Tunlai chu Liverpool in chanchinthar an ngah deuh a, transfer ah Liverpool club leh player te hming a lang deuh chhen a, rinlawk ang ngeiin Craig Bellamy chuan Cardiff City a zawm fel tawh a, Swansea City midfielder Joe Allen chu Liverpool player thar tiin a sawi theih ṭep tawh bawk. Chu zawng aia Liverpool ṭantute beng titlaitu tur chu Europa League qualifier a Gomel 3-0 (4-0 aggregate) a an hneh hi a ni ang.

Contract thar nen Suarez. 

Liverpool hian first leg ah 1-0 in hma an hruai sa tawh a, Anfield-a second leg khelhah hian FC Gomel hian an khan lo kher mai a, striker lei thar Fabio Borini chuan Liverpool goal khatna a thun a, Steven Gerrard leh Glen Johnson ten an thun ve bawk. Suarez hian pet goal lo mahse assist pahnih a nei a, FC Gomel defender ten ven ngaihna an hre lo a ni ber. Liverpool player zinga khel ṭha ber a ni a, hmanni lawka kum 2017 thleng contract thar ziahpuitu Liverpool hotute an lawm ang a, Liverpool ṭantute an lawm lehzual ang.

He inkhelah hian Manchester City lei tum Daniel Agger chuan minute 90 a khel a, striker tharin a pet goal bawk a, Liverpool lei tum Swansea City player Joe Allen chu inkhel entu zingah a tel bawk.

Inkhelh zawhah Liverpool manager Brendan Rodgers chuan Suarez chungchang sawiin, “Player ropui tak a ni tawp mai. Training na-ah pawh a khel ṭha a, box chhungah a hlauhawmin a fing em em a, ball a chan loh laiin a chuh lamah a ṭangkai hle bawk. Ka player duhzawng tak a ni a, football a hmangaih a, inkhelh nuam a ti em em a ni. Steven Gerrard leh Fabio Borini te nen an inman em em a, an pathum inthlâwp kual vel kha a pui hle a ni.” a ti.

Suarez hi Olympics football tournament-ah a khelh avangin Borini te ho nen khelh hona hun a la nei mumal lova, chutichungin an inman nghal hle. Gerrard-Torres combination ropui kan vuiliam tawh a, Suarez-Borini combination inṭanna a ni thei angem? Game khat chauh a la ni a, an tumpuite hi team ropui pawh an ni hauh lo, mahse tlarhmaa anni pahnih inkawp hi a hlauhawm dawn tih chu sawilawk ngam a ni e.

Joe Allen Anfield ah?

An invehthlem chhung a rei ta bawk a, Swansea City midfielder Joe Allen chuan Liverpool a zawm dawn ta nge nge niin a lang. Inkhelh zawhah Liverpool manager Brendan Rodgers chuan, “Helai hmuna inkhel a en khan Swansea City nen kan inbe tawh ngei tih a tilang a, tun aṭanga darkar 24 chhungin tihfel hman kan inbeisei” tiin a sawi.

Kum 22 a upa Allen man hi pound maktaduai 15 vel a ni a, Welsh footballer awm tawh zinga manto ber a ni ang. Liverpool ah a lût a nih chuan, Charlie Adam leh Jordan Henderson te aia ball fing leh hlauhawm pechhuak tam zawk thei tura ngaih a ni. Kum 9 leka a nih lai aṭangin Swansea City ‘naupang’ a ni tawh a, Swansea first team tân vawi 150 chuang a lo inlan tawh a ni.

Bellamy Cardiff City ah

Craig Bellamy chuan Zirtawpni khan Cardiff City player thar ni turin medical a paltlang a, ‘Bluebirds’ ah hian kum hnih chhung contract a ziak a ni.

Bellamy hi kum 33 a ni tawh a, hunrei tak a inkhel thei tawh dawn lo tih a chiang a, a huntawp lamah a nupui fanaute bula awm theihna club ah a lut ta a ni. Liverpool ah khan karkhatah pound 90, 000 a hlawh a, Cardiff City ah hian karkhatah pound 35,000 a hlawh ang. Kum 2010-11 season khan Manchester City player ni chungin Cardiff City ah hian loan in a lo khel tawh a ni.

Cardiff City chuan an club official website ah, “Cardiff City Football Club chuan lawm tak chungin Craig Bellamy a lo lawm a, Craig hian Cardiff City hmachhawpte tihhlawhtlin duhna thinlung a pu tih a chiang a, he club tâna a tihtheihte hmuh hun kan nghakhlel tawh hle a ni.” tiin thuchhuah an siam.

Cardiff City hian 2013-14 season ah Premier League an khelh phak chuan Liverpool hnenah pound maktaduai 1 an pekbelh leh dawn a ni.