#ZoFooty
Lal thar a piang-
England-a Lawng chawlhna hmunpui ni thin, khaw nuam tak Liverpool-ah hian Club lar tak pakhat a awm thin a, Everton a ni. Everton hian kum 1884 atangin Everton F.C. member John Houlding-a thianpa, John Orrell-a Football Ground ‘Anfield’ chu man tlawmtein an luah hawh a, kum 1885-ah Houlding hian Orrell-a hnen atangin Anfield chu a lei a, Club hotu zinga mi ngeiin Anfield a lei takah chuan Everton lam pawn beiseina an neih san viau laiin, an hman man chu a tisang ta hlauh zawk a, vawi khat tih san mai duh tawk lovin kum tin a hman man chu a tipung a, 1892-ah Everton chu Goodison Park-ah an insuan ta nge nge a ni.
Chumi leh chhan dang dang vangin Everton Committee leh John Houlding-a inkar chu a lo khi chho va, Goodison Park-a Everton an insawn hian Houlding chuan zui ve ta lovin, Club thar a din ta zawk a, a hmingah “Everton F.C. and Athletic Grounds Ltd” a phuah. Thinrima chhuahsantu kha Everton FC tho an ni si a, Everton hming an put ve leh chu FA-in a phal lo va, he Club hi Official-in an pawm lawk loh phah. A hnu rei lote ah Liverpool FC tiin a thlak a, June 3, 1892 ah Official-a inziak felin Liverpool FC a piang ta a, vawiin thlengin mual ropui leh mikhual tana tihbaiawm Anfield-ah an cham zui ta a ni. Liverpool khawpuiah lal thar a piang a, Everton an vawk lal len thei ta bik lo!
Puan ang a chul-
September 1, 1892-a Rotherham Town nen Friendly Match an khelh chu an Match hmasa ber a ni a, 7-1 in an chak nghal. Pu Buanga leh Sap Upa te Mizorama an rawn kal hlan khan, 1894-95 Season-ah First Division League-ah an khel a; mahse, vanduaithlak takin Division II ah an tla lehnghal. Mahse, a kum lehah an inpet kai leh nghal a, tluang taka kalin 1900-01 ah meuh chuan First Division-ah an Champion der mai. 1954 hma lam khan vawi 5 zet an Champion hman a; mahse, chet that reng a theih bik loh va, 1954-55 atangin hun thim a intan a, Season 8 chhung tehmeuh Division II-ah an khel hman a, an ropuina te chu puan ang a chul zo ta!
Hmasawnna thar-
Theihtawpa an beih hnuah 1962-63 khan Division I an inpet kai leh a, 1964-65 ah an Champion chhunzawm. Chuta tang chuan hawi kir lovin an kal zel a, an Champion mawlh mawlh a ni ber. Premier League pian hma khan vawi 18 zet lo Champion tawh bikin, Champion ngun ber an ni chho ngar ngar mai a ni.
Anfield-a mittui-
Mahse, Premier League a lo piang a, lal thar a rawn chhawm (Tunge lal thar tih chu lo ngaihtuah mai ula)! Liverpool par a chuai a, an ropuizia sawi nan Premier League pian hma an sawi a ngai ta zel mai! An hmelma Club an rawn kan zawt zawt laiin, Liverpool-in an ropuina an humhim zo tlat lo! An Player ropui Steven Gerrard-a hoa theihtawp an chhuah chung pawhin an tum ram an thleng hlei thei lo va, Anfield thawm ropui tak phenah chuan mittui a hnam thin!
Malin i awm lo’ng-
Liverpool fans ten an hmelma Man Utd Trophy chawi lai mittui nen an thlir thin. Mahse, beidawnga an indawn kun niah meuh pawh, ‘Malin i awm lo’ng’ tih hla nen an hmangaih Liverpool an zui zel a, ‘hun harsaah pawh kan zui zel ang che,’ tia zaiin, an hmangaih Liverpool an biruksan ngai lo. An chauh ber lai pawhin ‘You’ll never walk alone’ tih hlapui hmanga in awiin, chakna thar an insiam leh thin!
Liverpool a vul leh ta-
Mi ropuite ropuina chu thup bo sen a ni lo angin, Liverpool ropuina chu Club dangte tan hliah khuh sen a ni lo. Beiseina sang tak nen kum tam tak League no mawi an thlir liam hnuah; mi pakhat, inngaitlawm tak mai a lo lang, a hming Jurgen Klopp a ni. Anfield chhunga Kop ho thawm bengchheng lutuk tak hmaah chuan Heavy Metal Football an han khel ta tak tak a, dan zawh rual an ni lo. Liverpool ropuina a lo kir a, 2019-20 Season-ah Champion-in Anfield par a vul leh ta a ni.
Duhsakna-
Season liamtaa an Perfomance te, an Manager leh Player te theihna enin, tun Season-a Champion tura beiseiawm berte zinga mi an ni tih a chiang a, Liverpool fans ten nghakhlel takin Premier League Trophy an thlir mek – Thlir liam lova chawi ngei turin duhsakna kan hlan e.
