LONDON HMARVENG-AH LAIPUI VAWI HNIH A PUAK – Lawmkima Hmar

Arsenal 2-0 Tottenham 
Mustafi 36’, Sanchez 41’
.
North London Derby match-ah chak phu Arsenal chuan an te lo a ni tih lantirin si hnih faiin Tottenham an lo tukzal a, team pahnihte inthlauhna hi point khat chiah a ni ta.
.
Colombian defender Davinson Sanchez chu Chile forward Alexis Sanchez lakah foul in Tottenham fan tia sawisel thin referee Mike Dean chuan free-kick a pe! Mahni mual hmangthiam Arsenal tan free-kick atanga ball lo kal chu German defender Shkodran Mustafi chuan tauhin goal ban a tawk feihin a goal a, Spurs keeper Hugo Lloris tan en mai loh chu tih ngaihna dang a awm lo. Mustafi hi a offside hlekin a lang (?).
.
Goal an thun atanga minute 5 liam felah Alexis Sánchez chuan 6 yard chhung atangin Alexandre Lacazette ball pek chu a ke dinglam ngatin a thun leh.
.
Second half-ah pawh ball chang tlem zawk (42%) Arsenal an chungnung zawk a, an hun remchang neih erawh a lo thlawnin an luanraltir thung. Mual chhunga lut Sanchez te pahnih dinhmun a inan loh zanah hian damkawr Harry Kane a langsar lo va, damkawr ve tho Mustafi chuan a ak bo!
.
Tunhnai team tha zawka ngaih Spurs in nawr thin mahse Gunners in midfield hnawhchepa an lo dah chah thin avangin mikhual team in hun tha an nei tlem a, goal shot 14 an neih zinga 4 chiah goal zawnah a kal. Chawlhlawk hmaa an goal thun pahnihte hmang hian Arsenal chuan kum 2014 hnu lama a vawikhat na’n (Premier League-ah) an elpui Tottenham lakah hnehna an chang ta a ni.
.
Emirates Stadium-a vawi 12 an lehluh atanga vawi khat chiah hnehna chang thei Tottenham innghahna Harry Kane chuan match fitness a nei lo tih a hriat a, Arsenal keeper Petr Cech a hnawksak pha lo. Hun tawp hma lawka Eric Dier-a ball tauh kawh tak Cech-a lo dan chu a nep lo hle bawk.
.
Tun tumah hian Arsene Wenger chuan a player tha 3 – Ozil, Lacazette leh Sanchez te a hmatawngah dahin a tifuh hle a, tun season-a vawi 3 chiah a ruala a luhtirte hi an hmelmate tan sahar an ni. Mahse, French striker £52m man Lacazette hi hun tawp na’n minute 17 a la awm tihah a thlak leh tho!!
.
Real Madrid leh Liverpool hneh zo hlim Tottenham in Manchester United an hneh loh tum ang thovin beisei an phak lo va, Premier League bika Pochettino hnuaia khual muala club lian an ngam loh chu chhunzawm zelin season laim ta top 6 lakah an tlawm leh ta. Khual muala ‘Big Six’ an tih maite laka hnehna an chan hnuhnun ber chu February 14, 2016 kha niin Manchester City chu 2-1 in an hneh a nih kha.
.
Chhinchhiah atan :
*Arsenal hian an muala Premier League game 11 an khelh hnuhnungah hnehna an chang vek a, February – November 2005 chhunga Highbury an luah laia a zawna vawi 13 hnehna an chan kha an hlat tawh lo.
.
*Pochettino hi London derby a hmachhawnpui hnuhnung vawi 6 ah vawi 4 a tlawm ta a, a hma khan vawi 18 ah vawi 4 chiah a tlawm.
.
*Spurs hi tun season EPL-a an match hmasa 12-ah vawi 3 an tlawm ta a, season liam ta tluan khan vawi 4 chiah an tlawm.
.
*Lloris hian khual muala Premier League Big Six an hmachhawn tumin goal chhuah loh (clean sheet) a la nei lo; match 24 atangin goal 56 a chhuah tawh a, match tina goal 2.3 chhuah ziah ang a ni.
.
*Gunners forward Sanchez chuan league match-a big six te laka a zawna game 11 chhung goal a thun theih tawh loh chu a thaichhia.
.
*September 2014 a Premier League a khelh atangin Mesut Ozil hian midang goal thun tur vawi 45 siamsak tawhin elpha an awm rih lo.
.
* Premier League a Mustafi goal thun 3 te chu Ozil-a siamsak vek an ni.
.
*Kane hian London Derby a khelh hnuhnung vawi 9-ah vawi 7 zet goal a thun ta lo.