LEICESTER SPORTS SCIENTIST HNAWHCHHUAH KHA – Lawmkima Hmar

Nizan Champions League-a Atletico Madrid in si khat faia an mikhual Leicester City an hneh tum an the Foxes sports scientist Tom Joel chu mual chhung atanga hnawhchhuah a ni.
.
An hnawhchhuah chhan hi Atletico Madrid bench hma tak, Leicester official tea wm phal lohna hmuna an player te tanpui tura a va awm thin vang nia sawi a ni. Vicente Calderon-ah mualneitu manager Diego Simeone khawhawi tibuai thei zawnga a awm fo avangin Atletico Madrid chuan UEFA-ah an complain a, Joel hi hnawhchhuah a ni zui ta a ni.
.
Thenkhat sawi dan thung erawh chuan Tom Joel hian an player te chu chakna thahrui siam thut thei chi intur a pek vang niin an sawi thung. Hemi chungchang hi Leicester boss Craig Shakespeare chuan sawiin ‘an thil pek chu tui satliah’ mai a nih thu a sawi. Tin, an hnawhchhuah chhan pawh hi a thil pek vang ni lovin a pekna hmun vang zawk niin a sawi bawk.
.
Inkhelh lai hian a chang chuan player te hi in tur tuihnang (Gels) lam chi pek an ni thin a, hei hi blood sugar level tisang a carbohydrates siam chhuak thei, tihrawl tichak a, chau tawngkhawng tur vengtu atan tih a ni.
.
Hetiang thil tuihnang ka khat hian a tlangpui thuin chakna 100-150 calories a pai thin a, danin a khap lo.
.
Nizan pawh khan hetiang thil tuihnang hi pumna Albrighton-a hnenah khan a pe niin mi tam tak chuan an ngai a, lo pe pawh ni se dan a bawhchhiat loh laiin Atletico Madrid coaching staff te hma khera a va awm thin kha dan phal loh zawk chu a ni.
.
A chanchin kan sawi mek sports scientist Tom Joel hian Harrogate Grammar School atanga a chhuah hnuah Loughborough University atangin kum 2009 khan Bachelor of Science (Sport & Exercise Science) a zo a.
.
Kum 2013 atang khan the Foxes Under 21 team-ah Sports Scientist hna thawkin 2014-15 atang khan senior team lamah dah a ni.
Posted in Rampawn.

Leave a Reply

Or