo Beenhakker a thachhangdawltu ni turin Ajax Amsterdam a pan. Kum 1991 – 1997 chhung Ajax coach a ni a, Eredivisie ah tum thum a champion pui bakah UEFA Champions League, UEFA Cup, UEFA Super Cup leh Intercontinental Cup a chawi pui a, Ajax tana a thawhlai hi a tawnsan lai ber a tih theih awm e.

Rawlthar player tha tam tak khelhna hmun siamsaktu leh chher liantu a ni a, kum 1997-2000 inkar khan Barcelona enkawlin a zawnin La Liga a chawipui bakah Copa Del Rey – ah an champion bawk. Kum 2000 a Barcelona a chhuahsan hnuah Netherlands national team kum hnih a enkawl a, kum 2002-2003 chhung khan Barcelona bawk a enkawl leh a, a tan kum tha a ni lo.

Chona thar hmachhawn turin kum 2005 khan a bultanna AZ ah bawk a kir leh a, Dutch club vantlang tak chu Eredivisie a chawipui leh mai a, a chet dan chu club lian Bayern Munich in an hmuhhmaih lo. Kum 2009 ah Munich khawpui a pan a, kum hnih enkawlin an ramchhunga nomawi a chawipui kim vek !

Kum 2012 ah an ram kohna chhangin Netherlands a enkawl leh a, kum 10 liam taa World Cup a tlinpui zawh tawh loh avang erawh chuan a tan chona tling a va ni em ! Mipui rinkailo Netherlands chu mak tak maiin 2014 World Cup – ah pathumna a nihpui a, semi-final ah vanduaithlak takin penalty-shootout ah Argentina an hneh lo a ni.

World Cup zawh rual hian an inrem lawk angin Manchester United a pan a, kum thum daih contract a ziak. Old Trafford a kum hnih a cham hman tihin an beisei ang result leh nomawi a chawipui thei lo a, FA Cup a chawipui hnu ni hnih lekah ban a ni ta a ni.

LVG hian team hrang hrang a enkawl chhungin nomawi 20 a chawi pui hman a, tunah erawh ama duhthlan ang ngeiin khelmualah kan hmu tawh dawn lo a ni.