LUNGLEI SUPER 3 FINAL – Lawmkima Hmar

Estimated read time 5 min read

December 22, 2017 (Fri) : Vawiin chawhnu dar khat hian Țhuamluaia Mualah Lunglei Super League 3 final chu khelh a ni dawn ta a, nikum final a lo inhmachhawn tawh Zotlang FC leh Bazarveng FC te bawk an inhmachhawn ang.

An va final tlai ve! : Ni e. An final tlai. Ruahman lawk ang chuan final hi December 16, 2017 a khelh tura ruahman a ni a, amaherawhchu, rokhawlhna rokhawlh tak avangin a hun sawn a ngai ta a ni.

Thawnthu hlui : Zotlang FC hi nikum hmasa LSL Season 1 a champion an ni a, nikum leh kuminah final an lut thei a, an chhe lo tih a chiang.

LSL 1 ah khan Bazarveng FC hian team țha tak ni chung siin beisei an phak lo va, point 9 paihsak an nih avangin an talbuai zui a, chutih lai chuan tuna an coach ni mek Joseph Lalremruata hi ruaiin division hniama tlak an pumpelh a, league laihawlah an invawrhkai leh thei.

Tichuan, LSL 2 rawn champion zuiin kuminah final an lut leh a, tunlai țawng takin an chhe lo.

Sulhnu : Nikum final khan team pahnihte hi an inhnehtawk hle a, hun pangngaiah goal a lut lo. Extra-time second half ah Zotlangin goal thun mahse an hum tluan thei lo va, 1-1 in a tawp. Penalty shoot-out ah Bazarveng FC hian 5-4 in hnehna an chang zui ta a ni.

Amaherawhchu, Zotlang FC hian nikuma point hmu tam zawk ni chunga an champion lo kha an la na, kumin hi phuba lakna remchang a ni.

Player țha vs Coach țha : Bazarveng FC hian Lungleia player țha zawng zawng deuhthaw an kawl a, dream team tih hiala sawi ngam an ni. Amaherawhchu, Zotlang FC hian an coach Zo United pansantu Rozara thlaktu atan Mizorama coach kan neițhatte zinga mi SYS Coach Pu R. Lalmuankima an la a, danglamna thlentu lian tak a ni. Player țha rual awmkhawm leh coach țha inhmachhawnna a ni dawn.

Ha aiah Ha : Team pahnihte hi tunhnaiah chungnung zawk nih tuma inbei reng an ni a, league țan hma daih khan mual pawnah an inkhel tawh!

I-Day champion lai leh MFA Cup quarter-finalist Bazarveng FC hian an elpui, vawi hnih lai MPL Play-off khel tawh Zotlang FC lakah an player țha 2, Mizoram U19 champion team a mi Joseph Lalvenhima leh Benjamin J. Lalrinliana te an chan. Bazarveng FC ngaihdan ni lovin Zotlang FC captain HS Lalremtluanga an chhuhsak ve leh ngat. A la tawp mai lo, season liam taa Bazarveng hmatawng rinrawl Lalramzauva chu club pahnihte hian inchuhin an inhruipawh ngial a, a tawpah Dual Registration avangin player an awh dun em em hi an chan. A chunga thununna hlih a nih hnua goal 9 thun hi Zotlang FC in final khel hman chiah chiahin loan in an la lut. Boruak a sang tisang zual ngei dawn. Zotlang coach hi Bazarveng pa a ni tih theihnghilh lo bawk ila.

Player en bîk turte : Zotlang FC ah hian Subroto Cup 2017 a Mizoram aiawha fehchhuak, semi-final a vanduai ta team a tel 6 lai an awm a, tin, an goalkeeper Lalbiakhlua hi India U16 first choice goalkeeper a ni bawk.

Heng rawlthar tha za rualte hi an aia u hlek Inter District U19 champion team a tel player 3 in an uap leh bawk a, heng mite huikhawm tur hian senior player Lalawmpuia Fanai leh Daniel Lalnunpuia te ho an awm veleh bawk.

Serkawn rawlthar midfielder Lalduhawma a fit a, S. Lalhrezuala a dam țhat bawk chuan midfield ah duhthu an sam dawn a, a hma lamah Ramzauva leh Joseph Lalvenhima te bakah MSa te an awm bawk nen, goalkeeper ball sem hmanga game plan thui nei hian game rang leh tho tak an khelh a rinawm.

Bazarveng lamah MPL a Chhinga Veng FC inpetkaipuia MFA Cup lakpuitu Lalrintluanga a dam a, winger goal 7 thun tawhtu hi player pawimawh a ni leh ang.

Anni kawppui tur hian a hmatawngah Ramhlun North FC ațanga loan a an lak, Santosh Trophy-a Assam aiawha fehchhuak tawh Jessie Vanlalmuana leh Bethlehem Vengthlang FC ațang lo let hlim Isaac Lalruatpuia te an awm dawn a, defenfer naupang zawk tan chuan luhaina tham a ni ngei ang.

Midfield ah local football a sulhnu nei țha Hmangaitluanga, HS Lalremtluanga leh Goa Club Fariah Striker player hlui R. Lalnundanga te an awmho dawn a, skills leh technique baka thluak hmang tel țhinte che vel hi ennawm mak tak a tling ang.

Intawn tawhna : Club pahnihte hi tun season ah vawihnih inhmachhawn tawhin match hmasa zawkah Zotlang FC hian 2-1 in hnehna an chang a, an intawn hnuhnung zawkah Bazarveng FC hian 3-1 in an hneh let ve thung.

Bazarveng hian goal thun lamah harsatna an nei lo va, tun season-a goal thun tam ber niin goal 51 zet an thun tawh.

Chutih rualin an khingpui tur Zotlang FC hi goal chhuah tlem ber ni thungin goal 16 chiah an la chhuah.

Tun țum final a chak hian pawimawh zualna a nei, champion hian pawisa fai Rs. 100,000 an hum haw laiin pahnihnain Rs. 40,000 chauh an dawng dawn. Lawmman a inthlau a, final a chak leh chak loh Rs.60,000 neih leh chan inkar a ni.

Bazar tawt leh traffic jam kalsanin Țhuamluaia Mualah a thlawnin ‘Ennawm mak tak’ lo tlir ve rawh le.

C Tlanthianghlima

Football tui ve tak

You May Also Like

More From Author

44Comments

Add yours
  1. 11
    Memes

    … [Trackback]

    […] There you will find 71464 additional Info to that Topic: zofooty.com/lunglei-super-3-final-lawmkima-hmar/ […]

+ Leave a Comment