Football hi khawvela infiamna upa ber pawl ani a, amaherawhchu a khelhdan kalhmangah hian tun thleng hian danglamna a la tlem hle thung. Tuna football tia kan hriat lar tak ber, Association Football/ soccer hi kum 1863 khan England rama Football Association chuan a dan leh dun hmasa ber, “Laws of the Game” an tih chu an duang chhuak a. Tun thleng hian a dan hi tihdanglam ani tlem hle a, mahse tlem tlem a siamthat hret hret chu a ni ve a, chung dan siamthatna pawimawh deuh deuh te chu I han thlir ho ang hmiang.

1866: Forward pass phal ani

Football khelh dan thlak danglamna pawimawh ber pakhat chu hmalam zawnga pass phal ani ta kha ani. Mak pawh kan ti maithei a, mahse a hma chuan mahni pawla mi te pawh lehlam team goal lampanga an awm chuan va pass kha a thianglo ! He dan ang hi chuan pass phal ani ta a, amaherawhchu forward pass pe tur chuan ball lo dawngtu leh lehlam team goal inkarah an defender pathum tal an la awm a ngai cheu ani. Chutichung chuan passing game lo in tanna tak chu he dan pawimawh tak hi ani ta a ni.

1891: Penalty kick hman tan ani

Football dan an zam hmasak ber atanga kum sawmthum dawn hnu ah chauh penalty pet hi hman tan ani. A tirah chuan tumah pawhin tihluihnain an foul duh an ring lo a, amaherawhchu hun a lo kal a, a game a tang chho tial tial a, penalty hi an hmang tan ta ani. A tirah tak phei chuan ‘kick of death’ tih hial ani a, 1902 hma zawng phei kha chuan penalty spot pawh awm lovin yard 12 line khawi lai atang pawhin an pet tawp mai ani.

1891: Referees an lo tel ve ta

Hmanlai chuan inkhelh laia foul leh buaina reng reng hi team hnih te captain ve ve in an chingfel mai a. A hnu deuhah umpire an hmang leh a. Team tinin anmahni umpire theuh neiin anni hnenah hian zualkona te chu thlen ani a, annin an lo chingfel leh mai thin ani. Amaherawhchu inkhel a lo fair loh chhoh tan zel avang leh tan lam neilo dan kengkawhtu mamawhna avangin penalty leh free kick te pek theihna thunei mi pakhat an ruat ta a, referee kan tih hi a lo piang ta ani.

1912: Goalkeeper chettlat theihna khuahkhirh ani

Kum 1912 atang chauh hian goalkeeper te chu an penalty area pawn a ball kuta an khawih phal ani ta lo a. Hemi hma hian kum 1909 ah khan goalkeeper reng reng players dang laka awlsam taka hriat hran an nih theih nan kawr rawng danglam bik haktir an ni bawk. Hetih lai hi chuan kawr rawng hring lampang ani tlangpui.

1925: Offside dan thlak leh ani

He dan tharah chuan player leh lehlam team goal inkarah defenders pathum an awm a ngai tih kha pahnih ah tih tlem ani ta a. 1990 khan siamthat belh leh niin, tunah chuan ball pek anih laia last defender rual chiaha player a awm chuan a offside lo ani. Hei avang hian goal thun pawh a tam belh sawt ani.

1958: Substitutes siam phal ani ta

Hmanlai chuan substitutes te hi a hming ve maiin an awm a, first XI zinga mi players tuemaw inkhel theilo an awm chauhin substitution siam thin ani. A hnu deuhah inhliam vel vanga substitution siam chu phal chhoh ani leh a, mahse a tirah chuan goalkeeper leh player dang pakhat inhliam thlak nan chiah siam phal ani thung. Kum 1960 hnulam atang chauh khan tactical thil avanga substitution hi siam phal a lo ni ta ani.

1970: Red card leh yellow card hman tan ani

English referee Ken Aston-a, hetih hun laia FIFA Referees’ Committee a thunei ve tak mai hmalakna azarah red leh yellow cards te hi hman tan ani. Referee thutlukna, players leh mipui ten awlsam taka an hriat theih nana tih niin, a hmanna hmasa ber chu hemi kum veka neih FIFA World Cup™ ah khan ani.

1992: Back pass lo khawih phal ani tawh lo

International Football Association Board chuan kum 1992 khan dan thar siam belhin, mahni teammate ten an ke hmanga goalkeeper ball an pass let, keeper in a kut hmanga a lo khawih theih tawh lohna dan hi a tirah tak chuan sawiselna a tam hle a. Mahse hei hian a game hi a rawn tiphuisui sawt ani.

Awle, tunah chuan football hi a dan engkim fel taka zam ni tawh mahse, hmasawnna tur zawn mek zel ani a. Franz Beckenbauer a Chairman na hnuaiah FIFA Task Force Football 2014 committee chuan dan thar kawng hrang hrangin a zir chiang mek ani. Heng zingah hian goal line technology te pawh a tel a, kan hmalamah football hi‘beautiful game’ a nih zel theih nan, a hun mil zelin siam danglam hret ani zel maithei ani.

FIFA Laws of the Game hi a en duh tan hetah hian a en theih e.

(Reference: fifa.com)