Tottenham leh England kulhpui zinga mi rinawm tlemte zing ami Ledley King chuan football a chawlhsan thu a puang ta. A khup na a dam hleihtheih loh vangin kum 31 a upa hian a ball boot chu khai mai a tum thu a puang ta a, kum 2008 a Chelsea an hneha League Cup an chawi kha a chanchin sawi apiangin telh a ni ziah tawh ang a, ram tan vawi 21 lai a inlan tawh bawk a ni. Spurs tan hian vawi 323 a inlan tawh a, goal 14 a khung tawh bawk

Kum 17 lai Spurs tana khel King-a hi England center-back ṭha ber pawl a ni a, mahse a khup na vangin duhthusamin a khel hleithei tawh lova, Tottenham Club-te’n a vawikhatna atana 2009-10 season a Champions League an khelh theihna tur atan khan thawhlawk ber pawl a ni bawk. Spurs Website-a thuchhuah a siamah chuan ti hian a sawi a, “Naupang ka nih lai aṭang tawhin hetah hian ka awm tawh a, ka club liau liauah ka ngai a, team dang jersey ha tura insuangtuah ringawt pawh harsa ka ti ṭhin, tunlaiah chuan ṭhatlai hun zawng zawng club khata hmang zo ṭhak an awm mang tawh lova, mahse kei chuan nuam ka ti a, a ṭhatna tur ang bera chawichhuah hi nuam ka ti zawk a ti a, Club leh a ṭantu zawng zawngte chungah lawmthu ka sawi duh a, Spurs fans-te’n harsatna ka tawh laia min ṭawiawm ṭhinna avangin lawmthu ka sawi bawk a, ka hliam a dam theih loh vangin ka inpuahchah thei lova, chuvang chuan ka chawlhsan a ngai ta a ni”, a ti.

Tottenham Chairman Daniel Levy chuan King chu White Hart Lane a a theihna zawng zawng a hlan ṭhin avangin a fak a, player leh captain angin a hma chuan field chhungah a chetla ṭhin a, tunah chuan Ambassador angin a awm tawh tur thu a puang nghal a ni.

Spurs hian 2012-13 season chawhnu lamah King-a tan hian White Hart Lane-ah Testimonal a buatsaih dawn a ni.