La Liga BBVA pawh round 20 na khelh mek a ni a, Inrinni zanah Real Madrid in an mikhual Zaragoza chu 3-1 in an hneh a. Hetihlai hian anmahni hnaih bertu Barcelona chu khualmualah Villareal nen goal awm loin an inhnehtawk thung. Pakhatna Real Madrid leh pahnihna Barcelona inthlauhna hi point 7 a ni tawh.

Real Madrid: Comeback Kings 

Santiago Bernabeu-a inkhelah hian Real Madrid in bul an ṭan ṭha hle a. Mahse minute 11 lekah Zaragoza player Angel Lafita chuan mikhual lam tan goal a thun der mai. He goal-ah hian Real Madrid defender te an muthlu deuh niin a lang.

Tun season mai ni lo, season hmasa-ah pawh khan Real Madrid hian goal chhuah hmasak an hrat khawp mai a, inkhel ṭantirh lama si phurh hmasak an nei ngun viau. Si an phurh hnua an nawrlet leh ṭhin hi team tamtakin an dang zo ṭhin lo a, an ‘comeback’ ngun tawh em avangin Real Madrid fans te chuan ngai ah an nei hial tawh maithei. He inkhelah pawh hian si an phurh hnuah an khel ṭha chhunzawm hle a, Kaka leh Karim Benzema ten an siphurh an sût nghal teuh hle.

Mual neitu lam hi an goal bawh a na bawk a, minute 32 ah goal pawh an thun ta nge nge. Brazilian forward Kaka chuan an siphurh hi a sût a ni. Kaka through ball petu Carvalho pass a mawi ngei mai.

Second half-ah pawh Madrid tho an langsar a, minute 49 ah Cristiano Ronaldo chuan pet goal in, he goal hi Oezil siamsak niin, Real Zaragoza pet goal dan nen a inang phian nghe nghe. Madrid an khel ṭha tulh tulh a, Zaragoza goal bul vela an ball inpekual a mawi ṭhin ngei mai. Minute 57 ah he match-a khel ṭha em em Mesut Oezil chuan Real Madrid goal thumna leh he match-a goal hnuhnung ber hi a thun ta a ni. He goal thun thei tura Real Madrid forward te ball in pass kual a ropui e.

Real Madrid hian game 20 ah point 52 an hmu tawh.

Barcelona an chak zo lo

Hmahruaitu Real Madrid an chak thu hresa in Barcelona in Villareal khelmual an lût a, mahse an mamawh ber point 3 an hmu zo lo. He inkhelah hian Villareal in a tir aṭangin Barcelona pet goal tur an vêng a ni ber a, defence thuah hnih hmangin Barcelona hmatâwngte an dangbet tlat a, counter attack-ah erawh an hlauhawm ve viau mai.

Barcelona hian dan pangngaiin midfield an thunun hneh hle a. An game pawh a mawi ngaiin a mawi reng a, Villareal goal bul vela an chevel pawh hlauhawm thei tak a ni. Goal chance ṭha tak tak pawh an ngah khawp mai a, mahse Villareal keeper Diego Lopez chuan ṭha tak takin a lo dang zel a, Barcelona in an pet goal thei lo. Messi vanneih zân chu ni se hattrick siam thei tur a ni a, mahse a vanneih zan a ni miau si lo. Fabregas leh Tello te chance ṭhelh pawh a uihawm ngei mai.

Huntawp thlengin Barcelona hian goal an thun thei lova, game 20 ah point 45 hmu tawhin pahnihna an nih chhunzawm zel.

Real Madrid kum a ni em?

Barcelona ṭhat zia kan hria a, a zawnin La Liga-ah vawithum an champion tawh. Mahse tun season chu rin loh deuh deuha point hloh an ching ve ta riau mai. Hetihlai hian head-to-head a an ngam em em Real Madrid an chak tluang bawk si a, tun dinhmunah chuan Jose Mourinho pawlte hi La Liga chawi turin an dinhmun a ṭha hle.

Game 17 a la awm a, team ‘lian’ pahnihte tan hian point hloh theihna erawh a la tam hle tih erawh hriat a ṭha awm e.

Inkhel dang result:

Espanyol 1 – 0 Mallorca
Espanyol: Vladimir Weiss 18′

Rayo Vallecano 2 – 3 Athletic Bilbao
Rayo Vallecano: Michu 11′, Arribas 27′
Athletic Bilbao:  Fernando Llorente 17′, 23′, 68′

Real Betis 1 – 2 Granada
Betis: Jonathan Pereira 81′
Granada: Ighalo 13′, Carlos Martins 40′

Real Sociedad 5 – 1 Sporting Gijon
Real Sociedad: Zurutuza 2′, 3′, Urkola 75′, Eizagierre 92′, Griezmann 93′
Sporting Gijon: De la Cuevas 46′

Levante 1 – 2 Getafe
Levante: Ruben Suarez 91 (penalty)
Getafe: Dani Guiza 32′, Diego Castro 82′