Barcelona coach Pep Guardiola chuan La Liga BBVA title race chu a la zo lo a, Barcelona chu champion thei dinhmunah an la ding reng a ni tih a sawi. Barcelona hi La Liga-a pahnihna an ni mek a, hmahruaitu Real Madrid chu point 7 in an pha lo mek a ni.

Guardiola hian Zirtawpnia press conference-ah thuthar lakhawmtute kawmin, “La Liga-ah hian khelh tur tamtak a la awm a. Point 7 hi a tam a, point 7 a inthlauh tawh hnua inlehpelh hi thil harsa tak a ni. Chu aia tam lehpelh phei chu a harsa lehzual ang. Ka player te hi an inthlahdah ka phal dawn lo a, a tawp thlengin kan bei dawn a ni. Point hloh thei dinhmunah kan ding tawh loi.” tiin a sawi.

Barcelona hian Inrinni-ah Osasuna an khel dawn a. Osasuna home, Reyno de Navarra-ah away game hautak tak an hmabak a ni. Thawhlehni (Feb 14) ah Champions League quarter final 1st leg khel turin Bayer Leverkusen khelmualah an zin dawn bawk a. Heti hi ni mahse Guardiola chuan, “Osasuna khel tur ka thlan laiin Champions League ka ngaihtuah dawn lo. Osasuna hneh thei ngei tur players te chauh ka thlang dawn a ni.” tiin a sawi.

La Liga-a Barcelona elpui ber Real Madrid hian tun season-ah point 8 chiah an la hloh a. Tuna an inthlauhna, point 7 aia an inkar hi a zau belh a nih vaih chuan inlehpelh a har tawh viau ang le.

Champions League leh Copa del Rey-ah erawh champion tura rinkai ber an la ni reng e.

source: sports.ndtv.com