Denmark midfielder, Premier League-ah pawh hun rei tak kan lo hmuh tawh, player nungchang leh discipline tha Christian Eriksen chuan a tum aia hmain Professional Football a chawlhsan a lo tul dawn ta niin a lang a, khawl puihna nen a nun a hmang dawn ta a ni.
Kan hriat angin, Euro-a an match hmasa berah Finland nen an inkhelh laiin, first half tawp dawn hnaiah Eriksen hi Cardiac Arrest vangin mualah a tlu a, thihna lui a dai kai mai dawn emaw tia khawvelin mittui nen a thlir laiin, khawvel ram tina tawngtaina chu chhanin a awm a, CPR hmanga a nun chhanhim a nih hnuah Rigshospitalet Hospital panpui a ni a, a awm chhunga defibrillator fit (Pacemaker vuah a ni mai awm e) a nih hnuah, damdawiin atangin a chhuak ta.
Eriksen hian Helsinger-a inkulh Denmark Team a tlawh phawt a, chumi hnuah In lamah a haw ta a ni.
Eriksen nunna chhantu ber anga ngaih theih, Finland nena an inkhel lo en ve tu German Doctor Kleinfeld chuan, “A hma lawkin Touchline Medical Team te training ka neih pui a, hun remchang a awm tak avangin inkhel kha a hmunah ka en zui ve ta a ni.
“Eriksen a tlukna opposite atang khan inkhel ka lo en ve a, a tluk tirh khan hlauhthawnna em em ka lo nei lo va. Mahse, thil awm dan ka en khan a serious tih ka hriat avangin, ka thawhpuite ka bia a, kan tlan lut ve ta tawp mai a ni.
“Ka va thlen khan an enkawl dan kha a fuh tawk lo tih ka hria a. Team Doctor te hi an tha em em a; mahse, an hna tam ber chu inhliam pangngai enkawl a nih avangin Lung lam buaina lo awm thut ang chi ah chuan tawn hriat an nei tam thei lo va, an demawm loh.
“Ka thlen veleh mawhphurhna ka la nghal a, heart massage bakah Electric-in kan shock bawk a, bei a dawn chhoh lek lek laiin Eriksen a rawn meng diar diar a, ‘I lo kir leh dawn em?’ tia ka zawhna, ‘Tehreng mai, kum 29 chauh alawm ka la nih,’ tia min chhanna thu hriat lawmawmzia kha!
“Engkim a tha vek a, a dinhmun pawh a hlauhawm tawh loh tih ka hrilh zui a, damdawiin lam panpui a ni ta a ni,” a ti.
Kum 29 chauh la niin, khelmualah kir leh chak viau mah se, chawl lo thei lo dinhmunah a ding ta niin a lang.
