Barcelona in an coach thar Tito Vilanova hnuaiah an chak nghal a, an chak satliah lova. An mikhual Real Sociedad chu 5-1 ngawtin an hneh a ni. He inkhel-ah hian Barcelona tan Carles Puyol (4′), Lionel Messi (11′, 16′), Pedro (41′) leh David Villa (84′) ten goal an thun a. Real Sociedad tan Chory Castro-a’n (9′) goal khat a thun ve bawk.

Champion lai Real Madrid erawhin bul an tan tha tawk lova. ‘The Special one’ atanga ‘the only one’ nia inchhal thar Jose Mourinho kaihhruaina hnuaiah Valencia an draw an ni. Real Madrid hian an home Estadio Santiago Barnabeu a entu 78000 hmaah Gonzalo Higuan hmangin minute 10 lekah hma hruai mahse Valencia tan minute 42 naah Jonas-a’n a rawn thun leh si avangin an in draw ta a ni.

Barcelona 5-1 Real Sociedad
(Carles Puyol 4;Lionel Messi 11′, 16′;Pedro 41′; David Villa 84′)-(Chory Castro 9′)

Tute nge khel?
BARCA LINEUP: (4-3-3)
Valdes; Alves, Puyol, Mascherano, Alba; Busquets, Xavi, Fabregas; Tello, Messi, Pedro
Bench: Pinto, Roberto, Pique, Adriano, Iniesta, Sanchez, Villa

SOCIEDAD LINEUP: (4-3-3)
Bravo; Estrada, Ansotegui, Gonzalez, De la Bella; Elustondo, Bergara, Illarramendi; Prieto, Castro, Griezmann
Bench: Zubikarai, Angel, Ros, Pardo, Cadamuro, Agirretxe, Vela

Vilanova hun a thleng ta!
Pep Guardiola-a’n Barca team game ropui a khel a khel pui thin a, a thlaktu Vilanova pawh a dang chuang lo. Amaherawchu an player hman dun dan erawh a dang a tih theih. Season hmasa lama an player pawimawh leh Euro 2012 Best Player ni bawk Andreas Iniesta leh Alexis Sanchez chu bench-ah bul an tan a, an aiah Christian Tello leh Pedro te a hmang thung a. Lionel Messi tana hmun a la awm ang bawkin, €14 million a an lei thar Jordi Alba tan hmun a awm bawk.

First Half-ah Goal a sur
Goal luhnan minute tam a ngai lova, minute li lekah Xavi corner pet chu Puyol-a’n a tauh lut nghal a.
Amaherawchu Real Sociedad an talbuai mai bik lova, Asier Illarramendi ball fing tak chu Castro chuan goal-ah a chantir thung.
Real Sociedad ai maha la talbuai lo chu Barcelona team a ni a, chu team chuan Lionel Messi an nei bawk. Tello ball cross chu Messi chuan lo control sual mahse a ball per chu Pedro chuan Messi a pe let leh a. Annin tihsual tawh lovin Barca goal thumna a lo thun a. Messi hian minute 16 naah Tello cross chu goal a lo chantir bawk.
Barca in game mawi tak an khelh chhunzawm zel a, defending lam chu an buaipui a ngai meuh lo. Minute 41 naah Tello bawk a rawn lang a, a ball cross atangin Pedro-a’n a lo thun a. First half-ah goal dang a luh belh tawh lo.

Second Half-ah Villa a rawn kir!
Chak tur a chiang tawh a, second half lamah hian beisei tur dang vak a awm tawh lo. Mahse second half ah hian season hmasa lama World Club Championship a inhliam David Villa a rawn kir a. David Villa rawn luh hian mipui lawm a hlawh a, a ngai ang bawkin goal a rawn keng tel bawk. Minute 84 naah substitute atanga rawn lut tho Iniesta ball pek chu goal-ah a lo chantir a. He goal hian Iniesta thiam zia a nemnghet ang chiahin Villa finishing that zia a nemnghet bawk.
Goal dang a luh belh tawh lovin Barca chu 5-1 ngawtin an chak ta a, nikum lama an lallukhum hloh chu rawn lak kir ngei an tum tih a lang ta reng mai.

Real Madrid 1-1 Valencia
(Gonzalo Higuain 10′)-(Jonas 42′)

Tute nge khel?
Real Madrid 1st Eleven:
Casillas; Arbeloa, Pepe, Ramos, Coentrao; Alonso, Diarra; Di Maria, Ozil, Ronaldo; Higuain
Valencia 1st Eleven:
Alves; Pereira, R. Costa, Ruiz, Mathieu; T. Costa, Gago; Feghouli, Jonas, Guardado; Soldado

‘The Only One’ tan Goal khat!
Thawm nei lianve tak Jose Mourinho-a hnuaiah Real Madrid in bul an tan tha a. An game a mawi a, an attacking pawh a na khawp mai. An phu ang ngeiin goal pawh an thun hmasa a, Gonzalo Higuan chuan minute 10 na lekah goal a khung nghal a. Higuan-a shot hi Diego Alves chuan vawi hnih ngawt dang mahse a vawi thumna-ah chuan dan ngaihna a awm tawh lo a ni.
Real Madrid lam hian ball an chang tam zawk a, game pawh a thunun zawk a tih theih. Chutihrualin Valencia hi hlauawmlo tawp an ni bik lova. Minute 42 naah Tino Costa freekick pet chu Casillas-a’n a chhut sual a, Jonas-a’n goal ruakah a tauh luh phah ta a ni. He goal luhna turah hian Pepe leh Casillas te an in tauh a, Pepe phei chuan second half a khelh theih loh phah nghe nghe.

Second half-ah pawh Real lam hian goal thun tumin theihtawp chhuahin an nawr a. Di Maria chip pass Higuan-a’n goal bar a tauh per te chu a uihawm pawl a ni ngei ang. Hei bakah hian Ronaldo pawn a chance a nei a. Mahse goal an thun thei tlat lo. Valencia in opening game-a Real Madrid an draw thei hi an tana result tha anih rualin Real Madrid tan erawh chuan result duhawmlo tak a ni awm e.