Kum 2017 chhunga lehkhabu tha zual zingah ‘Savun Hampuar’

Indian football webite lian leh lar khelnow.com in kum 2017 chhunga Indian football chanchin ziahna lehkhabu tha zual panga an thlan zingah John Zothansanga ziah ‘Savun Hampuar: The Mizoram football story’ tih chu a tel.

Vanglaini sports columnist John-a lehkhabu hi kumin September ni 29 khan tlangzarh a ni a, saptawnga ziah niin he lehkhabuah hian Mizoram Premier League chanchin te, Aizawl FC in I-League an chawi dan ngaihnawm tak bakah Mizoram football chanchin ziah a ni.

Zofooty.com in Kolasib tlangval hi be pawp nghalin,” Ka beisei lo, sum leh chawimawina beiseia ziak pawh ka ni chiah lo. Ka lehkhabu thuhmaa ka ziah tawh angin sports journalism ka luhchilh ve hnua ka vei ber chu football a kan hmasawn dan chungchang, hnamdang tam takin an ngaihven ni si, saptawnga chhiar tur a awm lo kha ka tlawmngai ve em em a, chuvang chuan ka thiam lo tih inhre reng chungin ka ziak. Thil dang ka beisei lo,” tiin lehkhabu tha thlan chhuah zinga a tel chu a inbeisei loh thu leh Savun Hampuar chu Mizoram football tan liau liau a ziak a nih thu a sawi.

“Mizoram football hi kei aia luhchilh thui zawk an tam a, MPL in kan hlawhtlinna kawnga role a play dan lah a chiang vek a, sawibelh tur em em ka nei lo. ISL leh I-League hmasawn dan enin Indian football hmabak pawh hi a eng ka ti,” tiin football-ah hma kan sawn zel a rin thu a sawi bawk.

Sawi hmaih phal hauh loh tur chu lehkhabu panga thlanchhuah zinga pahnih hi Mizoram football ziahna a ni a, football journalist Chiranjit Ojha hi Aizawlah a lo kal fo tawh a, a lehkhabu ‘Rise above the Clouds’ tih hi Aizawl FC chanchin a ziahna a ni.

Anni pahnih bakah hian Times of India Sports Editor Marcus Mergulhao a ziah ‘Golden Eagles : 50 Years of Dempo Sports Club’ tih te, Indian football mi ropui tling pha Novy Kapadia ziah ‘Barefoot to Boots: The many lives of Indian football’ tih leh India coach ni lai Stephen Constantine-a’n ama chanchin a ziahna ‘From Delhi to the Den: Story of football’s most travelled coach’ tih chu thlan chhuah zinga mi an ni.

Posted in Mizoram, Ramchhung, Tualchhung.

Leave a Reply

Or