Inrinni zan Premier League game hmuhnawm takah Liverpool in an mikhual Norwich City an hneh zo lova, point 2 hlu tak an hloh. Anfield-a game ṭang takah hian Craig Bellamy leh Grant Holt ten goal an thun a ni.

Tutenge khel?

Liverpool: Reina; Johnson, Carragher, Skrtel, Enrique; Bellamy (Henderson 69′), Gerrard, Adam, Downing (Caroll 80′), Kuyt (Agger 91′); Suarez

Norwich City: Ruddy, Naughton, R Martin, Barnett, Tierney, Bennett (Holt 57′), Fox, B Johnson, Hoolahan, Pilkington, Morison

First half chu Liverpool tâ

Inkhel ṭan chiah aṭangin Liverpool in goal thun vat an tum tih a chiang a, Norwich City keeper kan hmu nghal mawlh mawlh mai. Minute 10 a nih meuh chuan Liverpool in chance ṭha tak tak pathum an nei hman tawh a, Suarez phei chuan goal ban a pet per hial. Mual neitu lam hian game rang tak khelin an mikhualte an kat kual nasa hle.

An inkhel rei tawlh tawlh a, Norwich game a kâng tial tial a. Hoolahan leh Morison ten mikhual tân chance ṭha tak an nei a ni. Liverpool tlarhmaah chuan Luis Suarez bawk a langsar leh a, Bellamy, Downing leh Kuyt te nen ball an inpekual vel chu hmuhnawm tham a ni. First half-ah goal a lut lo mai dawn emaw tih hnuah Norwich player ‘hlui’ Craig Bellamy chuan minute 45 ah pet goal in halftime-ah Liverpool in hma an hruai. Norwich City hi Bellamy club hmasa ber a ni tih kan hre nual awm e.

Second half: A teuh ral

Second half-ah Liverpool in goal thun belh an tum a, Norwich City in an siphurh sût an tum thung. Team pahnihten Premier League ‘open game’ dik tak hmangin mit an ti tlai ngei mai. Suarez-a vanneih ni a ni lova, goal ban a pet per bakah chance engemawzat insiamin Norwich tlarhnung a chhaihbuai tluan chhuak zak a ni ber.

Minute 61 ah Grant Holt chuan Norwich City tan a head goal a, Holt bawk hian minute 65 ah a head goal teuh leh hle. Mikhual lam hian Liverpool tlarhnung an tibuai hneh thei viau mai a, chutihlaiin Liverpool hmatâwngte an dang zo lo lek lek ṭhin.

Liverpool in chance ṭha tak tak an neih te an thun lo zel a. Injury time-a Andy Carroll head out leh Suarez shot, Norwich keeper in a lo dan te chu uihawm vawng vawng tak a ni. Norwich City keeper Ruddy a khel ‘ropui’ ngei mai. Huntawp thlengin goal dang a luhbelh lo a, Anfield-ah a zawnin game 2 chu Liverpool an chak zo ta lo.

Sawibelh ila

Kaithar Norwich City hian club lian ho an khel thei phian zel mai. Stamford Brigde-ah Chelsea an lo tibuai fe tawh a, Old Trafford-ah Manchester United an chhaih buai hneh hle bawk a nih kha. Tunah Anfield-ah Liverpool an draw leh tawh a, chakna goal thunna chance pawh an nei ve nual a ni. An game hi a ‘direct’ a, midfield aṭangin winger te ball an pe a, ball an cross luh chu striker palian ten an lo châng ṭhin. Game mawi tak chu a ni hauh lo a, mahse point 12 lai an hmuh tawh avangin game plan ṭangkai tak a ni tih hai rual a ni lo thung. Norwich City leh Stoke City te hi an khelh dan inanna lai tam tak a awm thei awm e.

Liverpool an chak zawh loh nachhan chu an ‘vanduai vang’ a ni. Suarez ringawt pawh khan chance ṭha lutuk vawi 6 vel a nei a, an hmatâwng te ‘luck’ ní chu ni se Norwich City in si an phur nual ngei ang. Mahse club lian na na na chu an chungah beiseina a sâng lo thei lova, tuna point 2 an hloh hi nakinah an la ui viau ve thei tlat. A bik takin first half-a an game kha Liverpool ‘glory days’ an tih mai, 1980s vela an game nen an tehkhin ṭhin chu a ni.

Liverpool squad hi han en ila, first XI ah ngat chuan Premier League-a team ṭha ber pawl an ni. Tuna an mamawh nia lang chu bench aṭanga game rawn thlak danglam thei, substitute ‘ṭha mi’ a ni awm e. Chelsea chuan substitute-ah Malouda, Drogba, Anelka/ Sturridge te ho an nei a, Manchester City pawhin Johnson, Balotelli, Tevez tih vel an nei. Inhliam neuh neuh an la nei dawn a, Premier League champion tum tân chuan an squad hi a pan deuh maithei. An dam kim erawh chuan eng team pawh hneh thei turin an ṭha tawk thung.

Premier League-a striker ṭha ber Suarez?

Manchester United fans te chuan Wayne Rooney an duh zawk ngei ang a, Arsenal fans te pawhin Robin van Persie an neih thu an sawi ang. Mahse Luis Suarez tluka striker ball thiam leh che rang, fing bawk si hi tun dinhmuna Premier League-ah an awm lo. He Uruguayan striker hi season tluana inhliam lova a khel thei a nih ngat chuan Liverpool hian top 4 an beisei ngam loh na tur a awm lo. Nge champion hial an beisei ngam zawk dawn? Game 29 an khelh leh ang a, a chhânna kan hre thei dawn e.

Chance ṭha tak tak a thun lo erawh a ui ve vawng vawng viau ang le.