LALRINDIKA RALTE (A piancham pualin) – Lawmkima Hmar

An inbul Baje Mual leh a sikul kalna Jawaharlal Nehru Memorial School (JNMS) kawta inkhel thin niin hmun ropui atangin bul a tan lo va, a thlen chin erawh a sang hle thung. A kumrualpuite zingah a thiam pawl niin hockey leh volleyball-ah pawh vantlang chunglam hlek a ni. Football ngaina viau mah se, motor rui ve nasa thin tak a pa Pu Rohminga (zirtirtu) chuan football khelh bansana lehkha zir a, a hnung zui turin a ti thin. An thlahtute lama inkhel mi awm lohna, football a hlawhtlinna chan harsat hunlaia cheng tan chuan inkhelh an phal lo hi a awm viau.

A naupan laia KNP leh YMA Chhang-a innhmang nasa ve tak niin KNP-ah hian zaipawl conductor (solfa vaitu) a ni thin a, mahse, a inkhelh chak lutuk chuan Biak In kawtah ballboot leh ball dahin hla zir ban veleh a inkhel ru thin! Heti khawpa a tui avang hian pawl 7 a pass hnu chuan a pa thurawn hnialin inkhelh law law a thlang zui ta a ni.

Pheichhe Dika : Kum 2002-a 2nd MAP Lunglei tournament siam U-16 ah khan an veng hminga inlanin hei hi Football tournament a khelh hmasak ber a ni a, a tet fal bik leh thiam piah lamah semi-final a corner atanga goal a thun chu a larpui hle. Hetih hunlaia LDFA president Pu Lawmawma Tochhawng chuan thiam a tih em avangin Rs.100/- a pe nghe nghe a, hei hi a phurna tizualtu langsar tak nia sawi a ni thin.

Hetih hunlai laia 2nd Battalion MAP -a an commandant chuan Kolkata SAI a a awm theih dan tur kawng dap a tum thu leh a senso zawng zawng tumsak vek a inhuam thu a sawi chungin a nu leh paten lehkha zir tura an duh avangin an phal lo.

Kum 2004, GAIL MZP Tournament-ah an team chu chak lo fai vek mahse, amah a chetthat avangin IFA Academy a awm tura Mizo 4 an thlan zingah a tel a, hemi tuma Mizo a chhukpuite zingah hriatzui khawpa tha chhuak an awm lo va, coaching lamah LCH-a leh Beirona te erawh an kal ta thung. Phaia a awm hnu hian Pooja chawlha a rawn haw te chu a nuin Hostel-a awm a lehkha zir turin a la nawr fan fan thin.

Sum huiluta : Indian footballer zinga official taka ballboot sponsor-saktu nei tlemte zinga mi niin Sports Wear siamtu lar Puma company nen an thawkdun mek a, kumtin ‘Gift Card’ Rs.200,000 hu pein he card hmang hian Puma showroom a mi a duh duh a la mai thin. Hlawh lamah pawh a nep lo va, kumtin chawhrualin Rs.50 lakhs chuang a la la lut ziah!

Vei hmangthiama : 2012/13 season a German Bundesliga club thar Fortuna Dusseldorf chuan trial turin an sawm a, mahse zinna ticket leh visa chungchanga inbiakna an neih fel vek hnuah India senior team-a khel tura koh a nih avangin trial hi a nei ta lo va a uiawm hle.

Khawvela club ropui Leeds United, Southamton leh Manchester City te lo enkawl tawhtu, English pachal Peter Reid khan Mumbai City FC a enkawl lai khan Didika hi tha ti hle a, a ngaina hle bawk. The Telegraph India, October 11, 2014 a chhuak heading-ah “Ralte has the potential to play in Europe” tiin Didika’n Europe a khel thei tur khawpa theihna a neih thu a sawi chu an tarlang a, tin, Mizo tlangvalin a ke veilam a hmanthiam thu leh, a khelh dan phung English Football-a seng lut tura a duhthu a sawi hial a ni.

Peter Reid hian tun thleng hian tute emaw kaltlangin a chanchin a la zawt fo va, Mumbai City FC a Nicolas Anelka leh Freddie Ljungberg te nena an awmho lai pawha midang free-kick pet phal lova a pettir thintu hian mihring tak pawhin a ngaina hle.

Tlang chunga khaw awm: East Bengal leh Mohun Bagan ten Kolkata Derby match ropui an khelh tumin Didika hian a ke vei lamin hun tawp lamah goal awmchhun a thun a, amah ngaisangtu fans te Stadium pawnah Didika hmuh tumin an inpangaw zial tup tup. Security lamin an veng hneh dawn lo tih hriain Stadium chhungah dar 2 vel zet an thukru.

A rukin an in luahah an haw a, mahse, Kolkata media ten an awmna an chhui chhuak thuai a, a tukah an inchhunga luh tum kawngka kik ri a chawl ta lo. A tawpa tawpah cook chuan a hawnsak. Didika room-ah a tawm tlat a, Club lama an hotute phone in security ten an in khata Kolkata Media pungkhawm chu an hnawhdarh sak ta a ni. Tin, ngaisangtu a ngah avangin a inkhelh zawh angah pawh hmel langsar tak chuan a lengchhuak thei thin lo fo.

‘I tan chauh kumtluangin’ : June 5, 2014 khan a nupui Vanlalruati nen hian an innei a nih kha. An hmangaihna thawnthu hi a vai film deuh ruih a, bu khat daih vel ziah tur a awm. An naupan tet atanga inkhawm thin, KG-1 atanga pawl VIII thlenga sikul kal dun, tuition thlenga kal dun thin an ni a, Middle School an kal lai chuan pakhatna an innih chhawk zak zak thin. Didika pa sawi danin a fapa hian a monu ni ta aiin tlemin a thiam thei zawk.

An awmna hmun inan loh avangin an inbe lo char char a, nula tlangval an nih hnuah engtin tin emaw ni intawngin an inbe leh hlawl! Hemi tum hi chuan naupan laia an inbiak thin dan nen a danglam ta a, nupaah an insiam zui ta a ni.

Infiamna lama tui lem lo Ruati chuan an pa hi a lar tih a hriat mai loh thu leh, Sports lampang a ngaihsak vak loh avanga a chanchin an ziah te pawh a hmuh tam loh thu a sawi a, an inkhelh lai erawh chuan a inhliam ang tih hlau reng rengin a enthat theih loh thu leh, a changin room-ah lutin a va tawngtaisak leh thin thu a sawi.

Tunah hian nau thla 7 mi pai mekin India ram football in nausen duhawm kan hmu hnai dawn a nih hmel.

Hliam ngam loh : I-League 2014-15 season khan hliamin a tlakbuak ta hlauh mai a, a ke ruh a lo khi chu niin enkawl ni mahse club leh India tana khelhna hun a chan mumal theih loh phah. Mizoram hmun hrang hrang bakah an kohhranin an tawngtaipu thin a, an kohhran upa Upa K. Thanzuala phei chuan bang lovin tawngtai thupuiah a thawh thin. Tawngtaina rah langin thatlam a pan zel a, tunah chuan mumal takin a inkhel leh thei ta.

India player te pawhin an chung en em em, a ke veilama hla tak atanga goal a thun thin avanga “Long-ranger’ tia an sawi thin hi ropui zawkin a rawn kir leh ngei ang.