Kareem-a tel loin Aizawl FC

Posted on by C Tlanthianghlima
Estimated read time 2 min read
Asia khawmualpuia club leh club inelna sang ber AFC Champions League play-off khel tur Aizawl FC chuan an defender pawimawh Kareem Omolaja tel loin Iran club tha Zobahan FC an hmachhawn a tul dawn. Aizawl FC hian Zobahan hmachhawn turin naktuk hian Aizawl an chhuahsan ang.

Vawiin tlaia Mohun Bagan an hmachhawn zawhah ZoFooty palaiin,” AFC Champions League a foreigner i chhawr tur pali te hming i sawi thei em?” tia Aizawl FC coach Paulo Meneses a zawh chuan,”Pathum chauh ka hruai ang. Andrei Ionescu, Masih Saighani leh Alfred Jaryan te an ni dawn a, Kareem hi a inhliam avangin thlak kan tum a, mahse kan thlakna tur hian visa a hmu hman ta lo a ni,” tiin Portuguese coach hian a sawi.

Kum 27 a upa Nigerian defender hi kar hmasaa NEROCA an hmachhawn tumin goal-a thunna lamah a inhliam a. Aizawl FC in Champions League khel tura a hming an lo pek luh tawh si avangin thlak leh thut theih a ni lo a, January ni 30 – a Champions League play-off khel turin a dam hman ta lo.

Zobahan FC hi Persian Gulf Pro League-a khel niin season hmasa khan palina an ni a, tunah hian league-ah pahnihna ni mekin kum 2010 khan AFC Champions League-ah pahnihna an lo ni tawh.

Aizawl FC hian Iranian club hi an hneh a nih chuan Group B-ah Al Duhail (Qatar), Al Wahda (UAE) leh PFC Lokomotiv (Uzbekistan) te nen an awmho dawn a, an chak lo a nih chuan AFC Cup an khel thung ang.

Avatar for C Tlanthianghlima
C Tlanthianghlima

Football tui ve tak

You May Also Like

More From Author

40Comments

Add yours

+ Leave a Comment