LONDON HMARVENG INCHALTAUHNA – Lawmkima Hmar

Zanin tlai dar 6 hian London hmarvengah ennawm mak tak chhawpchhuah a ni dawn a, an nau en zawk tluk lo mek Arsenal chuan an thenawm bengchheng Tottenham an lo mikhual ang.

Arsenal hi hman ata tawha club lian leh ropui zawka ngaih nimahse, tunhnaiah Tottenham in hma an sawn nasat bakah season liam ta phei kha chuan Gunners chung daiha an awm avangin ropui zawk nih an inchuh mek a, tu zawkin nge London Hmarveng awp ang tih chu hunin a hril ang.

Inhliam/dam : Hliam tenau a neih avangin Arsenal centre forward Olivier Giroud a inlan thei dawn lo va, hun hnuhnunga goal thun thin awm loh hi Gunners tan a pawi mai thei. Ani bakah hian defender Shkodran Mustafi leh, Danny Welbeck te dinhmun a chiang lo va, traning zawm tawh mahse game rothap khel tur chuan an fit tawk lo mai thei. Hetih rual hian French striker Alexandre Lacazette a khel thei tawh thung ang.

Spurs lamah rokhawlhna an neih avanga ram tana fehchhuak lo Harry Kane, Dele Alli leh Harry Winks te chhawr theihin an awm dawn a, Crystal Palace an hneh tuma chhawr theih loh goalkeeper Hugo Lloris pawh a inpeih tawh bawk.

Niminpiah atanga training chhunzawm back-up goalkeeper Michel Vorm a dinhmun a chiang lo va, defender Toby Alderweireld chu thla na avangin Christmas hma chuan a inkhel tawh lo vang.

Enge an sawi ?

Arsenal manager Arsene Wenger chu tlang rinloh zawk an ni em tih chungchang zawh niin, “Ni lo, kan ni ngai lo vang. Tottenham hi team tha tak an ni, mahse annni hneh theihna tur khawp thiamna leh theihna kan nei. Chu chu mual chhungah kan lantir bawk ang. Kan mualah kan dehkhirh a, hei hian season tawpa kan dinhmun tur thlengin a hril ang,” tiin Tottenham aia dah hniam chu a duh lo hle.

Tottenham manager Mauricio Pochettino chuan : “Ka ngaihdan chuan, tun ang dinhmunah chuan chak zawk tura beisei zawk tur kan awm lo. Arsene Wenger hi manager ropui tak a ni a, a zah pawh ka zah khawp mai.

“A sulhnu han en ila, Arsenal hi Tottenham ai chuan an chungnung zawk, hei vang ringawt pawh hian zah a phu. Club ngaia kum 5 i awm theih chuan manager tha tak i ni tihna a ni a, kum 10 chuang i awm theih phei chuan i tha hle tihna a ni a, kum 20 i awm thei a nih ngat chuan mi bik i ni tihna a ni,” tiin a khingpui tur lakah a tlawm thiam hle.

Sulhnu leh nunhlui :
*Arsenal hian Premier League-a Tottenham an hmachhawn hnuhnung vawi 6-ah vaiwkhatmah hnehna an chang lo (D4, L2). Club pakhat laka hnehna an chan loh rei ber tum a ni.

*Spurs hian khual muala Arsenal an hmachhawn hnuhnung 32-ah vawi hnih chiah hnehna an chang ve thung (D13, L17); 3-1 at Highbury 1993, 3-2 at the Emirates, 2010.

*Tottenham hian an hneh tawh dawn emaw tih hnuah Arsenal lakah hian point 37 an hloh tawh a, Premier League-a club pakhat laka point an hloh nasat berna a ni.

Arsenal :
*Gunners hian an mual Emirates Stadium-ah a zawnin Premier League-ah vawi 10 hnehna an chang tawh a, an muala an chak zawn rei tum a ni.

*Arsenal hian an muala league match an khelh hmasak 5-ah hnehna an chang vek a, 2009-10 season hnu lama an chet that ber tum a ni, 2007-08 khan a zawnin vawi 6 hnehna an chang.

*Arsene Wenger-a team te hi inelna hrang hrangah a zawnin an mualah vawi 16 an tlawm tawh lo, an hneh loh hnuhnung ber chu Bayern Munich niin 5-1 in an tlawm (W14, D2).

*Arsenal hi kuminah league-ah vawi 10 an tlawm tawh a, Wenger-a hnuaia kum khat chhunga an tlawm nasat ber tum an nihrual chiah. Khawnvartui pawl hnu lawk kum 1995 khan vawi 14 an tlawm.

Tottenham Hotspur :
*Spurs hian season liam ta top 6 te lakah Mauricio Pochettino hnuaiah khual mualah vawi khat chiah hnehna an chang a, point 48 hmuh theihnaah point 9 chiah an hmu (D6, L9).

*Argentine defender hlui Pochettino hian Premier League north London derby-ah tlawm a la nei lo va, Emirates Stadium-a a lenluh hnuhnung 3-ah goal a lut lo vek (W2, D4).

*Spurs hian kumin hian Premier League khual mualah vawi 10 hnehna an chang tawh a, mikhual inthlahrung lo ber an ni; goal 37 an thun nghe nghe.

*Tottenham hi an tlawm a nih chuan thla 11 chhunga a zawna an tlawm vawikhatna a ni ang.

*Harry Kane hian Premier League north London derby a khelh hnuhnung 5-ah goal thun vekin goal 6 a thun.

*North London Derby (EPL)-ah Emmanuel Adebayor leh Robert Pires te khan goal 8 ve ve thunin goal thun tam ber an ni mek.

*Kane hian khual muala league match a khelh hnuhnung 6 atangin goal 13 a thun tawh a, Premier League khual muala a zawna game 4 chhung goal 2 thun tling thei awmchhun ni thei dinhmunah a ding mek.

06:00PM – Arsenal vs Tottenham (Star Sports Select 1 & HD1)

Venue: Emirates Stadium
Address: Hornsey Rd, London N7 7AJ, UK
Capacity: 60,432

Match Officials :
Referee – Mike Dean; Age 49 from Meryside
Assistant Referee 1 – Ian Hussin from Mersyside
Assistant Referee 2 – Eddie Smart from the West Midlands
Fourth Official – Kevin Friend; Age 46, from Leicestershire