Inrinni zana La Liga match ah hmahruaitu Real Madrid chuan an mikhual Racing Santander chu 4-0 in an sawp a, anmahni hnaih bertu Barcelona aiin point 13 in an sâng tawh. He inkhelah hian Cristiano Ronaldo, Karim Benzema (goal 2) leh Angel di Maria ten goal an thun a ni. Barcelona hian Pathianni zanah pathumna Valencia an mikhual ang.

A goal nghal

Inkhel ṭantirh aṭangin Real Madrid hian inkhel an thunun nghal a, an passing move rang tak chu Racing player ten an khan lo hle. Minute 5 lekah Ronaldo chuan goal ban a head per nghal. Mual neitu lam hian goal pawh an thun hma a, minute 6 ah Ronaldo chuan hnai fe aṭangin a head goal. He goal hi Kaka siamsak niin, tun season-a Ronaldo goal 35 na a ni der tawh. La Liga bikah goal 28 a thun tawh bawk.

Real Madrid game a hmuhnawm a, a bikin playmaker Kaka ball sem vel a hmuhnawm kher mai. First half tawp lamah Racing player Domingo Cisma chuan yellow card pahnihna a hmuh avangin hnawhchhuah a ni a, he red card hi sawisel theih tak a ni awm e. Minute 45 ah Karim Benzema chuan goal mawi tak a thun a, hemi hnu hi chuan chak tur zawk a chiang tawh a tih theih awm e.

di Maria is back

Second half-ah pawh mual neitu lam thoin inkhel an thunun a. Inhliam damkawr, substitute di Maria chuan minute 73 ah dinglam aṭanga ball lalutin, mawi zetin a pet goal. Real Madrid hian an la duhtawk lova, minute 89 ah Benzema bawkin pet goal lehin, game 23 lekah point 61 an hmu der tawh. Racing Santander hian game 23 ah point 23 hmu tawhin, 18 na an ni mek thung.

La Liga BBVA ah champion an awm tawh a ni thei mai angem?

Team Lineups:

Real Madrid (4-2-3-1): Casillas; Ramos, Pepe (Carvalho 76′), Varane, Marcelo; Alonso, Granero (Khedira 71′); Kaka, Ozil (di Maria 63′), Ronaldo; Benzema

Racing Santander (4-2-3-1): Tono; Alvaro, Torrejon, Bernardo, Cisma; Diop, Gullon, Adrian (Christian 45′); Arana, Acosta (Julián Luque 78′) ; Babacar (Alvarez 70′)