Liverpool leh Klopp ??- Zosangliana Khawlhring

Football team ah hian eng nihna nge pawimawh ta ber ta ang le? A tlangpuiin Mizote hian football chu kan tuipui viau a, chhungril takah erawh kan hriat a tlem viau thung niin a lang a, thian hova awmkhawm tawh na ah erawh chuan a hre ber pawl kan ni tlangpui a, chutihrualin coach leh manager nihna te hi kan thliar hrang thiam tawk em tih leh English club Liverpool chungchang tlem thlir lawk ila a tha awm e.

Mizoram a kan kalphung deuh ber ni a lang chu coach in team a enkawl ang a, manager a inrawlh tur a ni lo tih hi kan pawm dan tlangpui niin a lang. Chutihrualin club hrang hrangin kan kal dan phung anih chuan han sêl chiam erawh a fuh ber lo thei bawk a, Premier League vel ah chuan coach tih tawngkam hi hman lar a ni vak lova, manager tiin TV velah chuan kan hmu tam hle awm e. Ni e, anni chuan coach hna leh management hi an khawih kawp tlangpui vang niin a lang a, manager leh coach a hran a dah hi team kal zel naah thil thaber a ni lem lo thei a, chumi tilang tur chuan Liverpool kal dan hi tlem tarlang lawk ila a tha awm e.

Liverpool FC hian hun reitak coach leh manager an kal hran tir a, coach duh loh player an lak pawh kan hmu fo awm e. Tunah erawh an ni bik tawh lova, Kum tir lama kan sawi nual tawh avangin helam chu duhtawk phawt ila a tha awm e.

Football khawvel ah media te an chak tawh hle a, thenkhat an fakin thenkhat nasa takin an sawisel bawrh bawrh a, footballer zingah media lama an chanchin vawrh nasat lutuk avanga tlachhe ta leh insiamthat nana hmang pawh an awm nuk reng a ni.

Tun hnai kum hnih khat lek ah English club enkawl turin khawvela coach tha rual England-ah an lut khawm ruih ruih a, sum an ngah hlawm si a, eng team nge champion ang? eng team nge sum hmang hnem? eng team ber nge sum renchem thiam tih pawh ngaihven tham a tling hle a, thenkhatin player tha sa leiin nomawi chawi an tum hle a, thenkhatin mahni player neihsa leh academy player hman tangkai tum theihtawp an chhuah ve mek bawk a, English club bikah chuan club hausa vak lo pawhin an mamawh chuan sum an theh chhuak mai a, season tinin player lei nana sum che vel a hraw chho telh telh a, tun tum ah hian champion tura rin ni ngai lo Liverpool bawk hi han sawi leh dawn teh ang.

p160814-050-arsenal_liverpool-600x419

Liverpool hian season tir fixtures fuh tawk loh avangin beisei an nei sang vak lo ti ila kan sawi sual tam awm lo ve. An game hmasaber ah Arsenal an hmachhawn dawn khan Liverpool chak ring an tlem hle ang tih a chiang a, mak tak maiin Arsenal home ah ngei 4-3 in an chak a, Liverpool fan-te beiseina a san lai takin Burnley lakah 2-0 ngawt maiin an tlawm zui leh nghal a, mi tam zawk chuan an ze ngai an chhuah leh tawh tiin sawiselna awrawl a ring hman hle a, Burnley laka an mualpho hnu ah mikhual team tana khelh harsatna hmun White Hart Lane-ah Tottenham chu 1-1 in an draw pui leh a, Liverpool coaching staff lam tan pawh lu a hai mup mup dawn tih a chiang hle a ni.

Amaherawhchu mak tak maiin Liverpool tak tak kan hmuh tanna chu a in tan dawn chauh alo ni reng a. Champion lai Leicester City chu 4-1 laiin an sawp zui a, an che fuh leh lovang tia mipuiin Liverpool ke chheh sual an chân mek laiin Chelsea chu 2-1 in an hneh leh a, Burnley laka an mualpho tih loh kha chu mumang ram ah cheng zuiin tuna an game khelh dan thlir chuan champion tura rin kai zingah an tel ta hial a ni.

Liverpool team khelh dan hi uluk taka thlir chuan team work tha tak nei an ni a, an thawkrim em em bawk a, match nga an khelh zawh hnu khan kilometer 581.6 teh meuh Liverpool player te hian an tlan hman a ni. EPL team a tlan hnem ber an nih angin team in hnehna an chan pawh hian superstar ti a mimal han sawivul tur an awm ngai lova, team anga an khelh miau avangin player khel tha fal han thur chhuah mai tur pawh hi an vang hle a ni.

Liverpool player te zingah a mimal tak a han fak dawn chuan Coutinho hian fak a phu ber ni a ngai kan tam berin a rinawm. Coutinho bakah Firmino, Mane Sturridge te hi sawi hmaih theih an ni lova, position hrang hrang a khelthei player an kawl teuhna hi Liverpool chakna thuruk niin a lang a, 4-3-3 formation-ah False 9 a khel thin Firmino a tangkai a, midfielder dang pathum Henderson, Lallana, Wijinaldum te hi an vai hian an position pangngai lovah tha takin an khel thei a, Wing leh No.10 role play thin Lallana leh Wijinaldum te hi No.8 position ah an khel a, No.8 role khel thin Henderson pawh No.6 role ah thiam takin a khel mai thei zel a, .Midfield Modified player pathum hman hi huaisen thlak viau angin lang mah se Liverpool boss Jurgen Klopp hian tha taka rem khawmin a hmang ngam a, left winger James Milner pawh left back ah a hmang leh a, ( Nikum MPL ah Zo United FC pawhin left winger Lalmama pawh Left back ah an dah a, kumin ah pawh MPL left back tha ber tih ngam khawpin a khel a ni).

Striker tha Sturridge pawh wing lamah an tlan kual lauh lauh phawt a, Firmino pawh a thiamna ber ni a kan hriatna ah a awm ngai meuh lova, result in a tuar anih chuan manager Klopp hian sawiselna a tawk nasa dawn tih a lan chian viau laiin a thluak bur tha tak hmangin huaisen takin an kal miah miah mai a, tun thlengin Klopp hian a tisual lo hle a ni.

Liverpool team kan fak vak phen ah coach Klopp-a thluak hi hmuh hmaih theih a ni lova, player naran mai mai pawh player tha zawkah a chher chhuak thiam hle a, ka fak leh duhna chu player laihaw tih a kan hmuh thin man tlawm zawk a lak theih te hi thatakin a chherchhuak thei hi a ni. A player te theihna a hrechiang hle a, player lei pawh a fimkhurin transfer bazar inhawn lai khan Pound 74.8 million lai player hralh nan a hmang a, Pound 61.9 million vel sengin Pound 12.9 million vel an hlêp niin a lang a, Klopp hian sum hman vak vak hi hlawhtlinna ah a ngai teh chiam lo niin a lang.

Liverpool boss Klopp hian game khelh dan phung nghet tak a nei a, Liverpool manager hlui B.Rodgers te nen a in ang lo hle a ni. Rodgers khan Liverpool hi a champion pui teuh ve viau tawh mah se Tiki-Taka lar laiin Tiki-Taka angin a khelh tir a, Counter Attacking lar hunah Counter-Attacking game a plan leh mai a, player te in siamrem chhung nen duh duh hunah ( I-League ang lo takin) player lak a theih ngawt si lova, ban hial a lo tawh phah tawh a, Klopp hian Gegenpressing, counter pressing te hi Liverpool khelhphung ni turin a siam rem mek zel a,”Lehlam pawl ten ball an hloh hian keiniin kan chang ve tan tihna a ni a, anni chuan ball min laksak leh dan buai min tum lai tak hian thil dang an rilru ah a leng tawh lo a ni. Tha hrui tamtak an hmang a, an hah hma bik a ni. Hetiang hun tha hi kan hman thiam a pawimawh bik a ni.” tiin amah kawmtu chanchinbu mi te hneh ah a sawi nghe nghe a ni.

Klopp-a hnuai ah Liverpool defender te leh attacker te hi in hlat lo takah an awm a, kum 1980 vel a Italian manager AC Milan enkawl tu Arrigo Sacchi-a’n counter pressing a khelh tir khan defender pa li te leh lone striker te kha 25 meters vel chauh in an in hlat a, leh lam pawl tan chet vel na tur a awm lova, khatiang deuh khan Klopp hian Liverpool player te a rem niin a ngaih theih bawk.

Klopp hian Torres, Suarez te ang striker tha a kawl ve lova, a neih that ber Sturridge pawh hliam in a tlakbuak deuh reng a, full time tak takin a la chhawr thei lo. Mahse Klopp a hnuaiah 8.10.2015 a enkawl hun atanga chhiarin EPL team ah Liverpool aia goal thun hnem an awm lova, Liverpool hian Klopp-a hnuaiah goal 73 an thun tawh a, tunge striker ber tih pawh chiang taka han kawh tur pawh a hriat loh hial a, ( team in goal an thun theih loh hian striker tha kan nei lo tih hi chhuanlam a tling tawk lo.) Fak a phu hle rualin tun season ah EPL match tinah goal a chhuah vek thung a, Clean Sheet nei tura hmalak erawh a tihmakmawh a ni thung.

Liverpool defender Lovren, Klavan, Matip te hi rinngam, rinrawl a neih atan chuan Klopp pawh hian a beisei sang vak lo maithei a, midang an awm miau loh avangin hman ngei ngei an tul a, Liverpool buai na lianber tur a la ni.Liverpool hi consistency lo thei em em a, an khelh fuh tum chuan eng team pawh hneh thei khawpa an khelh thin avangin beiseina a sang thin a, team te zawk laka an mualpho zui fo avang hian rin ngam an har hle a ni. gegenpressing game hi team dangin an man thiam hunah buai na an tawk ngei dawn a, attacking game an khel a lehlam in an chuh bawrh bawrh duh loh hunah emaw, BUS park duh team an hmachhawn hun atan plan 2 an nei tawh a ngem? Chutihrualin an boss Klopp-a zarah leh an thawhrim tlanna zarah dinhmun duhawm takah an ding mek a, tun season ah hun reitak chhung an ngah tawh EPL trophy hi chawi ve thei tawh I ring em ?

2016-17 EPL Liverpool chet vel dan

Ball possession 58%
Pass accuracy 85%
Match khat a high ball win 12.3%
Match khat a Goal chance pek zat 8.2
Match khat a Block 2.2
Match khat a ball chuhsak zat 18.8
Match khat a ball dan chah zat 9.7
Match khat a foul zat 10.7
Match khat a goal chance neih zat 19.5
Match khat a shot on target 7.2
Match khat a mimal tlanpel theih zat 14