LAMPARD-A HNUAIA CHELSEA

Estimated read time 8 min read

London club Chelsea chuan tun season atangin an midfielder hlui Frank Lampard chu manager (head coach) atan an la lut a, match tam la khelhpui lo mah se a khelhpui dan phung erawh a thawkhat.

A game plan leh tactic tlangpui tarlang ila, a thatna leh thatlohna hrut hlek teh ang.

Aggressive pressing :

Lampard hian Championship club Derby County a enkawl lai ata tawh, ball an chan lai leh chan loh pawhin an khingpuite na takin a nawr thin. An khingpui ten tlarhnung lama ball an chan ve leh rang taka hnaih chilhin, hun thawl leh hmun thawl nei thei lek lovin an nawr thin.

Hetianga an nawr seh chhan hi an tumpui tlarhnungte tihsualtir an tum vang niin an tihsual zar zovin goal pawh an thun nual thin reng a ni. Tun season Premier League match tlemte an khelh chin atang pawhin ball an chan loh laia na taka an nawr dan hi a hriat. Hei vang hian Lampard chuan centre forward tawnhriat ngah kum 32 mi Olivier Giroud hnawlin a aiah English striker tha za, kum 21 a upa Tammy Abraham a thlang zawk fo.

Team tha pangngai tak Chelsea player ten hetianga an khingpuite an han nawr zet hi zawng tawrh zawh a har a, an tumpui tlarhnungte talbuaiin goal an chhuah phut phut tawh mai thin. Mahse, Lampard-a khelhpui dan hian fuh tawk lohna lai a nei!

Hmunawl zau :

Lampard-a khelhpui dan hi hmalam nawr kawngah fuh viau mah se goal ven kawngah erawh a hlauhawm thung.

Lehlam pawl (goalkeeper & defender) in ball an chanin Chelsea forward leh midfielder te hian let mai lovin an khingpui ten tlarhnung (back-line) atanga ball an semchhuah tur tihbuai tumin an chang ran thin a, hetih lai mek hian an defender te erawh an goalkeeper hma lawkah nghet takin an ding thung.

The Blues midfield leh defence inkarah hmunawl a tam ta em em a, ball lo chhuah palh hlekah lehlam pawlin he hmunawl hmang tangkai hian Chelsea defender te chauh hmachhawnin goal thunna remchang an insiam awlsam.

Tun season tir lama Manchester United-in rin loh taka an sawp tum pawh khan hei chiah hi a ni an chak lohna lai. Na takin an nawr thei a, an vanneih ni phei chu nise goal thun hmasa zawk tur an ni (a ban an pet per tlauh tlauh).

Mahse, khatia an forward Abraham leh Pedro te bakah midfielder 4 – Barkley, Kovacic, Mason Mount leh Jorginho te nen lama, United penalty area bul hnaia an awm mek laia ball a rawn chhuah thut khan hmunawl nei zau, vengtu nei lo Jesse Lingard khan Martial, Rashford leh, dinglam sir atanga rawn phit chhuak Wan-Bissaka leh Luke Shaw te tan duhthalin ball a pe thei. United player ball chang apiang deuh thawin mual laiah ball an dah lut a, a sual tampui lo!

5v4 a ni ta chiah; Chelsea tlarhnung 4 – Emerson, Zouma, Christensen leh Azpilicueta te ringawt tan Red Devils player 5 kha dan hneh ngaihna a awm bik lo.

Leicester City nena an inkhelh tum pawh khan Brendan Rogers-a team The Foxes midfielder pahnih – Maddison leh Tielemans ten he hmunawl zau tak hi hmang tangkaiin vawi duai lo an chhaih mangang a, goal thunna remchang vawi 8 insiamin Stamford Bridge-ah point an hlawhchhuak a nih kha.

Hlawm hnih :

Lampard-a hnuaia Chelsea hi hlawm (block) hnih ang thawkin a then theih. Tlarhma hlawm leh tlarhnung hlawm (lower block’ leh ‘higher block’).

Defensive game khel thinte chuan tlarhnung block an tichhah a, attacking game khel chuan tlarhma block an tihchhah thung thin. Lampard hian tlarhma block tichhahin player 6 hlawm khatah a awmtir thin a, tlarhnung block-ah player 4 an awm thung. Heng block pahnihte hi an thawhdun that loh chuan a inbuktawk thei lo.

London club hian ball an chan loh lai, an khingpui ten tlarhnung atanga ball semchhuah an tum laiin an forward te bakah midfielder te tawlhhma tirin an khingpuite thaw hman lek lova siamin ‘high aggressive pressure’ hmangin na takin an nawr thin. Mahse, a hma lama kan sawi tawh angin hetiang an nawr lai hian an tlarhnungte an tawm tlat avangin mual laiah hmunawl a tam a, lehlam pawlin an hmang tangkai thin.

Chelsea khelh dan phung ‘high pressing game’ hlawhtling khel tur chuan an hmatawngte an tawlh hma ruala an tlarhnungte an tawlh hma ve zel a ngai (high line defensive); a nih loh chuan a nawrtu – tlarhma hlawm (higher block) leh goal vengtu – tlarhnung hlawm (lower block) te inkara awl zau taka awm, lehlam pawlin an hman tangkai avangin an tawlhthlu fo ang.

Tlarhnung inman lo :

An chak lohna lai hi keini ang tribal hnarbawng, belval vala val satliah, South Sudan ram pian tawh hnu pawha ‘ka puzawn’ tih tur la nei lo ta chuang pawhin kan hrethiam a nih ngai chuan, hun khirh laia club satliah lo tak enkawla, hna namen lo thawk tura an lakluh Lampard hian a hre lutuk ang. Mahse, engati nge ala chin fel theih si loh?! Chelsea defender te inman tawk lo; inhliam an awm; player an la lut thei bawk si lo!

Tun Chelsea defender ten hi offside trap siam kawngah an inman lova, hei hi holam viauin lang mah se an buaina lian tak pakhat a ni.

Norwich nen an inkhelh tum khan defence laia ding Christinsen chu offside trap siam tumin rang takin a tawlhchhuak a, mahse, Zouma a tawlhchhuak ve si lova, offside trap-ah Norwich an awk lo. Christinsen hi let leh mah se a tlai lutuk, Pukki’n goal a thun.

Uefa Super Cup-a Liverpool nena an inhmachhawn tum khan Firmino a offside theih na’n ‘trap’ an siam a, mahse, Zouma a tawlhchhuak ve lo. Firmino chuan ball dawngin Mane goal thun tur a siamsak…

A sir atangin :

Lampard-a hnuaia khelh dan phung chi khat an chin tak chu a sir tawn tawn atanga full-back te hmanga nawr hi a hi. ‘Super Frankie’ hian an side defender te hi insum kar lova an tumpuite penalty box chhunga ball vawrh lut hmiah hmiah turin a ti a ni ngei ang.

Ball an chan ve leh an winger te chu a sir atangin a laiah an tawlh lut a, he an hmunawl chhuahsan hi full-back ten inpawt kakin an luahlum. Eg.Norwich nena an inkhelh tum khan Jorginho ball chan veleh Pulisic a laiah a lut thin a, Norwich full-back chuan um zuiin hei hian hmunawl zau a siam a, Azpilicueta a tawlhlut nghal.

Mual sir atanga ball lakluh an thupui avangin an winger ten ball an chan pawhin, goal nawr tura an full-back rawn dawkchhuak ten hmun thawl an neih theih na’n, an ball chanlai rawn chuh tum ‘side defender’ te a laiah an pawt lut thin. Lehlam pawl full-back te chhuahsan a sir tawn tawnah hian The Blues full-back te rawn tla lutin penalty area-ah ball an vawrh lut ta hmiah hmiah thin a ni.

Norwich laka Abraham-a goal hmasa zawk an thun dawn khan US winger Pulisic chuan a laiah ball luhpuiin dinglam sirah Azpilicueta a rawn lut a, Pulisic hian Azpilicueta hnehah ball pein Spanish full-back hian Abraham-a thun turin a siamsak.

Lampard hian Derby County a enkawl lai ata tawh, full-back ten hmun thawl an neih theih na’na mual laia player pawtkhawm a, a sir tawn atanga ball vawrh luh hi a ching tawh.

No Sarri-ball :

Chelsea manager chhuak ta Maurizio Sarri khan a team te chu a lira tawi te tea ball inpe kual a, an khingpuite nawr turin a zirtir a, a sir atanga a kanga ball vawrhluh a ngaina lem lo. Hei hi Lampard nena an inan lohna langsar tak a ni.

Sarri hnuaiah khan The Blues hi inkhelh apianga cross-ball vawi 5 nei zel ang niin Lampard-a hnuaiah chuan an inkhelh apianga cross-ball vawi 12 nei zel ang an ni ta daih!

Sarri hnuaia Chelsea kha chuan ball kang an uar lova, ‘one touch pass’ hmanga hnai te tea inpe kualin an tumpuite an chhaihchhuak a, hmun awl a awm veleh lutin an nawr thin. He system hi a muang.

Lampard-a hnuaia an khelh dan phung erawh a rang a, a tlang (direct) hle bawk. Mual laia ball chaih kual leh midfield sawi dep dep a tlem. Defender te pawhin an awmhmun atangin hun remchang an hmuh phawt chuan an striker te tan ball an vawrhlut mai.

Midfielder an zalen zawka, inthlahrung lo takin an forward te hnung an va dawl a, hei vang hian Championship atanga Premier League-a rawn khel tharlam Mason Mount ang te pawhin goal thunna remchang an ngah phah.

Lampard hian a duh ang team din turin player lakluh mamawh mah se hrem an nih avangin thil theih a ni rih lo. Tin, an player pawimawh thenkhat an inhliam bawk si avangin Lampard-a hnuaia Chelsea tha ber hmu turin hun an la mamawh. An mamawh ang player la lut a, a duh anga a remkhawm hnuah a that leh that loh a chiang zual ang.

C Tlanthianghlima

Football tui ve tak

You May Also Like

More From Author

4Comments

Add yours

+ Leave a Comment