Carling Cup 2012 champion Liverpool manager Kenny Dalglish chuan Ningani khan chanchinbumite kawmin, captain Steven Gerrard chu England leh Netherlands an inkhelh ṭuma a inhliam avangin kartawpa Arsenal nen an intum hunah a khel ve thei lo maithei tih a sawi.

Wembley stadium-a England in Holland an hneh loh ṭuma thlak ngai Gerrard hi a hliam na lem lova. Ningani hian club doctor ten a dinhmun an enfiah hnuah a hmalam hun tur a chiang thei ang.

Dalglish chuan, “Tunah hi chuan engti chiaha na in nge a inhliam ka hre lova, chuvangin Arsenal a hmachhawn thei dawn nge dawn lo pawh ka la hre bik lo. Tuna rinthu lo sawi ai chuan medical team-in thuchhuah an siam hun lo nghah mai hi a finthlak zawk a ni.” tiin chanchinbumite hi a chhang.

Agger a chiang

Inrinni-a Liverpool in Arsenal an mikhual hunah khel thei lo chiang tur a awm a, chu chu Liverpool defender rinrawl Daniel Agger a ni. Carling Cup final-a Cardiff City an hneh ṭuma inhliam Agger hi a âwmruh a khi a (fractured rib), kar engemawzat a chawlh a ngai ang.

“Tupawh inhliam se, an uihawm em em vek tawh a. Daniel (Agger) hi tunkumah a khel ṭha em em a, mahse a ni chauh lo pawh, tun dinhmuna inhliam leh fit lo zawng zawngte hi chu an uihawm vek a ni. A ni hi a âwmruh a khi a, chuvangin kar engemawzat chu a chawlh ngei ka ring.” tiin Liverpool manager chuan a sawi.

“Inhliam te, hrem tawk leh chhan dang vanga khel thei lo te cover turin squad kan nei a, Daniel (Agger) pawh hi engemaw chen chu kan cover rih a ngai dawn a ni. International break hnuah training kan la neih loh avangin Arsenal nen kan intum huna khel thei tur hi ka la la hre thei lo a. Player 12/13 vel ram tâna khel kan nei a, an rawn lêt kim hun nghah phawt a ngai dawn a ni.” tiin a sawi.

Skrtel leh Agger te inkawp hi Premier League-a central defence suttlang har berte zing ami a ni a. Agger tel loin Liverpool tlarhnungin Robin van Persie an dang zo angem?

source: liverpoolfc.tv