Kumin March 11 Champions League-a Liverpool leh Atletico Madrid inkhel kha Liverpool khuaa novel coronavirus darh chhan a ni thei awm anga sawi a awm mek a. UK deputy chief scientific adviser Angela McLean chuan ‘Liverpool leh Madrid-a virus leng vel hian inzawmna a nei em tih hi nakin zel atan pawha thil chhui chian chakawm tak’ a nih thu a sawi.
Anfield-a The Reds in Atletico an lo mikhual țum khan a hmunah mi 52,000 chuangin an en a, an zinga 3,000 chu hrileng avanga ‘partial lockdown’ an kalpui mekna Madrid ațanga rawn fehchhuak an ni.
Liverpool city council director of public health Matthew Ashton chuan kha match kha lo țhulh ngei ngei tur a ni a sin le, tiin Madrid mayor Jose Luiz Martinez-Almeida pawhin Atletico fans 3,000 te kha an zin phalsal loh tur a lo ni, a ti ve bawk.
Madrid hi hrilengin a tuam nasat Spain-ah a hluar zualna hmun a ni a, Liverpool NHS Hospital-ah covid-19 vangin mi 246 an thi tawh bawk.
UK sawrkar hi hrileng chungchanga hma la har tia sawisel niin March chawlhkar hnihnaa ni 4 awh Cheltenham Festival an buatsaih leh Champions League an la kalpui te, Cheltenham Gold Cup neih an țhulh duh lote chuan dem a hlawh.
Tarlan tawh angin Liverpool leh Atletico Madrid inkhel hi mi 52,000 chuangin an en a, Cheltenham Festival ah hian ni li chhungin mi 251,684 an pungkhawm a, March 13 a neih Cheltenham Gold Cup hi a hmunah mi 68,500 in an chhim bawk.
UK ah hian hrileng laka invenna tur hrang hrang, Ina tawm-im, dawr khat, punkhawm loh tih ang chite hi March 23 ațangin an kalpui ve chauh!!
Tun dinhmunah a hri kai 124,743 awm tawhin mi 16,509 in an thihpui tawh a, an prime minister leh health minister te pawh hri kai zingah an tel a ni.
