Post hmasa lama kan hmuh tawh angin Premier League chuan season 20 a upa a tlin denchhenin kum 20 kalta chhunga Premier League-a thil chhinchhiahtlak bikte thlang chhuakin award hrang hrang a siam a. Mipui vote theih turin an chhawpchhuah a. ZoFooty-ah pawh a link te kan dah a, ZoFooties te paw’n kan vote ve anih kha.

Kum 20 chhunga Premier League-a goal mawi ber chu Wayne Rooney-a’n 2010-2011 season-a Manchester City lama a overhead/bicycle kick goal kha a ni. Kha goal kha a mawiin an chakna goal a ni nghe nghe. Nikum February ami anih avangin kan en furin ka ring.

Rooney hian vote tla zawng zawng atang 26% vote a hmu a. Dennis Bergkamp chuan 19% hmuin Thierry Henry chuan 15% a hmu bawk a ni. Dennis Bergkamp goal hi March 2002 ami kha niin mawi lutuka Newcastle defender a bum hnua a pet goal kha a ni a. Thierry Henry goal hi chu September 2000-a Manchester United lama mawi taka a volley luh kha a ni.

Rooney chuan “Premier League ena seilian ka ni a, chuvang chuan hetianga min thlang hi ka tan chuan a hlu zual em em a ni” a ti a. “Tin, shortlist-ah khan goal thun mawi leh nalh tak tak a awm nual a. Ka naupan laia ka en hman leh mawi ka tih te chu Alan Shearer, Paulo Di Canio, Tony Yeboah leh David Beckham-a te goal thun kha a ni. Heng ho nena min khaikhin hi ka lawm a, chu aia lawmawm chu heng ho zawng zawng aia ka goal thun min thlan tlin sak hi a ni. Min vote tu te zawng zawng chungah lawmthu ka sawi duh a ni” a ti bawk.

Fans 3,00,000 chuang teh meuhvin vote hi an thlak a. Best goal bakah hian category dang best – match, save, goal celebration leh Fantasy team of the 20 seasons te thlan a ni bawk a. Panel category pawh a awm a. Best player, manager, team, season, most memorable quote leh fantasy team of the 20 seasons te an ni.

Award hi May 15-ah sem tur a ni a. Hetah hian result dang te pawh puan a ni ang. David Beckham chuan kum 10 chhunga goal mawi ber a lo dawng tawh a. He goal hi August 1996-a Wimbledon lama centre (half way line) bul atanga a thun kha a ni.