KHAWVELA FOOTBALLER HAUSABER FAIQ BOLKIAH ! – Ema Ralte

Faiq hi engtia hausa nge ?
Foxes striker kum 19 mi Bolkiah hi Brunei lal chhungkua zinga mi niin tuna Sultan of Brunei (Brunei lal) Hassanal Bolkiah hi Faiq-a pa Jefri Bolkiah u a ni a, Faiq-a hausakna hi a hlutna an teh danah chuan $20bn (dollar tluklehdingawn 20) zet mai a ni.

Marca chanchinbu in an ziah danin Faiq-a pa Jefri hian car 2300 lai a nei a, a kum 50 tlin a lawmna party ah ringawt pawh €14m (Euro maktaduai 14) hmangin he a birthday lawmnaah hian Michael Jackson chu a concert tir nghe nghe a ni.

A hausakna teh chhin ang aw
Faiq-a hausakna hlutzawng hi $20bn a ni tih kan tarlang tawh a, hei hi engtiang chiaha tam nge tih hetiang hian i han chhut teh ang.

Khawvela footballer hausaber a Forbes in 2017 a an tarlan chu Cristiano Ronaldo a ni a, ani hi a hlutna ni a an sawi chu $350m bawr vel a ni. $350m hi billion (tluklehdingawn) a kan leh (convert) chuan 0.35bn a ni a, billion 1 a tlin lohna hi $650m (dollar maktaduai 650) a ni.

Hetiang a nih chuan Faiq-a hausakna ni a an sawi $20bn hi Cristiano hausakna lêt 572 bawr vel a ni!

Faiq-a football zinkawng
Prince Faiq-a hi Los Angeles, US a piang niin kum 2009 khan Southampton chuan Brunei-ah trial an hawng a, chutah chuan Faiq hian trial a nei ve a, mahse Saints hian contract an pe thei lo a.

Kum 2013 khan Arsenal chuan trial nei turin an ko ve leh a, hetah hian trial a neih chhungin Arsenal tan Lion City Cup 2013 ah a inlan a, goal pawh a khung nghe nghe a. Mahse Gunners pawh hian an lalut ta chuang lo a.

Hemi hnu hian Chelsea chuan kum 2 daih contract an zawrh a, hei hi pawmin Faiq chuan Blues a zawm a. Mahse Blues a kum khat a khel chauh tihah Leicester City chuan contract tha zawk an zawrh avangin Foxes chu a zawm ta a, kum 3 daih contract a ziak a ni.

Faiq-a hian US a piang leh seilian ni mahse an ram Brunei tana khelh a thlang a, Brunei tan vawi 9 inlan ve tawhin goal 1 a khung tawh a ni.