World-cup qualifier in inrinni zan leh Pathianni zan, zan hnih lai mai min hnehchhuh hnuah tunkar chu rilru thar nen Barclays Premier League inkhel en tur kan nei leh tawh dawn a, a phurawm khawp mai. Vawi 19 champion tawh, season hmasaa 2-na, Manchester United leh season hmasaa dawrip tak chunga Manchester United an vawk lal lenna thin, Premiership-a inhamtang hram hram, Wigan Athletic te chu nakzan(Inrinni) hian ‘Theatre of Dreams’  ah an inkhuainuai leh dawn a ni.

Date : September 15, 2012

Time : 7:30 PM IST
Venue: Old Trafford — Manchester, United Kingdom
Referee: M. Oliver‎

TEAM NEWS:

Manchester United : Tunlai hi United damdawiin-ah seat a full lai tak a ni a, hliam leh na ten a tihbuai hrat em em, Manchester United chuan England leh Europe-a rorel leh tur chuan harsatna engemaw chu an suttlang a ngai ngei dawnin a lang.

Defender Phil Jones chu a khup an zai avangin ala khel thei dawn lova, tin,  Chris Smalling ala dam chian loh bawk avangin defence line-ah chuan a ngai bawk an in rem leh a rinawm. Chutih laiin Johny Evans erawh a dam fel tawh a, a tir atanga a khelh erawh ala rinawm loh thung.  A laiah skipper, Nemanja Vidic leh Rio Ferdinand an din dun theih tawh a rinawm a, dam kawr pahnih hian clean-sheet nei thei tak ang maw?

Field laiah Darren Fletcher chhawr ngam ala ni dawn lova; tin, leithar Shinji Kagawa pawh World Cup Qualifier atana a inbuatsaihnaah a inhliam avangin bul a tan a rinawm chiah loh bawk. Mahse, rawlthar duhawm, Tom Cleverly, Anderson leh an puipa, Michael Carrick te erawh an dam tha hle thung.  Tin a sir kilah pawh Antonio Valencia leh Luis Nani tho kan hmuh leh a rinawm a, Ashley Young erawh a hliam ala dam loh avangin a inlan thei lo vang.

A changtupa, Wayne Rooney pawh dam chak viau tawh mahse, game engemaw zat chu ala khel thei dawn lova; a thachhang dawl tura hmelma duhlai an chhuhsak, United goal thun khawl, Robin Van Persie-a’n hliam tenau deuh a neih leh tak avangin United innghahna pahnih te hmel hi kan hmu lo ve ve ang tih a sawi theih loh. Rawlthar duhawm, Danny Welbeck leh Javier Hernandez te la awm mahse, United goal nawr hi nidang ang chuan a na lutuk lovang tih a rin thiam theih maiin a lang.

United ‘Damna Runlian’ ah damlo an tam em avangin Sakeibaknei  pawh duh angin a ramvak thei dawn lova, mahse, sakhi tuai naran tan chuan sakei hliam hmachhawn chu thil namai a ni bikin a rinawm loh.

Probable Starting Line-up (4-4-2): De Gea/Lindegaard; Rafael, Ferdinand, Vidic, Evra; Nani, Carrick, Cleverly (or, Giggs), Valencia; Welbeck, Chicharito

Wigan Athletic : Season hmasa tawp lama thawm nei lian tak, Wigan Athletic hian an players tha ber berte an chhawr theih dawn avangin, nikum season tawp lama 1-0 a Man United an lo tlawm kha tihpalh emaw an mangang banvai ina an vaifuh palh a nih loh zia pholanna hun remchang an nei dawn niin a lang.

Boss Javi Martinez chuan a duhthusam players a thlang thei dawn a; Vice captain, Antolin Alcaraz chuan hremna a tuar tur ang a tlingtlak zawh tawh avangin full back, Maynor Figueroa  lo dinnaah a rawn din leh ngei a rinawm. Mahse he Honduran full-back hian Stoke city nen an inkhelh tuma hliam tuar, Jean Beausejour aiah left-wing back lamah a insawn chhoh a rinawm. Tin, an Scottish midfielder chhuanvawr, James McArthur pawh a dam tha e.

Season liam taa game huaisen tak min hluitu, Javi Martinez hian sa hliam beih nan hian a formation hman thiam em em, 3-5-2 bawk a hman leh a rinawm a. Chuti a nih chuan Figueroa hian veilam sir kil a chan ngei a rinawm a, tin leh lamah left-wing back ang thovin Emmerson Boyce a hmang leh ngei anga; tin, a field laiah James McCarthy leh James McArthur  leh false 9 position-ah Shaun Maloney an awm bawk anga, United midfielder te an chhaihbuai thei a nih vanih chuan an goal nawr a na viau ang.

A hma tawngah Franco Di Santo leh Arouna Kone te an inkawp leh ngei a rinawm a, an dam a nih phawt chuan goal an sur tir a nih loh pawhin United defender ten an chhaih buai ngun hlein a rinawm.

Probable Starting Line-up (3-5-2): Al Habsi; Alcaraz, Caldwell, Ramis; Boyce, McCarthy, McArthur, Maloney, Figueroa; Di Santo, Kone

DUH DUH SAWI ANG :

Wigan game hnuhnung pathum te kan thlir chuan an thlahtute an lo khurh hlum lek lek tawhna thin, Old Trafford-ah hian hnehna hlado sa chunga an haw a rinawm loh khawp mai a; mahse, michak hliam tuar ai chuan mi chaklo dam tha veng vawng tak chu kei hmachhawn ka hlau zawk ngei ang le.

Kan sawi fo tawh angin united inkhel siamna khawl chu Midfield a ni a, an goal nawrna khawl chu an winger te an ni. United inkhel reng rengah an goal nawr 100 zela 70/60 vel hi chu a sir kil atangin a ni. Tin heng 70/60 % ah hian a tam zawk chu dinglam kil atanga an chhawp luh a ni bawk thin. United hian Premier league winger te zinga tuai rum ber leh hlauhawm ber te zinga mi, Luis Antonio Valencia  an nei a; tin, leh lamah Portuguese ball thiam, Luiz Nani an nei bawk.

Inkhelah reng reng goal kan nawrna chu a sir kil lam atangin a nih chuan, finisher tha kan neih ngei ngei a ngai thin. Hei vang hian United hian an finisher neih that pahnih awm lo tur hi an tuar ngeiin a rinawm. Van Persie a khel thei a nih phawt chuan a thachhang dawltu atan chuan Welbeck leh Chicharito chu an inaiawm lutuk chuang lo ve.

Heti a nih laia Javi Martinez-a’n United hmachhawn nana 3-5-2 formation a thlang daih hi thil mak tak chu a ni. Defence line-ah Alcaraz, Caldwell, Rami-a te an tla fual a, hetih lai hian United flank conquerer dang tura ngaih a full-back pahnih te tawlh chhoh tirin winger hna an thawk.kawp dawn a, hei hian a sir kil ngaina em em, United tan hunawl leh hmunawl a siam ngeiin a rinawm. United counter attack hi an dang zo ngut dawn emaw chu???

Amaherawhchu, Martinez hian United nawrna khawl tihbuai tuma beih ai chuan an inkhel siamna hmun tihbuai hi a tum hmasa niin a lang. Midfielder pathum(3) lai a hman leh a rinawm a, chuti a nih chuan Wigan hian field laiah ro an rel thei a nih phawt chuan awlsam takin an attacker, wing-back pahnih te nen United defence line hi an thiatin an palzui thei tawh dawn a ni.

Engpawh nise ralrel thiam pahnih te inbei hi a hmuhnawm dawn hle a, tun zawk nge dingchang dawn tih chu ‘LUCK’ in a hril tawh ang. Nghakhlel takin a hun ilo nghak hrih phawt mai teh ang u.

I HRIAT NGEI NGEI TUR…

• Manchester United hian Wigan Athletic nena an intum hnuhnung bera 1-0 a an tlawm kha, an intum vawi 15 naa Wigan laka point an hloh awmchhun a ni.
• Wigan hian an game hnuhnung 9-ah vawi hnih chiah chak loh an la nei a ni.
• Latics players pathum (Antolin Alcaraz, Hugo Rodallega, Conor Sammon) te chu ‘Theatre of Dreams’-a inkhel vawi hnihah hnawhchhuah an ni.
• United hi tun season a goal zawna shot(54) ngah ber niin, chawhrualin game tina vawi 18 vel an zel goal shot(on target) nei ang an ni.
• Season liam taa JW Stadium a Wigan 1-0 a an hneh loh hma kha chuan United  hian Wigan lakah point pakhat mah an la hloh ngai lo.
• Wigan hian an gam hnuhnung 12 ah vawi 8 hnehna an chang tawh a, khelh 14-ah goal 13 an thun tawh a ni. Chelsea FC chu Wigan goal chhuah lo awmchhun an ni.

Author’s Prediction : Manchester United 2-1 Wigan Athletic

Zofooty Admin’s & Authors’ Prediction :

Zama Rumkhar: Man Utd 2-0 Wigan

Lalramenga Hmar: Man Utd 3-0 Wigan

Mykee Rokhum: Man Utd 1-0 Wigan

Lalthanzama Vanchhawng: Man Utd 2-0 Wigan

Lalzarzova : Man Utd 3-0 Wigan

Ben vangchhia: Man Utd 3-1 Wigan

All images from indonewyork.com & premierleague.com