Keimahni

ZoFooty.com hi “Football tuimite Khelmual” tih a ni deuh kher a, internet hmanga football khelhna hmunpui a ni.

A chanchin tawi han sawi ila:

Mizo football website/blog hmasa ber ni turin ZoFooty.com hi 2011 February thla khan zofooty.blogspot.com tihin siam a ni a. Post hmasa ber hi February ni 8, 2011 khan siam a ni.

Hemi hnu rei vak lovah domain lei a ni a, February ni 24, 2011 khan zofooty.blogspot.com chu zofooty.com-a tia thlak a ni.
Thla nga chhung vel mumal taka kal pui anih tawh hnuah website design thar te siam a ni chho zel a. Official taka website thar hi hawn a tha kan tih tlan avangin July ni 9, 2012 khan Pu S.Malsawmtluanga (Mama) chuan min hawn sak a ni.
Kan hriat tur chu ZoFooty bday (dincham) tak hi chu February ni 8 a ni. Website leh facebook page chauh kan nei a, kan website chu kan hriat angin ZoFooty.com tih a ni a, facebook page hi facebook.com/ZoFooty a ni a, min lo tlawhsak a, page min lo like sak turin ka sawm vek che u a ni.
Thil pakhat kan zeh tel hram duh chu, ZoFooty.com hian Facebook group leh watsapp group kan siam lova, kan nei lo a ni. Mahse innei em ni tiin zawhna kan dawng fova, hei hi kan chhanna chu a ni. Thil reng reng chu a original awm laia a suak (a duplicate) a lo awm ve chiah hian a buaithlak zo thin a ni.
ZoFooty.com -ah hian Adminstrator, author, ambassador leh statistician tihin kan ni thin a, chhiatni thatniah kan intawiawm ve thin a ni. Administrator leh author ten page leh website kan enkawl a. Tin, MPL awm tirh atangin ZoFooty.com hian statistics kan la buatsaih thei ziah a, a hranpain statistician kan nei bawk a ni.

Zofooty Award :
September 27, 2012 khan Mizorama football awards semna hmasa ber ni turin ZoFooty Awards 2012 chu Silver Moon, Aizawl-ah neih a ni a. Player of the Year leh Coach of the Year chauh la thlan niin Player of the Year –ah David Lalrinmuana, Aizawl FC thlan a ni a, Coach of the Year –ah HC Zarzoliana, Dinthar FC thlan a ni thung.

July 16, 2013 Thawlehni zan khan Hotel Regency-ah Samsung 3:16 sponsor-in ZoFooty Awards sem leh a ni a. Mizoram Premier League-a Dinthar FC champion puitu HC Zarzoliana leh R. Laldanmawia ten Coach of the Year leh Player of the Year lawmman an dawng a, Coach Zara hian a zawnin Award hi a dawng nghe nghe. Hemi tum hian Young Player of the Year category chu telh belh niin MPL U-17 a Chanmari FC champion puitu Jerry Mawihmingthanga chu Young Player of the Year hmasa bera thlan a ni.

August 12 , 2014 zan khan Samsung 3:16 sponsor sponsor bawkin ZoFooty Awards 2014 hi Hotel Regency-ah sem a ni leh a, MPL Champion Chanmari FC-in award an hui fai vek a ni.

MPL-a best player R. Malsawmtluanga chu Player of the Year a thlan a ni a, Young Player of the Year-ah Chanmari FC naupang kawlhrawng tia hriat lar, Jerry Mawihmingthanga chu a vawihnihna atan thlan niin Chanmari FC coach H. Vanlalthlanga chu a vawikhatna atan Coach of the Year-ah thlan a ni.

 

JUly 28, 2015 khan a vawi lina atan Zofooty Award sem leh a ni a, Young player of the Year ah Lalthakima, Aizawl FC chu thlan a ni a, Coach of the Year ah K. Malsawmkima, Aizawl FC chu thlan ni in David Lalrinmuana, Aizawl FC chuan Player of the Year tum hnihna atan a dawng bawk. Aizawl FC lamin Awards an hui fal ta vek a ni.