1. Shay Given a chawl ta
Republic of Ireland goalkeeper Shay Given chuan international football a chawlhsan thu a puang.

Kum 36 a upa ni tawh Given hi Republic of Ireland tana khel hnem ber niin, ram tan vawi 125 a khel tawh a. Thutlukna harsa tak ni mahse a chawlh thu hi a puang ta a ni tih a sawi.
Aston Villa keeper chuan, “Kum 16 chhung ka ram tan ka lo khel tawh a, chawlhsan thu sawi hi thil awlsam a ni lo. Coach Giovanni Trapattoni hi ka mi ngainat a ni a, team member-te pawh ka thiante vek an ni. An mi puihna a zara hetiang thleng hi ka ni a, an chungah ka lawm a ni,” a ti.

Given hian kum 19 a nih kumin ram tan a khel tan a, rei lote chhungin Ireland keeper Paddy Bonner thlaktu a ni nghal a. 2002 World Cup-ah khan an ram tlak hma chu a khel tluan chhuak parh a ni.

Ram tan a khelh tawh loh tur thu sawi mahse, engemaw thulha ramin a mamawh a nih chuan a inpeih reng tur thu a sawi bawk.

2. Agger a chhuak duh lo
Liverpool defender Daniel Agger chuan Liverpool chhuahsan a duh loh thu a sawi.
Kan hriat angin Premier League champion Manchester City chuan Agger hi lei an duh niin sawi a ni a. Liverpool manager Brendan Rodgers pawhin a manin a zir a, amahin a duh bawk chuan hralh a hreh lo tih a sawi a. Mahse kum 27 a upa Agger chuan, “Ka awm zel ang,” tiin Liverpool tan a rinawm thu a sawi.

Agger hian Denmark newspaper ‘Politiken’ ah he thu hi sawiin, “English club danga khelh hi ka la ngaihtuah chhin ngai lova, mahse club-in min hralh duh hrim hrim a nih chuan thuhran a ni. Keima duhdan chuan Liverpool-a awm zel hi ka duh ber a ni,” a ti.

3. Wigan-ah Ryo Miyaichi a kal
Arsenal midfielder Ryo Miyaichi chuan season khat chhung loan-a zawm turin Wigan a pan.

Japan international Miyaichi hi kum 19 a upa niin, nikum kum tir khan Arsenal-ah hian trial-in, Arsene Wenger chuan a lalut a. Arsenal tan game hnih chiah a la khel a, season liamta tawp lam zawng kha Bolton-ah loan-in a chhuak a. A kum a la naupang bawk a, tun season tharah pawh hmun danga inzir turin a chhuah leh ta rih a ni.

Wigan hian an midfielder Victor Moses chu Chelsea lamah an hralh maithei a, chuvang chuan Miyaichi hi an mamawh a ni.

4. Mourinho: ‘Only One’ tiin min ko rawh u

Jose Mourinho chuan ‘Special One’ ti tawh lovin, ‘Only one’ tih a duh tawh a. A chhan chu European League tha tha pathuma champion thei vek awmchhun a nih vang a ni.

Portuguese Jose Mourinho hian FC Porto chu Portuguese League-a a champion pui hnuah England-ah a kal a, Premier League-a vawikhat mah la champion ngai lo Chelsea chu vawihnih a champion pui a. Italy-ah kalin, Serie A ah Inter Milan chu vawihnih a champion pui leh a. Chumi hnuah Spanish League-ah kalin, Barcelona vung vanglai berin Real Madrid chu season liamta khan a champion pui leh bawk a. Insawithei tur chu a ni ve hrim hrim.

Mourinho chuan, “Ka tluang khawp mai, Pathian hnenah lawmthu ka sawi a ni. Tunah hi chuan football aiin thildang ka ngaihtuah tam ta zawk. Inter Milan ka champion pui kha nuam ka ti a, kum 50 chhung champion tawh lo ka champion pui kha a nuam a ni. Mimala hlawhtlinna aiin club hlawhtlinna hmuh hi nuam ka ti,” a ti.

Mourinho chuan, “Min ngaina emaw ngaina lo emaw, Europe-a League pawimawh ber ber pathumah ka champion tawh a, keimah chiah hetiang ti thei hi an la awm a ni. Chuvangin, ‘Special One’ min ti lovin, mipuite hian ‘Only one’ min ti tawh se a tha ang,” tiin fiamthu a thawh.