Ka la naupan deuh avangin eng tik kum nge ka hre tawh lo. Inkhel en tura kal changa thut ka duhna ber hmun tlang lamah ka thu a, ruah a sur avangin Lammual a diak hle. Eng Tournament nge ka hre tawh lo a, lehlam pawl kha PWD an ni tih chu ka chiang a, an khingpui kha Power Dept. ni ta-in ka hria. Pa te tak te, kekawrbul chhing tiu teu ha, kawr bilh lut at, PWD jersey no. 15 khan ka mit a la kher mai. A hming ka hre lo a, tunge a nih han zawh mai tur ka hre lo a, tumah kha ka zawt ngam lo bawk. Mahse, ka thlanga thute titi atangin tunge a nih ka hre ta. A hming ka hre ve fo a, amah tak ka lo la hre miah lo chu niin – A hming chu ‘Khualpatea’. Kan veng tualzawla kan inkhelhin khatih hun laia player lar-te hming kha kan invuah thin a, kha inkhel ka en atang khan ‘Khualpatea’ ka ni char char tawh!

Hmanlai chuan
Khatih hun lai, tualchhung football boruak sang tak thin a tlakhniam tan lai vel khan Lammualah inkhel kan en ve thin. Tun thlenga thutna nuam leh enna rem nia kan la hriat tlang lamah hian thut kan tum hram thin. Inkhel en a rem chu thuhran, tlanga thute zingah khan fiamthu thiam, nuih tiza deuh an awm thin vangin khangho titi hre phaka awm kha kan chak thin em a ni. Ticket man kha engzat nge a nih ka hre tawh miah lo. Kan veng (Bethlehem) atang kha chuan en man kha a ngai vak lo bawk a! Assam Rifles ramah kan chho a, Indira Pavillion bulah khan kan chhuak chho mai thin. Mahse, duty an lo awm fuh vaih chuan kan hel a, AR school chhakah khan thirlen kan keu awng a, chuta tang chuan kan lut leh mai! A chang chuan naupang kan nih avangin a free-in min luhtir mai thin bawk.

Phur em em maia inkhel en tura kan tlan chhoh thin laite kha a lo rei ve ta hle mai. Lammual thlen dawn tepa Assam Rifles duty-in min lo hauh vaih chuan kir leh vang vanga hel kual a ngai thinte kha a hun lai chuan hahthlak thin viau mah se, a lunglenthlak ta hle mai. Tun hnuah chuan AR ram atangin tumah kan lut ngai tawh lo, gate pangngai atangin kan lut ve tawh a nia!!!! Ruahsur changa kan tawm hulna Indira Pavillion te khan lung a tileng. A hnuaiah khan silai mu an dah, an ti a. Ruk tumin bang kha kan keu ve ngar ngar thin. Tun hnua ngaihtuah leh hian min man lo kha a vanneihthlak! A bula Jelebi dawrte kha a aw…. pawisa nei miah lo khan ka va ei ngun tak, ka va dil tawp zel!

Sipai bawng kawlh kha a va chimawm thei chiang. Tun laia sipai mawl deuhin khelmual an kal tlang ngawk ngawk thin ang deuh hian, inkhelh laia rawn luh kha a ching a. A kawlh si, hnawh chhuah kha a har phian. Kum 1994 kha ni ta-in ka hria, NE Fraternity Gold Cup khelh laiin a rawn lut a, Tripura defender pakhat a’n pir mai a….. leiah a tla thup dawp a. A rawn hawi chhuak a, bawng kawlh nen an inmelh ran a. Na pawh sawi hman lo-in chak lutukin a tlanchhia a, a him chinah a va tlu vial ngawih ngawih laite kha mitthlaah a la cham vuai vuai!

Lammualah kan inkhel ve
Lammuala inkhelh ve theih hun mawlh kha kan nghakhlel thin. Mahse, naupang mai tan kha chuan khelh ve-na chance kha a vang viau mai. Kan thianpa pakhat khan tih dan tha deuh a hre chhuak a, fuh dawn viauin kan hria a, Lammuala inkhel tur chuan kan inbuatsaih ve ta a. Ball kan keng a, ballboot kha kan keng ta chiah em ka hre tawh lo. Engtik kum nge ka hre leh pek tawh lo a, 1994 hma lam chu a ni chiang. Independence Day Celebration Football Tournament Final khelh ni a ni a, MAP leh Power Dept. in final kha an khel ni ta-in ka hria. Keiniho chu ball nen kan chho a, dan pangngai bawkin kan lut ru leh. First half-ah kha chuan Indira Pavillion chhak kopang velah khan kan la thu khawmuang a, half time atangin kan inkhel ve tan ta. Khelmual hungna la awm hek lo, main gate lamah goal pakhat kan siam a, thlang lamah pakhat. Tichuan Aizawl chhim lam goal area-ah chuan tang em em maiin kan lo inkhel ve ta. Entu an tam si, kan va han phur tak! Half time lai a nih avangin min la hau mai lo. Second half an tan thlenga kan la inkhelh chhunzawm zel avang chuan min rawn hau ta a, keini pawh kan tawp zui ve ta bawk.

Inkhel ka en tawh lo
Naupan laia en peih viau e ti lo chuan puitlin hnuah ka en mang ta reng reng lo. Hna lama buai chu thuhran, TV lamah a aia hmuhnawm zawk a awm a, thutthlenga mu chungin nuam sa takin a en theih bawk si. National U-16 kan thlena kawr sen kan hak vak tum khan Mizoram khel chu ka en kim vek a, final ni-a ‘Khelmual tha’ tia au bul tantute zingah khan ka tel ve leh hram!! Khami hnu khan tih takzetin inkhel ka en leh tawh lo, ka en ve leh zeuh zeuh chauh a ni. I Division inkhel ngat phei chu Vaivakawnah FC Kulikawn leh I MAP inkhel ka en a, chu bak chu ka en awm ka hre lo reng reng!

Inkhel en turin Lammualah ka lut leh
Tun hnaiah TV lama tihchhuah a ngaih thin avangin loh theih lohin Lammual ka lut ve leh ta. A hmunah awm reng mah ila TV te tak te te-ah chauh ka hmuh theih thin avangin uluk tak chuan ka en ngai lem lo. MPL Playoff zet erawh chuan man chawiin Lammualah inkhel min entir ve leh ta. Keimah ang hi midang tam tak an awm ve ngei ang. Playoff boruak a sang a, khawi hmunah pawh kan sawi ni maiin ka hria. Internet khawvel atanga Biak In choka thlengin kan titi a ni chiang! Tualchhung football a nung leh e.

Boruak a sang
MPL tak tak aiin playoff boruak hi a sang mai lo’ng maw? Club leh club kan inbeih dan boruak a sang a, mimal thil taka inbeihna thawmte pawh hriat tur a awm! Facebook lamah na tawk tawkin kan inbei a, tute nge kan nih kan inhre pawh vek mai si! Hei hian a tha lo lam aiin a tha lamah min hruai se a lawmawm ang. A nih loh vaih chuan aw……Lehlam atanga thlir chuan mi tih dan pawh a ni ve tho mai. Keini aiin khu lam club-te khu an inbei na, an kawng kan zawh ve tan dek dek chauh a tih theih.
Club football-ah hian entu insual hi a awm ngai tawh lo rei viau lo’ng maw? Tunah chuan Club Football-in intibuai tham entu a nei leh tawh a nia! Intihbuai hi a tha, a pui tihna lam ni lo-in, club football a nung thar leh tih a entirin ka hria.

A sei tawh lutuk, duhtawk dawn teh ang. MPL tak tak khelh hunah tuna kan boruak ang hi chhawm nung zel thei ila, inhaw miah lo-in khelmual chhung leh pawnah inbei tak tak teh ang u.