Tha zawk dang an awm avanga an tum ram thleng thei lova kum 7 zet an awm hnuah; tha zawkte lehpel a, an tum ram thlenpui thei tura beiseiawm ‘mi bik’ in beiseina sang tak a neih tir a, an hma lam hun a eng viau hriaa phur taka ke an pen laiin, an beiseina chu tih boin a awm thut!
Ni, 2003-2004 season-ah tlawm miah loin an champion a, an ropui ngei mai. Mahse, chu bak chu League no mawi an chawi hlei thei ta lo. An player ropui te an her liam zel a, an thiampuipa Henry-an 2006-2007 season-a hliampui a tawrh a, a kum leha Barcelona a pan takah phei kha chuan, an duhthusam chuan beiseina pe ve thin bawk mah se, Arsenal fans te beiseina kha a nung meuh lo chu a ni. Mahse, beiseina petu pakhat an nei – Van Persie a ni.
Ni, Henry a chhuah hnua Arsenal beiseina tinung chhotu chu kum 2004-a £2.75 million chauh senga an lak luh, Feyenoord-in a man atana an chhiar zat zatve chauha an lei, Dutch winger (Arsenal-a a luh hma) Robin Van Persie a ni. Wenger-an a player thar chu centre forward atan chher a tum thu a sawi a, a hlawhtling.
Thierry Henry te ho thla zar hnuaiah bul rawn tan chhoin, 27 October 2004 khan League Cub 3rd round-ah a competitive debut khelin Man City lakah goal hma hruai a khung a ni. Mahse, Henry a awm avangin Bench-ah a hun tam zawk a hman chhunzawm zel a, inkhel pawimawh lo deuha a start bakah Henry inhliam changin inkhel bul a tan ve thin a ni ber.
2006 November thla khan, 2005-2006 League match-ah vawi 8 a start a, goal 8 a khung, Premier League Player of the Month atan thlan zui a ni! A lawmpuina ang reng deuhin kum 5 chhung atan a contract pawhsei sak nghal a ni!
Hun a kal zel a, 2006-2007 season-ah Henry a inhliam a, hun rei tak a chawlh avangin League match ah a start tam chho va, striker rinrawl ni chhoin League match 22 a khelhah goal 11 a khung. Arsenal innghahna a ni chho va, Charlton Athletic laka a airborne volley goal chu BBC-in goal of the month-ah an thlang zui a, Laipuipu Wenger-an Laipui mu thar a nei nia ngaih a ni a, Arsenal fans ten League title beiseina an nei lian chho tan.
Mahse, an vanduai leh ta! Henry a chhuak fel a, an rinna an nghahna Van Persie chu 2007-2008 season-ah na takin a inhliam a, thla hnih zet a chawl. Regular-in League match 10 (a vaiin 15) chiah a khel a; mahse, goal sarih a khung tho!
Mahse, ngai a rawn awh chho leh a. 2008-2009 season atang chuan hiam tenauin tlak buak zeuh zeuh mah se a hawi kir tawh lo va, goal a khung chho mawlh mawlh a ni ber. 2011-2012 season-ah zet phei chuan League match 38 ah goal 30 a khung a, tlar hnung lam chhah tawk loh vanga goal an chhuah hnem em avangin champion nan erawh a goal khung zozai hi a tling zo ta lo. Mahse, Arsenal fans ten beiseina dang an la nei, chu chu, “Hetiang zel a nih chuan, season tharah tlar hnung kan thuam tha anga, kan champion tawh ngei ang,” tih a ni. Ni, a hunlai kha chuan beisei tur kha a awm a ni, Van Persie an neih vangin!
Arsenal hian Van Persie hi an intatu hliah hliah a, a hming leh Arsenal hi inzawm tlat angah an ngai. A chhan chu khatih laia a dinhmuna dah chhotu kha Wenger a nih bakah, amah Van Persie ngeiin 2009-a contract a pawhsei khan, “Ka thinlung hi Arsenal-ah chauh a awm a, club dang kawr ha tur hian mitthla pawn ka inhmu chhin phal lo,” a lo tih tawh vang a ni!
Mahse, chutiang beiseina neia Arsenal team leh fans ten season thar an thlir mek lai chuan, “Lung i her leh si,” tih hla nen an beiseina an thlah liam leh phawt a tul ta! July 4, 2012 ah chuan Van Persie chuan Arsenal-a a contract a pawhsei loh tur thu a puang a. Pawi ti tak chungin Arsenal fans te chuan Arsenal elpui leh hmelma club-a kal turah erawh an la dah ngam chuang lo. Mahse, August 15-a Arsenal-in Man Utd nen an inrem thu an puan hnu lawk, August 17 ah Man Utd chuan £22.5m senga Van Persie an lak luh an puang a, engkim a chiang a, Arsenal atanga her liam mek Van Persie chuan Arsenal beiseina thui tak a liampui rualin, Arsenal fans ten amah an hmangaihna pawh a liam zui ve bawk.
“Man Utd players, stadium, manager te ka thlir a, he hmun pan tur hian ngaihtuahna ka seng rei lo,” tiin RVP hian a club thar chungchang a sawi zui nghal a, a kal san club chu a huat loh thu leh amah pawh an haw loa a hriat thu a sawi bawk. Mahse, a hre sual tih chu khawvelin a hriatpui ang. Wenger chuan, “World class player kan chan tih ka pawm. Min chhuahsan lai hi en a har; mahse, chelh tur hian tih theih ka nei tlem a ni. Chhan ho te avangin min kal san a duh miau si a, a tel loa chona thar kan hmachhawn a ngai ta a ni,” a ti.
A chhuah chhan hi inrinsiak bak chu chhanna tak tak a awm lo a ni ber a, a lian ber chu hlawh leh Trophy chungchang nia ngaih a ni. Tun hnaiah Van Persie hian Arsenal-in contract thar an offer loh thu sawiin, chuvanga chhuak ta nia ngaih theih turin a sawi a; mahse, a hun laia Tweeter-a a Tweet, an lo screenshot, tun hnaia pho lan pakhat chu, “Hun rei tak ka ngaihtuah hnuah, in hnena ka contract pawtsei lo turin thu tlukna ka siam fel ta,” tih a ni thung.
Engpawhnise, amah ngainatute laka phatsantu tenawm nih hlawh chungin, Arsenal beiseina tam tak nen Manchester khawpuiah a inpu lut ta a nih kha!
