Kum 8 kalta khân…

“Kan manager chu club in an bân a. An bân chhana mawhphurtu a kan inngaih deuh avangin playerte kan inko khawm a. Captain John Terry, Frank Lampard, Petr Cech leh club chhunga player khel rei tawhten thusawina an nei a.

“Napoli lakah 4-1 in tlâwm mah ila he intihsiakna (Champions League) ah hian theihtawp chhuah turin thutlukna kan siam a. Kum 8 chhûng he nomawi hi chawi tumin kan tlân tawh a, mahse kan thlen thui theih berah pahnihna kan ni a. Chumi avang chuan tute pawhin kan mihring mihrinna ṭheuh dahṭha in he nomawi chawi tumin beih kan intiam a ni.

“Kan ṭhutkhawmna kan zawh hnu chuan kum 23 mi Juan Mata bulah chuan, ‘Khawngaihin Maestro, he Champions League nomawi hi ka chawi theihna turin min pui rawh,’ ka ti a. Ani chuan, ‘A â em ni, Didier Drogba i ni a, he nomawi ka chawi theihna tur hian min pui zawk ang chu,’ ti niawm tak hian min en a. Mata hnenah chuan, ‘Chelsea ah kum 8 ka lo khel tawh a, mahse Champions League ah hian kan la champion miah lo va. Chuvang chuan nangmah hian he nomawi kan chawi theihna tur hian min pui dawnin ka hre tlat. Kan champion a nih chuan thilpêk ka pe ang che,’ ka ti a. He thil ka sawi lai hi February thla tâwp a ni.

“Thla 3 a ral hnu chuan Champions League final khel turin Munich ah, anmahni khelmuala Bayern Munich hmachhawn turin kan awm ta a. Kawr sen hi stadium chhungah a tlêp tuar mai a. Stadium neitute chuan inkhel tawp hma minute 8 ah an hmahruaina tur goal an khung a. Chutia minute 8 chauh a awm tawh tiha ball ka thah dawn chuan Juan Mata chuan, ‘Didi ring rawh, i rin a ngai’ a rawn ti a. Chutia min rawn biak lai chuan hun intarlanna chu ka en a, mittui tla deuh pûr chung chuan, ‘Engnge ka rin ang? A zawh ṭep tawh hi,’ ka ti a.

“Thla tlêmte liamta a final a kan ram Ivory Coast hnehna ka chan pui zawh loh ṭum ang mai khân ka ṭap leh dawnin ka inhria a. Hun tawp hma minute tlêmte chiah a awm tihin inkhel chhung zawnga corner kan hmuh hmasak ber kan hmu a, Bayern Munich chuan vawi 18 lai corner an hmu tawh a. Corner chu Juan Mata ngêi mai chuan pêtin hemi hnu zawng hi chu kumkhua a dai tawh ngai tawh lo tur thil thlengin a chhunzawm ta a ni.

“Zirlai pawimawh êm êm ni reng chu RING TLAT CHUNGA THIL TIH HI A NI.”

– Didier Drogba

2011-12 season Champions League finalah khân Bayern Munich in minute 87-na thleng hma an hruai a. Minute 88-na ah Juan Mata corner pêt chu Didier Drogba chuan tauh lutin extra time khelh chhunza a ni a, extra time ah goal a luh loh avangin penalty shootout hmangin a chak zâwk zawn a ni a. Hetah hian Chelsea chu 4-3 a chakin an club chanchina vawikhatna atan Champions League a chawi ta a ni.

He inkhelah hian Didier Drogba hi Man of the Match a thlan a ni zui nghe nghe.

Nimin kha Chelsea in UCL nomawi an chawi ni aṭanga kum 8-na chiah a ni.