Season liam ta a Swansea chetthat pui em em tu, Brendan Rodgers chu Liverpool-in an manager thar atan an la lut ta a. Ani hian Kenny Dalgish-a kalsan tak hnaruak  chu chelh turin kum 3 atan Liverpool hian contract an ziah pui dawn ta a, he hi Liverpool-in kum 2 chhung a manager pali an thlak na chiah a ni. Rodgers hian Swansea City lamah kum thum leh a chanve lai contract ala nei a, chumi avang chuan Liverpool club neitu, Fenway Sports Group (FSG) chuan Swansea hnenah hian ‘zangnadawmna’ £5 million vel bawr an pe dawn a ni.

Liverpool-in an manager Kenny Dalgish an ban hnu khan a thlaktu tur atan Wigan boss Roberto Martinez te, Chelsea manager ban tak Andre Villas-Boas te, Brendan Rodgers te, Frank De Boer leh Jurgen Klopp te ho hming a ri ring hle a. Martinez leh midang dang in Anfield lama an kal loh tur thu an tih chian hnu ah Liverpool hian Brendan Rodgers hi an ruat ta a ni. Liverpool manager tura rin kai ber Martinez hian Liverpool in relbawl dan thar, Director of Football hna mi pathum (director 3) in an in sem tur chu duhlo in, director pathum te hnuai a thawh hi a duh lo niin an report bawk. Hei hian Brendan Rodgers-a tan hmunawl siam in ani hian Liverpool manager hna chu ala dawn ta a ni.

Tunge Brendan Rodgers chu?

Kum 39 a upa, Northern Ireland a piang Brendan Rodgers hi mi tam zawk ina kan hriat tanna chu tun season liam ta atang chiah khan ti ila a sual awm lo e. Swansea City chu Championship lamah chet that pui in, Preimer League kaisang tur a Championship Play-Offs an khelhna ah Reading chu 4-2 in an hneh a. Welsh club zing a Premier League khel thei hmasa berah a rawn hlangkai ta. Mi tam tak chuan Swansea club chu Premier League atanga relegate leh mai tur ah an dah laiin, relegation zone ah an awm ngai lo a, club lian Arsenal 3-2 te’n an rawn hneh a, Chelsea 1-1 in Stamford Bridge-ah an va draw thei a, season tawp ber match ah pawh Liverpool 1-0 in ah hneh anih kha! Season a tawp meuh chuan table ah 11-na ni in, Premier League a rawn kaisang chauh tan chuan season tha tak a ni.

World-class player tia sawi tur nei lo mahse a player te a chhawr thiam em em a. Nathan Dyer, Scott Sinclair, Danny Graham, Ashley Williams leh loan a Hoffenheim atanga an hawh Gylfi Sigurdsson te chu  player ‘naran’ atang player ‘tangkai’ takah a chhuah thei a, an club chakna hnar ber an ni. Rodgers-a thupui chu ball possession chan tam niin, Swansea kha ball chang tam thei ang ber turin a khelhpui a. Season liam ta khan Swansea passing statistics kha Arsenal leh Manchester City hnuai ah chiah an awm a, ball an in pass nasa tih a chiang reng mai. Game 14 lai an Clean sheets (goal chhuah loh) thei bawk a, record tha tak a ni.

Rodgers-a ‘mentor’ chu Jose Mourinho niin, Chelsea a Mourinho hunlai khan Rodgers hi reserve team coach turin a lalut a. “Mourinho khan kan pahnih ah in an na tam tak a hmu a. Football kan ngaina dun em em a, a in relbawl dan, tumruhna leh taimakna ah te kan in ang a. Ani (Mourinho) pawh manager anih hma in club lian ah a thawk phawt a, kan birthday(Jan 26) thlengin a in ang a ni” tiin Mourinho chungchang a sawi. Chelsea reserve team a chetthat pui avangin 2008 khan Championship team Watford- in an manager atan an ruat a. 2009 ah Reading manager atan lakluh leh niin, Reading hi a chetthat pui teh chiam lo a, 2009 kum vek ah a bang a. Mahse July 2010 ah Swansea City chuan an manager atan ruat in, heta tang hian hnunglam a hawi kir leh tawh lo.

Brendan Rodgers hian BPL-a a season vawi khatna ah record nei tha in che tha viau mah se club lian leh hlun Liverpool a enkawl tawh dawn a, a neitute leh fans te beiseina chu a sang lehzual ngei ang. King Kenny-a khan Carling Cup te lakpui mah se, table ah 8-na niin, Champions League khelpha tur in an in pet tling zo si lova. Liverpool hotute mit tlung zo lovin an ban hial anih kha. Engpawh nise Rodgers-a that leh that loh chu season tharah a rawn lang a nga, Liverpool fans ‘ti lawmtu’ nge anih anga an ‘lungngaihna’ belhchhahtu tih chu ilo thlir phawt mai teh ang. Anfield-ah ‘harhtharna’ thlen thei tak maw?