Inrinni zana La Liga BBVA ah Real Madrid leh Barcelona ten an khingpui an hneh ve ve a, La Liga table-ah pakhatna leh pahnihna an ni leh ta. Messi hattrick hmangin Barcelona in Mallorca 5-0 in an sawp a, Real Sociedad khelmualah Real Madrid 1-0 in an chak bawk.

Barcelona (Messi 13′, 21′, 30′, Cuenca 50′, Alves 91′) 5 – 0 Mallorca

Barcelona in Nou Camp-ah Mallorca an mikhual a, Messi leh a ṭhiante ho hian an mikhualte hi si nga ngawt an lo phurh. Tunhnai game 3 a goal thun tawh lo Messi chuan a thiam a la theihnghilh lo tih lantir nawn lehin hattrick a siam bawk. Messi hian game 3 lek goal a thun loh pawhin sawiseltu a nei titih der tawh a, hei hi a ropuina tizualtu a ni awm e.

Camp Nou-a inkhelah hian Joao Victor hmangin Mallorca in chance an nei hmasa zawk a, hemi hnu hi chuan “Messi show” kan hmu. Messi hian minute 13 ah penalty aṭangin goal hmasa ber a thun a, minute 21 ah far post aṭanga Adriano volley chu lo changin cool zetin a thun. He goal siamchhuak tura Cuenca ball khawih vel chu a nalh kher mai. Messi goal 3 na hi minute 30 ah Dani Alves cross aṭanga a pet goal a ni. Messi hian Barcelona tân goal 199 a thun tawh.

Second half-ah pawh Barcelona thoin game an thunun a, minute 50 ah kum 20 a upa Isaac Cuenca chuan Adriano through ball pek chu la in keeper a bum te te a, Barcelona goal 4 na a thun. Cuenca hi Xavi, Messi, Iniesta te ang bawka La Masia chherchhuah a ni. A hming hi kan la hre ngun viau maithei. Mallorca hian ball chan tam deuh lai nei ve ṭhin mahse Barca defence an tibuai meuh lova, Victor Valdes kan hmu tlem hle. Barcelona goal 5 na hi injury time-a Dani Alves pet goal a ni.

Barcelona hian La Liga-a an game hnuhnung pahnihah goal 1 chiah an thun a, season dang an tluk dawn lo nia ngai an awm hman. Tunah chuan Camp Nou-ah ‘5 star performance’ kan hmu a, Barca fans te hlauhthawnna a bo a, sawiseltute kâ hupin a awm ta. La Liga game 10 ah point 24 hmu tawhin pahnihna an ni mek. Mallorca hian away ah chak ni hmel an la hmu ve lova, tunah hian point 9 hmu tawhin 15 an ni.

Real Sociedad 0 – 1 Real Madrid (Higuain 9′)

San Sebastian khelmuala Real Sociedad leh Real Madrid inkhelah goal 1 chiah a lut a, he goal hi Real Madrid Argentine striker Gonzalo Higuain thun a ni. Real Madrid hi a zâwnin La Liga game 6 ah an chak tawh a, pakhatna an ni mek. Season tawpah pawh pakhatna nih an tum viau ang.

He inkhelah hian Real Madrid in first half an thunun hneh hle. Sociedad inrem danah pet goal aiin goal venhim an tum zawk tih a chiang a, mahse minute 9 lekah veilam aṭanga Fabio Coentrao ball pek chu Higuain chuan lo changin keeper a pet khûm a, he goal hi Real Madrid chakna goal a ni ta a ni. Hemi hnu hian di Maria leh Ronaldo te pawhin chance an nei a, first half chu Sociedad lamah hlir an inkhel a ni ber. Mikhual lam hian ball possession 70% zet an nei a ni. Chutihlaiin Real Sociedad pawhin counter attack aṭanga nawrlet na remchang an nei nual a, an passing ṭha deuh ṭhin se chuan Real Madrid defence an tibuai ve viau maithei.

Second half-ah Real Sociedad game a ṭha sawt a, team pahnihte an inhnehtawk hle. Lehlam lehlam in pet goal theihna chance ṭha an nei nual nghe nghe a ni. Mallorca striker Carlos Vela leh Real Madrid defender Sergio Ramos te pet goal loh kha a langsar zual a ni mai awm e. Huntawp thlengin goal dang a lut lova, game 10 a point 25 hmu tawh Real Madrid hi pakhatna an ni mek. Sociedad erawhin point 8 chiah an la hmu a, tunah hian 16 na an ni mek a ni.

Inrinni zanah Spanish club lian pahnih an chak ve ve a, pakhatna leh pahnihna an ni. Pathianni zanah kar hmasaa hmahruaitu Levante an inkhel ve dawn a, Osasuna an hneh chuan La Liga table chunglam a nghing leh lawih ngei ang.

Inkhel dang result

Tunhnaia che chhe tak Villareal an chak a, Rossi leh Nilmar te tel lovin Rayo Vallecano an hneh.

Villareal (Llido 20′, Iglesias 67′) 2 – 0 Rayo Vallecano

Valencia (Feghouli 12′, 25′, Zubeldia 76′) 3 – 1 Getafe (Diego Castro 23′)