Premier League ah champion tur a chiang lo leh ta nuaih mai. Nilaini zan khan tunhnaia a zawna Premier League match 8 chak zâwn tawh, point 8 a hmahruaitu Manchester United chu Wigan Athletic lakah 1-0 in an tlawm a, tunhnaia chak hleithei lo pahnihna Manchester City in Etihad Stadium ah West Brom an ‘sawp’ bawk avangin an inthlauhna hi point 5 chiah a ni leh ta. Season tâwp hmain Manchester derby a la awm bawk a, huaisen taka Manchester United champion ‘tawh’ anga sawitute ka hupsakin a awm rih e.

Nilaini zanah vêk hian Molineux stadium ah Arsenal in Wolves 3-0 in an sawp a, 3 na dinhmun an sawhnghet zel bawk.

Man City 4 – 0 West Brom: Aguero is back

Tunhnaia Manchester City chak hleihtheih loh chhan pakhat chu Aguero inhliam lai leh David Silva ‘form’ chhiat lai a inrual vang a ni. Tunah chuan Aguero a dam tawh a, Silva a ‘form’ leh tawh a, anni pahnih bakah Carlos Tevez a awm taw bawk. Anni pathum inkawp hi West Brom defender ten an ngam lo kher mai.

Man City hian minute 6 lekah penalty box pâwn aṭanga Aguero pet goal hmangin hma an hruai a. First half chu Man City in an thunun hneh hle. Arsenal player hlui Nasri a langsar a, Micah Richards leh David Silva ten goal thun theihna chance ṭha tak tak nei mahse first half-ah goal dang a luhbelh lo.

Second half ah pawh mual neitu bawkin inkhel an thunun. Minute 53 ah Man City ‘move’ mawi tak aṭangin Aguero bawkin a pet goal leh a, hei hi Nasri siamsak (through ball) a ni. Minute 61 ah Carlos Tevez chuan City goal 3 na a thun a, September thla hnua Tevez-a Premier League game ‘start’ leh hmasak ber a ni nghe nghe. Minute 64 ah Aguero through ball mawi zet lo changtu David Silva chuan West Brom keeper Ben Foster chip khumin City goal 4 na a thun bawk.

Manchester City an chak chiang a, an game a hmuhnawm leh tawh a, champion beiseina tlem an la neih kha, United an chak loh avangin an ‘confi’ sawt bawk ang. Man of the match, goal 2 thun a, goal 2 siamsaktu Kun Aguero te ho hian April ni 30 a Manchester United an mikhual hun tur an nghakhlel tawh viau ang le. Tevez hian a nghakhlel lehzual ngei ang.

Wolves 0 – 3 Arsenal: Mikhual huangtau Arsenal

Season dangah chuan tun ang hun hi Arsenal chetchhiat lai a ni ṭhin a, tun season-ah erawh an chak lo hlei thei meuh lo a ni ber. Pathianni zana Manchester City an hneh hnuah, Nilaini zan khan khualmualah Wolverhampton Wanderers chu sithum faiin an hneh leh a, palina Tottenham Hotspurs nen an inthlauhna chu point 5 a ni tawh.

van Persie is back

Inkhel an ṭan deuh chiah a, minute 9 lekah Wolves defender Bassong chuan penalty box chhungah Theo Walcott a tihtluk avangin penalty a châwi a, defender hnuhnung ber a nih avangin red card a hmu bawk. Penalty pet tur hian Arsenal captain Robin van Persie a lo dingchhuak a, a ‘chip’ lut mawi kher mai. Van Persie hian tunhnaiah a zawnin match 4 goal a thun tawh lova, mahse he penalty hian a ‘confi’ zia a tilang chiang viau awm e.

Arsenal hian minute 11 ah Theo Walcott hmangin goal 2 na an thun zui a, van Persie nen an in ‘one-two’ hnuah, he English winger tlanchak hian kil zetah a thun. Wolves hian second half-ah Doyle leh Milijas te hmangin chance ṭha zet an nei tih loh chu Arsenal keeper an tibuai lutuk lo.  Arsenal tân van Persie leh Ramsey ten an ṭhelh ho angreng viau bawk.

Second half ah Wolves an rawn khel ṭha viau a, mahse an phurna tireh rawih turin minute 69 a Benayoun chuan Arsenal goal 3 na a thun a, hemi hnu hi chuan Arsenal in inkhel an thunun tluan a tih theih awm e.

Wolves hian point 22 chauh an la hmu a, a hnuai berah awmin midang zawng aiin point 9 in an hniam fal tawh a, division hniam lamah an tlathla ngei dawn niin a lang ta. Arsenal hian point 64 an hmu tawh thung a ni.

Wigan Athletic 1 – 0 Man United: No Scholes, no goals?

Point 8 in hma an hruai tawh a, relegation zone-a awm an tlawh dawn a, an intum hnuhnung 14 ah an la chak ziah bawk a. Manchester United in Wigan an zuamsual em ni.

Wigan Athletic in an mikhual Manchester United chu Shaun Maloney goal nalh zet hmangin sikhat faiin an hneh a, Premier League title race boruak thi mai tur an chawk ‘hot’ leh ta. Hei hi Premier League-a Wigan in Man United an hneh hmasak ber a ni nghe nghe.

Inkhel ṭantirh phat aṭangin Maloney leh Victor Moses ten United defence an chhaihbuai nghal a, United in anmahni ‘half’ an pel thei meuh lo a, an pelh chhunah pawh Wigan keeper an tibuai pha meuh lo. Minute 30 ah Wigan corner aṭangin Victor Moses chuan a head goal a, referee pawhin goal ah a pawm niin a lang. Mahse assistant referee in Caldwell-a’n de Gea a dang nia a hriat avangin ‘foul’ a phar a, goal hi pawm a ni lo. Wigan manager Roberto Martinez a thinrim ngang mai a, half time ah Wigan fans ten referee an boo hluah hluah mai.

Wigan hian second half ah an pet goal ta nge nge a. Minute 50 ah Wigan short corner kal zel aṭangin Shaun Maloney chuan goal mawi zet mai a thun a, keeper ṭha mi de Gea meuh pawhin a ban pha lo. Hemi hnu hian United in an nawrbet deuh reng a, Wigan defence ṭhiat hleithei chiah si lovin penalty box pâwnah ball an in pass kual nasa. Welbeck-a’n ṭumkhat a thun teuh hle tih loh chu chance ṭha lutuk han tih tur an nei lem lo. Wigan zawk hi counter attack ah an hlauhawm ṭhin a, Sammon leh Moses te finishing ṭhat zan chu nise goal an thunbelh nual ang. Mahse a tawp thlengin goal dang a luhbelh lo a, Wigan hi relegation zone aṭangin an talchhuak ve leh ta.

Second half-ah dinglam aṭanga Phil Jones cross, penalty box chhunga Figueora handball chu referee in penalty a pe lo bawk.

Tichuan….

Premier League title race a ‘ho’ hman lek lek a, tunah chuan a ngaihnawm leh ta. Point 5 a hmahruai hnua inlehpelh hi season tâwpah chuan a har tawh ṭhin a, game 5 chauh khelh tur a awm tawh avangin, kumdang chu nise point 5 hi tamtak tur a ni. Mahse pakhatna leh pahnihna hi an la intum dawn a, Manchester City hi an chak vaih chuan point 2 chiah a ni dawn. Point 2 hi chu match 1 chetsual zeuha inlehpelh theih a ni. Tun ang hunah chuan eng team pawh an ṭang em em vek tawh a, game awlsam a awm tawh lo. Tu zawk tak chesual hmasa leh ang maw?

It is back…