Arsenal player ropui a ni a, goal 226 a khung tawh. Kum 34 a ni tawh a, Arsenal-ah first-team a chang thei tawh lovang. Mahse African Cup of Nations khelin Arsenal hian Chamakh leh Gervinho an chhuah a, chutih lai chuan an player ropui hlui Thierry Henry hi MLS chawlh lai a nih avangin loan-in an chhawr thei hlauh a. Mi tam takin, “A tangkai tawh ngut dawn em ni?” tia zawhna an neih mek chu rei rial lovin, Arsenal tana a inkhelh lehna hmasa ber, FA Cup round 3-naah Leeds United lakah goal a khung a, chu chu Arsenal-in an chakpui. Henry hian Arsenal tân goal 227 a khung ta.

He inkhelah hian Arsenal hmatâwngten Leeds defender te an suhawng thei mai bik lova, Leeds keeper chetṭhat ni a lo ni ve bawk nen, hunrei tak chu goal lut lovin an inkhel a ni. Mahse Arsenal substitute bench-ah hian Arsenal striker ropui a awm a, Arsenal in goal an mamawh huna chhang ṭhintu, hun harsa-a chakpui ṭhintu a nihna a la dang lo. Arsene Wenger leh Arsenal in game harsa an hmachhawnin Thierry Henry hi chakpui turin an beisei ṭhin a, Thawhṭanni zanah manager leh fans te beiseina chhânin a awm leh ta.

Mi tam tak bakah amah ngei pawhin hetianga goal a khung nghal mai hi an ring lova, chakna goal a ni lehnghal a, Henry a lawm ngei mai.”A mak lutuk. Arsenal tan hian ka khel leh ang tih ka ngaihtuah ngai lova, chakna goal khungte phei chu ka ngaihtuah phak lo nasa,” a ti a, “He club hi ka hmangaih a, tanpui ka duh a ni,” a ti.

Henry chuan, “Ni 15 kalta khan Mexico atangin ka lo let chauh a, he hmunah hian hero ni turin ka lo lut lo reng reng. Mahse chakna goal ka khung ta mai a, awmngaihna pawh ka hre lo. Engpawh nise, a tawpna a nih loh hram ka beisei,” a ti a. “Hun remchang ka hmuh ka hmang tangkai thei kha ka lawm a, a chhan chu remchang dang ka hmu tawh lo maithei si a,” a ti bawk.
Henry hian Leeds an hnehna goal hi minute 78-naah a khung a, Alex Song-a ball pek tha zet chu lain, Leeds defender pakhat a bum a, a ke dinglamin goal kil sirah a khung a ni.

Goal a khung ve leh hian Arsene Wenger-a lamah a tlan phei a, an va inkuah ngawih ngawih a. Arsenal fans an sapatal a, hmeichhia leh mipa (tlema zawng) ten ‘flying kiss’ an pe a, Emirates stadium a boruak ngei mai.

Wenger chuan, “Inlan vawihnihna atana duthusam a ni e. Arsenal tan player ropui a ni tawh a, zaninah hian chanchin lawmawm dang a neih belh leh ta a ni. Player tha bik a ni a, khelh ṭhat duhna thinlung a nei reng a, hetiang hi champion-te zia a ni. Mite beisei dan tur a hre reng a, lo let leh a, chhe taka khelh a hreh hle a ni. Field-a a luh dawn khan engmah ka hrilh lem lo, engkim a ti tawh a, hrilh belh a ngai tawh lo,” tiin Henry a fak.