Lung tileng Bolton

Allianz Arena – a Bayern Munich nen 2-2 a an inhnehtawk te, Atletico Madrid hneh a UEFA Cup round of 16 an luh te kha mitthlain a la hmu thei. Hmanni lawka kan hriat thin Bolton Wanderers khan tunah chuan hniam lam an pan zel a, an manager tawn hriat ngah Keith Hill – a’n a chhuahsan ang a, season thar hian League Two (fourth tier) – ah an inlan tawh dawn.

Hmanah chuan…..

Kum 1999 – 2007 chhunga Sam Allardyce – a’n Bolton a enkawl lai kha Mizo te’n he team kan hriat lar ber lai a ni awm e. An club chanchin kan chhui let chuan – kum 1874 a din, England – a Football League dintu club zinga mi, FA Cup – a vawi li champion tawh an ni a, kum 2004 – 2007 chhung khan Premier League – ah 10-na aia hniamah an awm lo.

Champions League nomawi vawi 2 chawi tawh Ivan Campo – a’n Real Madrid chhuahsana Bolton a pan khan kum 28 chauh a la ni a, Nigerian footballer hmuhnawm Jay Jay Okocha khan Paris khawpuia PSG tana khelh aiin Bolton tana khelh hi a thlang zawk.

(Pic : Jay Jay Okocha)

Sawi chhunzawm ta zel ila, tunhnai kum 20 chhung ngawt pawhin footballer lar leh langsar em em – Jussi Jaaskelainen, Mark Fish, Claus Jensen, Kevin Nolan, Michael Ricketts, Youri Djorkaeff, Kevin Davies, Stelios Giannakopoulos, El Hadji Diouf, Les Ferdinand, Fernando Hierro, Gary Speed, Tal Ben Haim, Gary Cahill, Fabrice Muamba, Johan Elmander leh Eidur Gudjohnsen te hian Bolton kawr hi an lo ha tawh.

Allardyce – a hnuaiah club vantlang pawl tak niin club lian te barakhaih an ching bawk a, Reebok Stadium kha club tam tak lenluh chakna a ni lo. Kum 2004 khan League Cup final lutin 2005/06 UEFA Cup Round of 32 an thlen bakah 2007/08 phei chuan Round of 16 hial an thleng pha a ni. Kum 2001 October ni 22 khan si khat an phurh hnuah Manchester United chu Old Trafford – ah 2-1 in an lehthal a, Michael Ricketts leh an star lar Kevin Nolan te’n goal an thun.

(Pic : Old Trafford – ah Kevin Nolan-a’n a goal thun a lawm)

Kum 2007 April thla khan Premier League – ah game hnih chauh khel tur a awm tawh tihah 5-na dinhmun an la hauh pha hial a, mahse chanchin duhawm lo an nei – an manager chhuan em em Sam Allardyce a bang. ‘Big Sam’ a ban hnuah hian club vantlang pawl la ni zui mahse zawi zawiin an che chhe chho a, 2011/12 season tawp khan Premier League atangin an relegate a, vawiin thlengin an tho chhuak tawh lo.

Tunah chuan….

Kum 146 a upa Bolton Wanderers hian an club chanchinah League Two hi an vawi hnih khelhna tur chauh a ni. Kum 2015 chho vel atang khan an club neitu lamah harsatna an nei tan a, sum lamah an tlachhia. Championship leh League One an kar tawn ta sek a, sum lama an club neitute dinhmun a mumal theih loh avangin court hial an thleng ta zak zak mai.

Club lamin player – te hlawh an batsak an pek theih loh avangin player – te hial an nuar ta a, nikum April thla phei kha chuan eitur leh electric supply an neih loh avangin an club training ground an khar hial ! An club neitu Ken Anderson chu fans lamin nasa takin an bei zui a, ani lahin club lei duhtu a hmu zo mai bik si lo.

Nikum July thla a thlen meuh chuan club hian an player te hlawh chawlhkar 20 (20 weeks) chuang a batsak tawh a, season tan dawn khan senior player 3 chiah an neih avangin an youth team an khelhtir tawp !

Heti taka an tluk sawp tak avangin hian ‘administration’ ah lutin Football Ventures (Whites) Limited in an enkawl chho a, season tan dawn khan point 12 an paih sak bawk. An bultan dan a chhe bawk a, season a tawp meuh chuan League One mawngphah niin Bayern Munich leh Atletico Madrid te nena inchapchar thin khan Oldham Athletic tih vel an hmachhawn a tul tawh dawn a ni.