Mo Salah hian Liverpool ah 2023 thleng contract a ziak a, a contract neih mekah hian a karkhat hlawh chu £200,000 a ni a, Liverpool player zingah Thiago nen an hlawh zat a in ang a, an ni aia tam chu Vargil Van Dijk niin a ni hian kum 2025 thleng Liverpool a cham tur leh kar khatah £220,000 hlawh turin a sign.

Liverpool hian tun nipui transfer ah Ibrahima Konate bak an lalut lo a,chutih rualin an player tha te sawhngheh lamah tan an la a – Van Dijk, Arnold, Robertson, Henderson, Alisson te hun rei zawk cham turin contract an ziahpui thei thung.

Mo Salah hi season 4 kalta ah Roma atangin Liverpool ah £35 ML in a lut a, a luh lai chuan player vantlang nimahse Jurgen Klopp-a’n a hmang thiam bawk a, season tin Premier League a goal thun hnem ber pawl a ni chho ta a, Liverpool a luh hnuah UCL, Premier League, Club World Cup, UEFA Super Cup leh mimal chawimawina hrang hrang a dawng hnem tawh hle.

Kum 36 mi Cristiano Ronaldo chu Juventus atangin Man Utd ah lokir in Premier League player zingah hlawh tam ber a ni dawn a karkhatah £510,000 a hlawh ang a, Man Utd player zingah hlawh tam ber dawttu David De Gea hian £375,000 a hlawh mek a, an inthlau hle. Man City hi player hlawh pe tha ber zing a mi an ni a an thiam puipa Kevin De Bryne hian karkhat ah £400,000 a hlawh mek a, Jack Grealish leh Raheem Sterling ten £300,000 an hlawh mek thung. Chelsea a kirleh Romeu Lukaku hian kar khatah £325,000 a hlawh a, Chelsea player zing a hlawh hnem ber a ni.

Mo Salah hian a hlawh let aia tam a phut ta mai hi khelmual a chet dan leh Liverpool tan a tangkai zia ngaihtuahin thilmak a ni hran lo na in, hetiang a sang taka nawr tuah hian a agent Ramy Abbas Issa an puh ve mek bawk. Mo Salah hi kum 29 a ni ve tawh a, 2023 thleng contract a lo nei ve bawk nen, a hlawh ngai hlawh turin kum hnih a lo ber ah Liverpool ah contract ala sign avangin chhuak duh pawh nise Club in an duhthusam sum a hmuh let loh chuan chhuah an phallo ve thei bawk a, chutih rualin Liverpool hian kum 30 pel tawh player te hi hun rei tak contract ziah pui lo a, season an chetthat dan azirin kum hnih khat bak an zawrh meuh lo thin a, heihi Henderson pawhin contract a sign mai loh chhan pawh a ni.

Salah hi a duh ang £500,000 karkhat hlawh turin Liverpool in an sign pui thei a nih chuan, a sang fal dawn hle a, club kalphung pawh a pel duai ngei dawn bakah kum 30 a hnaih chho tawh bawk nen, a contract thar tifel turin hi hun rei deuh hlek pawh a awh a rinawm ta hle a ni.