Barcelona chuan La Liga ah Real Madrid an um zel a, Inrinni zan (Pathianni zing) khan khualmualah Sevilla 2-0 a hnehin, Real Madrid nen an inthlauhna hi point 7 chiah a ni leh ta. He inkhelah hian captain Xavi Hernandez leh Lionel Messi ten goal an thun a ni.

Abi, you will win again

Inkhelh ṭan hmain team pahnihten Barcelona player, liver transplant hmachhawn mai tur Eric Abidal duhsakna lantir nan a bika siam T shirt an ha a. Barcelona players ten ‘Abi, you will win again’ tih hain, Sevilla players ten ‘Strength, Abidal’ tih inziahna T-shirt an ha bawk a ni. Players te mai bakah fans te pawhin Abidal duhsakna lantirna hun an hmang bawk.

Xavi leh Messi bawk

Barcelona chu Barcelona an ni reng a, tunhnaiah chuan eng team pawh tum se ball chang tam zawk leh inkhel thunun zawk an ni ziah. Inrinni zanah pawh hian inkhel ṭantirh aṭangin midfield-ah ro an rel nghal a, Adriano leh Pedro Rodriquez ten an thun teuh nghal hle.

Minute 18 a ni a, Barcelona captain Xavi freekick pet mawi zet chu Sevilla keeper in a namchhuak zo lo a, Barcelona in hma an hruai. Hemi hnu lawk, minute 25 ah Iniesta nena an in one two hnuin Messi chuan Sevilla defender pakhat awlsam zetin a bum leh te te a, mawi taka keeper chip khûmin Barcelona goal hnihna a thun zui. Hei hi tun season-a Messi goal 51 na niin, a zawnin match 6 ah a pet goal tawh a ni. Hetiang goal ‘nalh’ hi Barcelona leh Messi thun kan hmu fo tawh a, Messi tân chuan ‘tih awm reng’ ah a ngaihtheih rum rum mai. Premier League-a ‘star player’ te thun chu nise hahipin kan sawi zui ngei awm e.

Sevilla tân Manu chuan minute 33 ah goal ban a head per a, hemi hnu pawh hian lehlam lehlamin goal chance an nei deuh zauh zauh reng. Mahse mikhual zawk Barcelona hi inkhelh chhung zawning chak loh hlauhawmin an awm lo a tih theih awm e. Barcelona an khel ṭha zawk a, chak pawh an phu zawk.

Barcelona hian vawi 27 khelhah point 63 hmu tawhin pahnihna an nih chhunzawm zel a, Sevilla hian point 33 hmuin 13 na an ni mek. Pathianni zanah hmahruaitu Real Madrid in palina Malaga an hneh chuan khelh zat inangah Real leh Barca inthlauhna hi point 10 a ni leh ang.

Team line ups

Sevilla: Palop; Luna, Spahic (Cala 68′), Escude, Navarro; Medel, Rakitic (Trochowski 58′); Navas, Del Moral, Reyes (Perotti 64′); Kanoute.

Barcelona”: Valdes; Alves, Mascherano, Pique, Adriano (Carles Puyol 85′); Busquets, Xavi (Alexis Sánchez 82′), Iniesta; Cesc Fabregas (Seydou Keita 69′), Messi, Pedro.

Inkhel dang result:

Granada 2 – 1 Sporting Gijon
Granada: Carlos Martins 3′, Siquera 24′
Sporting: Adrian Colunga 93′ 

Real  Zaragoza 1 – 1 Osasuna
Zaragoza: Helder Postiga 86′
Osasuna: Roversio 88′ 

Getafe 1 – 0  Real Sociedad
Getafe: Martinez (OG) 81′ 

Rayo Vallecano 3 – 0 Real Betis
Rayo Vallecano: Armenteros 51′ , da Silva Costa 78′, Montero 91′.