L&L Memorial Trophy Semifinal-ah Mizoram Police chuan Luangmual FC 5-1 ngawtin an hneh a. Semifinal pakhat zawkah FC Kulikawn leh 1st MAP Academy te hun pangai a an indraw hnuin, penalty shootout-ah 3-2 in FC Kulikawn an chak. Final hi ni 20 September 2012 (Ningani)-ah khelh a ni ang.

Mizoram Police FC 5-1 Luangmual FC
(Sama Hnamte 5′, 45+’; F. Lalrinpuia 69′, 82′; Lalnunmawia 80′) (Isaac Lalrinngheta 67′)

Mizoram Premier League Club pahnih inkhelah MRP FC chuan first half-ah penalty vawihnih hmuin Sama Hnamte hmangin Goal-ah an chantir ve ve a. Heng penalty te hi Luangmual defender Mamawia handball (?) vang leh F. Lalrinpuia (Valpuia) penalty area chhunga an tih tluk vang a MRP FC ten an hmuh a ni.

Second Half-ah Luangmual in Isaac Lalringheta hmangin chhang let mahse MRP lamin Valpuia goal hnih leh Nunmawia goal ten Police tan an thun leh tak avangin MRP te hi 5-1 ngawtin an chak ta a ni.

Luangmual Manager Muanpuia chuan ZoFooty hrilhin,”Kan chaklo a, sawi tur a tlem khawp mai. First Half-ah penalty vawihnih ngawt an hmu a, Mamawia hi handball lovin a lang a, Valpuia penalty hlawhchhuah pawh hi referee in a ham awlsam mah mahin ka hria” ” a ti.

MRP FC Coach Pu Joseph-a chuan ZoFooty hrilhin,”5-1 ngawtin kan chak a, mahse game-ah chuan kan chungnung bik chuang lo. Keini lamin attacking game kan khel a, anni lamin midfield game an khel a, ball an in pe tam a. Mahse keini lam chuan kan chance neih kan thelh lo” a ti a, penalty chungchang sawiin Pu Joseph-a chuan,”Penalty awm tak ve ve a ni, pakhat handball a ni a, pakhat hi chu Valpuia la lut tur an ti tlu a, penalty tur a ni” a ti.

FC Kulikawn 1-1 1st Bn MAP Academy FC
Penalty Shootout-ah FC Kulikawn 3-2 in an chak.
(C. Zothansanga 79′)(Isaac Hmingthansanga 48′)

1st Bn MAP Academy chuan Isaac Hmingthansanga penalty hmangin hma hruai mahse FC Kulikawn lamain minute 10 vel chiah a awm tawh tihin C. Zothansanga (Valtea) hmangin an chhang let a. Penalty Shootout-ah FC Kulikawn Keeper Ramhlunngaia’n (Angaia) vawi thum ngawt save in a team FC Kulikawn a chakpui ta ni.

FC Kulikawn Coach Athanga chuan ZoFooty hrilhin,”Goal kan thun thei thlawt lo a ni, kan nawr ber vek a. Anni lamin counter attack atanga penalty rawn hlawhchhuakin kan lamah an rawn thun a, kan vanduai thelh a ni” a ti. An player thar chungchang sawi telin,”Vawiin chu kan striker Kingsley a nil khawp mai, Suresh pawh a che theilo” tiin a sawi a, final a tumpui tur MRP FC chungchang sawi telin,”Police lam khan an hneh hran chuang lova, an inhnehtawk viau chuan ka hria. Champion turin kan kal a, police hi kan hnehlohna chhan tur ka hrelo” a ti.