Admin: He Article hi facebook-a Mizo Manchester United Fans group-ah post a ni a. Manchester United fans ringawt chhiar atan chuan a uihawm em avangin amah Rinpuia chu ZoFooty a post turin kan ngen a. Ani’n phal takin a rawn post ta a ni. A chungah kan lawm takzet e. Hetiang ang article chhiar nuam hi amah leh midang atangin hmuh zel kan beisei tlat a, club dang fans te cho chhuaktu nise kan va ti em.

Man Utd ka lo tan chho dan leh Man Utd nen kan inkar hi han ‘Share’ ve hrim hrim che u ka chak tlat. Thenkhat tan chuan a ho viau mai thei a, thenkhat tan chuan a hlimawm mai thei bawk.

Tun hma :
Football Club ka hriat hmasak pawl chu Barca & AC Milan hi a ni a, mahse ka tan miah lo. Ka pa hnathawhna avangin naupan laiin thingtlangah kan awm a, TV en tur awm hek lo. Ka pa hian Radio a lei a, kartawp Inrinni zan hian Sport Week hi ka ngaithla thin a. Vawikhat chu EPL chungchang hi a rawn puanga, “Manchester United in hma anla hruai mek,” tiin, Tirhkoh Paula ‘Engin’ a chhun thluk chu a tluk kher awm lo ve, Manchester United tih ri chuan ka beng a verh mai a ni lova ka thinglung hi fei angin zu han chhun a! ‘Man’ tih chu ‘Mipa’. Chester engnge ka buai tlat, JF Dictionary ka en a chutiang a lo awm si lo. United- tih chuh ka pa ka zawt a, ‘tangrual/thawkho’ tihna a ti a. Ka zeldin kuala Man-Mipa, Chester-khua/veng, United-tangrual/thawkho… ‘khawkhat mipa tangrual’ tihna aniang ti chungin zan mut pah chuan ka ngaihtuah zuita a, kha zan kha ka tan chuan zan lungngaihthlak a ni ve tlat. Naupang ka ni a, mipa ka ni bawk……. Kha zan lungngaihthlak atang khan Manchester United tih chu ka thinlungah a ri tlut tlut mai a ni. A spelling ka pa ka zawt a min ziah saka, a tuk School kan kal leh chu hming thar ka nei, ka zirlaibu zawng zawngah hian Manchester United tih inziah lohna hi a awm lo.

Man Utd Inkhel ka en ve ta!! :
Ka sawi tawh ang khan thingtlangah kan awm a, Man Utd ka tan hle ti loh chuan an inkhel hi TV atangin ka hmu har khawp mai. Radio kha an chanchin ka hriatna chu a ni mai a, Khang hunlaia kartawp ka nghahhlel zia kha ‘Van ram’ ka ngaihtluk ang hi ani hrim hrim. Aizawl lamah ka pa an sawn chhova, kan veng/khua a kan awm leh ta a, kum 1996 kha nita in ka hria, kan thenawm ten TV thar an nei a, mahse Star kan khuaah ala awm ve lo tlat. Bangladesh lamah a chhuak thin tih kan hria a, mahse zanah naupang nu leh pan len chhuah an phal lo. Heng hun lai zawng zawng pawh hian Manchester United bak club tan ka nei chuang lo, ‘Mipa tangrual’ tih lai khan ka rilru a luah hneh tlat.

Vanneihna ka hmaah a lo awm ve ta reng mai, Soil Office C/O rawn awmten TV & star an rawn nei thar a, chuta an fapain kawm tur a neilo, kan in kawm chhova, tuk khat chu ESPN-ah ngei mai 1996 August thla ka la hrechiang khawp mai, Man Utd leh Wimbledon inkhel replay ka enfu hlauh mai kha chu aw… Ka lawm lutuk leh hlim lutuk kha chu (Kha tilaia ka awm dawn kha hralh dawn ila, Nuai 30 pawn ka phal lo J) Beckham an Half-way atanga a pet Goal etc. sawi tur a tam awm e. Tichuan thenawmte pawn Star-te an pawt a, EPL chu kan en ve ta zauh zauh a, helai chinah hian duh tawk tiang.

Man Utd Jersey ka nei ve ta !!!

An Jersey ka awh zia leh neive tuma ka beihnate kha sawi chhuah ka va chak em. Ka thian ten an tante club jersey an neih deuh vek avangin kei pawh ka pan min khawngaiha, ‘Thla thar hlawh lak ve leh ka leisak ve ang che,’ a tih tuma ka lawmzia kha, Bialnu ten ‘ka hmangaih che’ antih ai pawn ka lawm zawk!!! Man Utd Jersey lei tura kan kal zet kha chu Krismas kawr lei tur aipawn ka phur zawk tla. Bazarah kan en kual, a sen ang a lo awm lo, ka beidawn zia chu! Chutah beidawn tawh lamah Foreign Lane hnuaiah ‘SHARP’ tih inziak kan hmu zet kha chu! Ka chhandamtu hmu ni maiin ka inhria! Mahse a sen lo tlat, a pawl a ni, hmun dang kan en vek tawh, a sen a awm lo, lungthu chu a kim lo, mahse ka Man Utd Jersey hak a hun tawh. Ka ha chhin a lo chhing deuh, dawr neitu ten, ’thla tharah a dang a lo thleng leh dawn a lo nghak mai la’ an ti, mahse kei chuan ka nghak theih tawh lo, tlaia High School kawtah Man Utd Jersey hain ‘ka Pet Goal ngei mgei a ngai tawh’ tih bak ka ngaihtuah tawh lo. A hmaah Man Utd Logo chiang takin a awm a, ‘SHARP’ tih a inziak ka va lungawi tak em !

Manchester United tan Ka tawngtai :
Thenawmte zarah inkhel kan en regular ve ta a, kum 1999 hemi kum hi kei chuan ka theihnghilh thei lo, Man Utd tan chuan zual lam a pan deuh deuh a, EPL an champion dan, F.A. Cup sawi vek a chakawm, UCL (UCL hi kum 1997 atangin ka en ve tan) bik lo sawi ila, Man Utd in Triple champion-na tur kawng an zawh zel thu chu chanchinbu, Radio & Tv etc. boruak khan min luah hneh lutuk. Kei pawh naupang chhia e ti lo chuan, S.S. Zirtirtu ten min zirtir thin angin, ‘engkim Pathian hnenah dil rawh u,’ an tih hre rengin Man Utd an champion theihnan leh club dang ten an tluk lo nan ka va tawngtai na sa em!!. Kai tawi mai tiang, Juventus an lehthal tuma ka tawngtai nasat zia te kha, Final-ah Bayern Munich nen an intum Mns 12 nitain ka hria Effenberg?? In a pet goal an sut lawk thei silo, inkhel ka en aiin ka maimichhin (tawngtai) atam zawk tlat hemi tum hi chuan. A tawpah erawh chuan ka hlim leh si, Sawi tur atam lutuk duh tawk leh tiang. E taka Alex Ferguson ‘Sir’ ninhna an pek avanga, a tuk tlaia sa kan hmeh chhan kha tun thlengin ka la hre miah lo J

Man Utd tan ka inhlawhfa :
TV nei lo na na chu, duh hun hunah en ve theih hek suh, engtin nge Man Utd chanchin ka hriat zual zel theih ang? Ka nu hian inrinni apiang hian Bazarah Pangpar a zuar thin a, kan venga tlangval pakhatin Sport lam ziahna Magazine AIZAWLah lei tur a awm tih thu a sawi ka hria a, Man Utd chanchin hriat zual zel chu ka duhthusam alo ni bawk nen, tihdan kawng ka zawngta! Doordarshan khampang thlanglam, Leitan–Bawngkawn Road- kawng chhakah hian, Hnim par pangpar tawn pawlh tur zawngin zirtawpni tlai apiangin school ban ve leh ka vai thin a, Muthi lamah zirtawpni zingah Rose lain, ke in ka kal thin bawk a, heng atang hian Rs 20 lawmman atan ka nuin min pe ve thin. Ka hlawh atang chuan Sport Magazine chu ka nuin min rawn leisak thin a, ka nghakhlel thin khawp mai. Man Utd chanchin an ziah tuma, ka hlim zia leh an chanchin an ziah mang lova ka tah teuh ziate kha!! Tichuan JF Dictionary nen tangkawpin kan chhiar ve thin kha a nia, tun lai angin Internet awm hek lo…..

Heng bakah hian kan inchawi dan, EPL Style, Man Utd Players hming kan inchuh dan etc in duh chuan remchangah tih zel kan tum dawn nia.