#ZoFooty #FootballKaida

MAN UNITED-AH ENG NGE KAN BEISEI THEIH?
Premier League match thum khelh a ni tawh a, transfer hun a zo leh ta bawk. Tun hi team analyse hunlai tak a ni thei ang. Manchester United aṭangin bul han ṭan ila, Inrinniah league ṭan a nih leh mai dawn avangin eng chen nge kan zawh theih ang tih erawh sawi lawk theih a ni lo.

Man United squad analayse tak chu post dangah rawn siam a ni ang a, tun ṭuma mi hi chu a khuhhawnna chauh a ni e.

THE CHOSEN ONE?
Manchester United leh Premier League nomawi sawi kawp dawn chuan keu let thui deuh a ngai ta. Ole Gunnar Solskjaer chauh ni loin Sir Alex Ferguson-a thlaktu David Moyes, Louis van Gaal leh Jose Mourinho te khan nomawi an chawi miah lo.

The Chosen One an tih mai David Moyes khan club lian pressure a zo lo a, league match hmasa parukah vawi thum ngawt a chak lo a, point 18 hmuh theih aṭangin point sarih chauh an hmu. Champion beiseina a thamral hma a, Moyes-a’n season tawp a daih lo a, pasarihna ni chungin season an khar. Hei hi 2013–14 season kha a ni a, Sir Alex awm loh hnua an season hmasa ber a ni.

VAN GAAL
FIFA World Cup 2014-ah Netherlands an che ṭha a, semifinal hial an thleng a, pathumna ni turin inelna thlengtu Brazil chu 3-0 in an sawp bawk. Oranje coach chu Louis van Gaal a ni a, Dutch manager hian World Cup zawhah Old Trafford a pan avangin thawm an nei ring hle.

Moyes ang thoin Van Gaal-a hnuaiah Man United-in nomawi an chawi lo a, league-ah palina an nih phak avangin Champions League khel turin an tling. Van Gaal-a hnuaia season hnihna (2015–16 season) ah erawh nomawi an chawi ta a, league nomawi ni loin FA Cup a ni thung.

Man United hian league match hnuhnung bera Bournemouth an hneh hmain West Ham United an hneh lo a, Champions League khel turin an tling zo lo. FA Cup final-ah Crystal Palace hneh mah se champion an lawm hmain Van Gaal an ban tur thu chu media-ah a darh tawh a, Dutch manager pawh a thinur hle.

THE SPECIAL ONE
Nomawi duhin Manchester United an tuihal a, Van Gaal thlak nan nomawi chawi thiam hming thang Jose Mouinrho an thlang. Portuguese manager hnuaiah Community Shield an chawi nghal a, League Cup leh Europa League-in a zui avangin Mourinho pawh a hawi sang hle. Season khatnaah hian Man United-in Mourinho hi player langsar pali Zlatan Ibrahimovic, Paul Pogba, Eric Bailly leh Henrikh Mkhitaryan te an laksak.

2017–18 season-ah phei chuan Man United-in beiseina sang tak an nei a, Mourinho hi player ṭhain an vur nawn; Romelu Lukaku, Nemanja Matic leh Victor Lindelof te an lalut. League nomawi an beisei miau avangin hlawh tam tak pek huamin January thlaah Arsenal aṭangin Alexis Sanchez an lalut leh bawk.

Mahse, Mourinho leh Man United-in nomawi an chawi nawn lo. League lamah pahnihna ni pha mah se Manchester City nena an inkar a zau hle, point 19 zet a tling. Pep Guardiola-a’n khelh dan phung nghet neia team tak tak a din tak avangin ‘The Special One’ pawh a special thei ta lo.

2018–19 season a rawn inher chhuak a, Mourinho-a’n centre back a duh thu uar takin a sawi. Amaherawhchu Bailly leh Lindelof te an laksak tawh avangin Portuguese manager duh an tih hlawhtlinsak lo. Chutihrualin tuna Man United midfielder hming sawi hlawh deuh Fred hi pound maktaduai 47-in an lalut.

Portuguese manager hian squad ṭhat tawk loh thu a tlangau pui reng a, team chhung boruak a ṭha lo. December 19, 2018 a rawn inher chhuah meuh chuan Man United-in Mourinho an ban thu an puang.

OLE’S AT THE WHEEL!
Manchester United-in Sir Alex Ferguson chungah dawhtheihna an lantir a, hlawhtlinna ropui tak an chang zui. Scottish manager-in Old Trafford-a thuneihna a chelh laiin Premier League club dang chuan manager an ban nasa hle.

Sir Alex-a chhuah hnuah erawh Man United pawh Premier League club dang ang tho an ni a, Moyes-a chungah zahngaihna an lantir lo. Nomawi duhin manager tawnhriat nei ṭha Van Gaal leh Mourinho te lalut mah se an duh ber league nomawi an chawi phah lo.

Man United chuan hming langsar aiah club hrechiang an thlang a, club legend Ole Gunnar Solskjaer chu Norwegian club Molde aṭangin an la chhuak. December 19, 2019 khan United-in Ole hi manager lailawk atan an ruat.

Sawiselna awm bawk mah se Ole hnuaiah Man United-in result an nei ṭha hle. League match hmasa parukah an chak zawn nghal a, league match 12-ah hneh loh tawng loin vawi hnih chiah an inhnehtawk. March 28, 2019-ah Man United-in Solskjaer chu an dah nghet a, Norwegian manager hian hna nghet a neih hnuah result a nei ṭha tawk lo.

League match hnuhnung pangaah Man United-in chak hmel an hmu lo a, vawi thum nghawt an chak lo bawk. Man United-in parukna nichungin season an khar a, an chungah Tottenham leh Arsenal te an awm.

2019–20 season-ah Ole-a’n season bul aṭangin team a enkawl a, ṭha teuhin season tawp an khar. United hian FA Cup, League Cup leh Europa League-ah semifinal lut vek mah se final an thleng zo lo vek a, league-ah pawh pathumna an ni.

Season liam ta pawh kha kan thlir kir chuan ‘ṭha teuh’ thoin Man United-in season an khar. Europa League-ah final hial thleng mah se Villarreal hneh loin a vanduai zawkah an ṭang a, league-ah ni se hmahruaitute ni ve hman mah se January chhoah point an hloh nasat avangin season a tawp meuh chuan Manchester City chu point 12 zetin an pha lo.

Amaherawhchu Ole hnuaiah Man United player-te an inlungrual a, academy player a chhawr hnem a, a tawi zawngin nomawi chawi lo mah se Mourinho hnuai aiin tun hma Sir Alex hunlai ‘boruak’ kha an hnaih zawk. (Min ṭawmpui em?)

Hengte vang hi a ni ang, Man United thuneituten season hnih leh a chanve chhung nomawi chawi tawh lo Ole chungah rinna an la nghat ngam tlat. Tun season-ah phei chuan Jadon Sancho leh Raphael Varane te an lakluh hnuin club legend Cristiano Ronaldo an la laksak hial.

Hemi chungchang hi post tharah rawn ziah chhunzawm a ni ang.