Chelsea manager Roberto Di Matteo chuan striker ‘tak tak’ pahnih chauh nei mahse Premier League champion an inbeisei hle tih a sawi.

Chelsea fans ten Manchester United-a Robin van Persie luh thu an hre ve kiau a, United tlarhmaah Javier Hernandez, Wayne Rooney leh Danny Welbeck te nen hmun an inchuh dawn. Champion lai Manchester City pawhin Sergio Aguero, Mario Balotelli, Edin Dzeko leh Carlos Tevez an nei a, Liverpool leh Arsenal te pawhin striker thar an lei. Hetihlai hian Chelsea chuan Didier Drogba, Nicolas Anelka leh Romelu Lukaku (loan) te an chhuahtir a, Fernando Torres leh Daniel Sturridge te chiah striker pangngai an nei a ni.

Transfer season chhungin striker lalût tur angin report hrang hrang a awm a, Fernando Llorente aṭanga Edinson Cavani thlengin Chelsea nen sawizawm an ni. Mahse tun thlengin strike thar lei an la nei lo a, Pathianni zan dar 6 a Wigan Athletic nen an inkhelh hunah Di Matteo hian striker pahnih chauh hman tur nei dawn mahse a buai lem loh thu a sawi.

A vawikhatna atâna Champions League-a Chelsea champion puitu di Matteo chuan, “Tuna ka player neihah hian ka lungawi tâwk a ni. Position ṭhenkhat tihchak ngai kan neih thu ka lo sawi ṭhin a, mahse tunah chuan player ṭha tak tak kan lalût tawh a, anni ho hian goal an thun ang tih ka ring tlat a ni.

“Striker ṭha tak, goal thun thei pahnih kan nei a, season tharah hian an pet goal nual ang tih ka chiang. Fernando hian season bul a ṭan ṭha a, kar hmasa (Community Shield) ah pawh a pet goal a nih kha. Ani bakah hian midfield aṭanga goal thun thei Juan Mata, Oscar leh Eden Hazard an la awm bawk. Frank Lampard hian a pet goal thei hle tih kan hre vek a, season hmasa tâwplamah Ramires pawhin a thun nual. Midfielder goal thun thei tak tak kan nei a, ka striker te chauh lo pawh goal-a hlauhawm tak tak vek an ni.” a ti.

Player thar Oscar leh Eden Harzard te hian Chelsea-a an season khatna mai ni lo, Premier League-a an season hmasa ber an hmang dawn a, goal thun nual tura beisei an nih hian an chungah pressure a nasa lehzual thei. Hemi chungchanga zawhna chhangin Di Mattoe chuan, “Club lian ah an lo lût tawh a, Chelsea ang club lianah chuan beiseina a sâng a, manager leh player ṭhenkhatte chauh ni lovin, team pumpui hian pressure sâng tak kan hmachhawn reng a ni. Bul kan ṭan ṭhat a pawimawh dawn a, kan player tharte pawh awlsam taka an inbenbel a, an thiamna leh theihna tak tak an lantir theih nan ruahmanna kan siam dawn a ni.” a ti.

Midfielder ho hi chu an ngaihtuahawm loh a, Chelsea ropui leh ropui loh chu Fernando Torres ‘form’ ah thui tak a innghat thei awm e.

Chelsea fixture

August

18 Wigan (A)
25 Newcastle (H)

September

1 Reading (H)
15 QPR (A)
22 Stoke (H)
29 Arsenal (A)

October

6 Norwich (H)
20 Tottenham (A)
27 Man Utd (H)

November

3 Swansea (A)
10 Liverpool (H)
17 West Brom (A)
24 Man City (H)
28 Fulham (H)

December

1 West Ham (A)
8 Sunderland (A)
15 Southampton (H)
22 Aston Villa (H)
26 Norwich (A)
29 Everton (A)

January

1 QPR (H)
12 Stoke (A)
19 Arsenal (H)
29 Reading (A)

February

2 Newcastle (A)
9 Wigan (H)
23 Man City (A)

March

2 West Brom (H)
9 Fulham (A)
16 West Ham (H)
30 Southampton (A)

April

6 Sunderland (H)
13 Tottenham (H)
20 Liverpool (A)
27 Swansea (H)

May

4 Man Utd (A)
12 Aston Villa (A)
19 Everton (H)

source: fifa.com