Player thar Charlie Adam :
English club lian Liverpool an inla tha zel a, Blackpool Scottish midfielder Charlie Adam chu £9 million in an lei. Adam hian medical test a nei leh phawt ang a, a paltlang a nih chuan Kenny Dalglish manager a nih hnua Liverpool player thar palina a ni anga, season tharah Liverpool kawr a ha tawh ang.
Charlie Adam Kum 2009 ah Blackpool hi zawmin Premier League-a an kaisan na kawngah a thawhhlawk hle a, season hmasa pawh khan an player pawimawh ber niin PFA Player of the Year dawng thei tura nominate zingah a tel hial a ni. A passing a tha a, freekick leh corner pet thiam tak a ni tel bawk. Blackpool-a a awm chhung hian goal 34 a thun a ni.
Tunhnaia beisei pha lo Liverpool an tang a, January thla-a striker Suarez leh Caroll an lei hnuin midfielder pahnih, Henderson leh Adam an lei leh ta. Club neituten sum an nei a, player tha tak tak Gerrard, Lucas, Meireless te ho an awm sa tawh bawk a, season tharah Liverpool midfield hi a chhe dawn lo. English Premier League a hmuhnawm dawn e.
Glen Johnson, contract thar
Liverpool tan chanchin lawmawm dang a la awm cheu a, right back Glenn Johnson chuan contract thar ziakin Liverpool tan a rinawm zel. Johnson hian season hnih chhungin game 70 a khel tawh a, season hmasa phei kha chuan Liverpool defender khel tha ber a ni awm e. Defence dinglam leh veilamah a khel thei ve ve a, hmuhnawm thamin attacking game a khel thei bawk.
Liverpool FC Director of Football Damien Comolli chuan thuchhuah a siam a, “Johnson hian a vanglai a la hmang dawn chauh a, a hmalam hun Liverpool-a hmang tura thutlukna a siam hi kan lawm hle a ni. Kan sawi fo tawh angin kan player tha ber berte hi hralh kan duh ngai lo a, Liverpool-ah an hlim a nih phawt chuan kawl reng theih hi kan duhdan a ni. Johnson hi kan player tha ber te zing a mi a ni a, kan hnena a awm hi a lawmawm hle a ni” a ti.
Player thar an lei a, an player neih sain contract thar a ziak bawk. Liverpool beiseina a sang a, season thar hi an ‘kum’ a ni tawh angem?
Charlie Adam hi midfielder tha pangai tak niin ka hria a..free kick phei chu epl ah hian a thiampawl a tling hial in ka ring. Squad player mai nge a nih ang star player tih chu hunun a la hril turah ngai ila. Liverpool hian midfield player hi an ngah riau mai a, Henderson lo lut nen , a rualin 2/3 bak khelh theih bawk si loh. Player tangkai vak toh lo thenkhat chu an chhuahtir nual a ngaiin ka ring.