Kum tharah Mizo tlangval tan chona – Zara

Gokulam-ah Dampuia
Chhinga Veng champion puitu zinga mi Laldampuia’n jersey no. 32 hain Gokulam tan bul a rawn tan a, bench-ah Chanmari FC-a inziak lut tawh Lalramengmawia (Lalmama) hming a rawn lang bawk.

Dampuia hian Kerala club hi a zawm tlai a, AFC hmaa an hmachawn East Bengal nen squad-ah awm tanin minute 74-naah a khelmualah a inlan a. Kawrtethawgveng tlangval inlan hian Gokulam hi player 10-a an khelh tawh a, goal khat an phur tawh a, 1-0 in inkhel hi a tawp.

Aizawl FC hmaah Dampuia hi a khel chhe lo a, Kerala lamin defensive game an khelh bawk avangin ball tha a hmu tam hman lo. Minute 31-naah a lakchhuah a ni a, coach Bino George thutlukna a mak hle. Dampuia awm loh hnuah Gokulam-in goal hnih an chhuah a, amahrawhchu Mizo tlangval hei hi lawmna tur a ni lo – Kerala club-a hming chher pha turin a tan sauh a tul dawn a ni.

Lalmama erawh kum lamah a la naupang deuh a, amaherawhchu a pumrua a len avangin hmabak a la nei êng viau tura ngaih a ni.

Dinlian, tan a la ngai
Rinlawk ang ngeiin R. Laldinliana’n Aizawl FC kawr hain bul a rawn tan leh a, RG Stadium ang thoin Kozhikode (Calicut)-ah pawh a khel tha hle.

Amaherawhchu MPL6 best defender Dinliana hi Lammualah lang lian thin mah se Star Sports-ah pawh HD meuha han belh chian chuan India ram football-a langsar tur chuan ‘gym’ lamah tan a lak a tul dawn. Pian pui chakna a nei tih chu zep rual a ni lo a, hemi kawngah hian India team inghahna Jeje Lalpekhlua entawn tur a awm. Hnathial tlangval Jeje hi Indian Arrows tana a khelh lai leh tuna Chennaiyin tana a khelh hnua a taksa inphut dan chu a dang tawh a, pianpui bakah gym lama siam a ni tih a hmuh theih.

AFC left back Lalramhmunmawia erawh Lammualah pawh a lang lian lo a, chutihrualin inkhelh a thiam avangin I League-ah pawh a zahpuiawm lo hle. Tea tan pawh a dang chuang lo, tun aia thui thlen a tum a nih chuan a taksa a tih len chhoh a tul dawn a ni.

ZoFooty chuan Mizo tlangval te hlawhtling zel turin a duh a, ngaihdan tawmpui leh tawmpui lem lo tan comment lamah chhunzawm theih a ni. Kum thar chibai vek ule.