L&L Memorial Trophy vawi 12-na final-ah FC Kulikawn chuan MRP FC 5-2 a hnehin an champion a. FC Kulikawn tan hian C. Zothansanga chuan hattrick a siam bakah Lalhungchhunga leh Suresh Singh ten goal khat ve ve a thun. MRP FC tan hian Sama Hnamte chuan penalty atangin goal hnih a thunve bawk. Champion team FC Kulikawn hian Trophy bakah Rs 70,000 an dawng a, pahnihna MRP FC hian Rs 35000 bakah Trophy an dawng bawk. Fair Play Award chu Darnam FC, Serchhip hnehah hlan niin he award hian Rs 5000 a keng tel a. Top Scorer chu MRP FC Striker F. Lalrinpuia (Valpuia) niin goal 12 a thun a, Best Player-ah C. Zothansanga (Valtea) thlan a ni bawk. Best Player leh Top Scorer te hian Rs 1000 ve ve an dawng a ni. He tournament-ah hian goal 155 a lut a, yellow card 98 phawrh bakah mi 12 in red card an hmu a ni.

MRP FC Coach Pu Joseph-a chuan ZoFooty hrilhin,”Kan vanduai pawh a ni lo, kan hnehlo a ni. Kan tumpui (FC Kulikawn) ten chak an phu zawk hrim hrim-ah ka ngai. Kan fitness la inrual tawk lo chu kan chaklohna chhan a ni thei awm e” tiin ZoFooty a hrilh.

FC Kulikawn Coach Athanga chuan ZoFooty hrilhin,”Vawiin chu kan kheltha kher mai, chak pawh kan phu viau chuan ka hria” tiin an khelh danah a lungawi thu a sawi a, penalty chunchang sawiin,”An penalty hmasa zawk kha chu a awm lo deuh chuan ka hria, amaherawhchu a pahnihna kha chu a awm khawp mai” a ti a. A player te fak chhunzawm ngalin,”Vawiin chu Valtea a kheltha khawp mai, a chance neih zawng zawng goal-ah a chantir a tih theih a. Kan Manipur player Suresh pawh a kheltha a, a tlan taima em em a, goal khat a thun nghe nghe. Kan foreinger erawh semifinal a khelthat loh avangin kan lut tir lo” a ti. MRP FC an khelhthat loh thu sawi telin,”An kheltha lo hlawm khawp mai, anni lamah chuan Valpuia chiah a kheltha ni berin ka hria. Ani chu kan defender te tan pawh a hnawksak a. Penalty pawh hi a hlawhchhuah a ni nghe nghe” tiin ZoFooty a hrilh.