Sweden coach Erik Hamren chu Ukraine an hneh loh ṭuma a players te khelh danah a lawm lo hle a, a players ṭhenkhatte dawihzep vanga chak lo an ni a ti hmiah mai.

Sweden hi Group D mawngphahah an awm mek a. Thawhṭanni zanah a thlengtu Ukraine nen intumin, Zlatan Ibrahimovic hmangin hma an hruai zet a, mahse Andrei Shevchenko goal hnih an ngam ta lo a ni. Sweden hian a khelh hrim hrimah pawh beisei an pha lo a, England leh France an la tum dawn avangin an dinhmun hi a ṭha lo hle a tih theih awm e.

Sweden coach chuan, “Kan theihna nia kan hriat kan la thleng lo a, coach ka nih angin hei hi ka mawhphurhna a ni. Ka players te zinga mi panga paruk vel chauhin kan mamawh phurna leh huaisenna an tilang a, chak tur chuan players zawng zawngin huaisen taka an khelh vek a ngai. First half ah kan dawihzep em em a, he team ah hian ka lungawi lo a, kha aia ṭha kha ka beisei a ni. Ukraine pawh a tirah kha chuan an zâm ve hle a, team pahnihten tihsual kan ngah dun hle a nih kha. Kan khel ṭha lo a, a tawpa kan chance neih pathum goal ah kan chantir lo bawk.

“Kan beisei ang result kan hmuh loh avangin kan lawm lo a, kan insiamṭhat vat a ngai dawn a ni. Training naa tihtur leh sawi tur kan ngah hle.” a ti.

Coach ṭhenkhat chuan an players te fak pahin an nawrkal ṭhin a, Sweden coach erawhin ualau takin a players te a sawisel. Players ṭhenkhat chu sawisela khel ṭha sawt chi te an ni a, a ṭhen chu fak paha fuih ngai te an ni a, fak duh miah loa khel ṭha tawlh tawlh te pawh an awm. (Benitez-a’n Gerrard a fak duh miah loh chhan pawh hei hi a ni). Coach in a sawiselna hi Sweeden players ten an chak phah dawn nge dawn lo a chiang lo a, mahse thil chiang tak a awm – an khelh leh hunah Sweden players te an dawihzep tawh lo ang.

Sweden hian June ni 14 ah England an hmachhawn dawn a, an chak loh chuan an tla tawh ang.

source: telegraph.co.uk