KHA GOAL KHA

Mualpuia ruahsur hnuaia inkhel en mipui sang rual chu an ding suau a, thawm chitinin a zui bawk. Minute 83-naa Mahmoud Al-Amna ke atanga ball chhuak chu Zohmingliana Ralte – in Mohun Bagan goal – ah a tauh lut !
 
I-League champion leh champion loh hriltu inkhel pawimawh kha kan la hre theuh ang a, Mizoram leh a bik takin Aizawl FC chanchinah April ni 22,2017 kha theihnghilh theih a ni lo a, goal thuntu Zotea pawhin a dam chhungin a hre reng tawh ang. He inkhela an chak avang hian Aizawl FC khan Bagan kha point 3 a lehpelin Shillong khawpuiah nomawi an chawi zui a nih kha.
 
Inkhelh zawhah Bagan coach Sanjoy Sen -a’n a vanduai zawka an tan thu a pawm a, Aizawl FC player – te leh Mizo mipuite a fak bawk.
 
Khatih laia Aizawl FC coach Khalid Jamil erawh a la ‘cool’ reng a, point thum an hmu thei chu a naute a fak. “Aizawl FC ka enkawl hma hian an player te hi hriat ka nei mang lo a, ka beisei phak bakin kan che tha a, ka nau te hi ka chhuang a ni,” a ti thlawt !
 
Kha inkhela goal awm chhun thuntu Ramhlun South tlangval Zotea hian hemi season I-League – ah hian Aizawl FC tan minute zawng zawng a khel kim vek. Mizo footballer te zinga daih rei ber zinga mi niin Mohun Bagan academy – ah bultanin Mizoram Police – ah te a han khel leh zawk a, a hnu deuhah Shillong khawpuia club hrang hrangah a khel zui.
 
Lajong tan hmingchher chhoin I-League club Pune FC leh DSK Shivajians bakah Northeast United, Bengaluru FC leh Chennaiyin FC tan a khel tawh. Zotea hi defender mah nise goal pawimawh thun thei tak a ni a, 2014 AFC Cup ah khan Hong Kong club tha Kitchee SC lakah goal hnih thunin Pune FC a lo chak pui tawh bawk.
 
Hmanni lawk emaw kan tih kha kum thum a lo vei der tawh a, kum engzat pawh ral leh mahse ‘kha goal kha’ theihnghilh a ni tawh lo ang.