Midang tana tangkai nih an tum tihlawhtlingin vawiin khan Liverpool FC Fan Club, India, Mizoram chuan a mamawhte tana hman turin Civil Hospital, Aizawlah thinsen unit 22, hmeichhia 2 leh mipa 20 ten an pe.

Liverpool FC Fan Club, India Vice Chairman Lalrinchhana Tochhong chuan midang tana tangkaina an neih theih dan tur an lo rel tawh angin vawiin khan a thlawnin thisen an pe tih a sawi a, hetianga midang tana tangkai taka hmalak zel an tum tih a sawi. Lalrinchhana chuan August 15, 2007-a din Liverpool FC Fan Club chuan football bakah khawtlang leh ram tana thawhtheih an neih ang ang thawh zel an tum tih sawiin tun hi an bul tanna chauh a ni a ti a, kumthar lamah chhunzawm an tum tih a sawi bawk.

Kumin June thla atang khan Aizawl Civil Hospital Blood Bank chuan a thlawna thisen pe te avangin rulh ngai lovin damloten a thlawnin thisen an dawn phah tih Blood Bank Doctor, Dr. Lily Y. Chhakchhuak chuan kan palai a hrilh. Vawiina Liverpool Fans te rawn pek nen hian kumin chhungin thisen unit 9753 kan dawng tawh a, hetianga mi tlawmngaite avang hian damlo tam takin damna an lo chan phah a, mitlawmngaite hnenah lawmthu kan sawi rualin a thlawn liau liau-a thisen pek uar zel turin mitinte kan sawm a ni, a ti bawk.

A pumpuiah nikum aiin kuminah thisen pe 116 in an tam zawk a. Nikum khan a pumpuiah mi 9637 in an pek laiin kumin ah mi 9753 in an pe a ni. Kumin hian a thlawna thisen pe hi mi 1404 in an tam zawk a, za-a 80.54 in an pe a, thisen hman puk rulh lehna atana pe za-a 19.46 an awm bawk a ni.

Kumin chhung hian Blood Bank hnathawkten blood donation camp vawi 133 neiin vawikhata mi 51 zelin pe ang an ni. Kumtharah damlo thisen mamawh ten a thlawna an dawn zel theihna turin blood bank thawktute chuan mithahnemngai ten a thlawna thisen an pek chhunzawm zel turin an ngen nghal bawk a ni.